ប៉ៃលិន៖រាជរដ្ឋាភិបាលកម្ពុជាផ្តល់អាគារមន្ទីរពេទ្យបង្អែកនិងបំពាក់ឧបករណ៍ទំនើបនៅតំបន់ព្រំដែនខេត្តប៉ៃលិន។កាលពីថ្ងៃទី២៧ខែកក្កដាឆ្នាំ២០២០អាជ្ញាធរខេត្តប៉ៃលិនបានចាប់ផ្តើមបញ្ចុះបឋមសិលាបើកការដ្ឋានសាងសង់នូវអគារមន្ទីរពេទ្យបង្អែកថ្មីបន្ថែម១ខ្នងទៀតដែលមានកម្ពស់៣ជាន់។ អាគារនេះប្រើប្រាស់ថវិកាប្រមាណជាង២លានដុល្លារនៅលើទឹកដីខេត្តប៉ៃលិនដែលគ្រោងនឹងដាក់ឱ្យប្រើប្រាស់ជាផ្លូវការនៅពាក់កណ្តាលឆ្នាំ២០២១។ លោកផាន់ចាន់ធុលអភិបាលខេត្តបានលើកឡើងថា៖ការបង្កើតឡើងនូវសមិទ្ធផលថ្មីអគារមន្ទីរពេទ្យបង្អែកខេត្តបន្ថែមទៀតនេះជាការសម្រេចគោលដៅលើវិស័យជាចម្បងប្រកបដោយគតិបណ្ឌិតរបស់សម្តេចតេជោហ៊ុនសែនជានាយករដ្ឋមន្ត្រី។ ក្រសួងសុខាភិបាលក៏ដូចជាដៃគួរអភិវឌ្ឍន៍ខិតខំរួមគ្នាសំដៅពង្រីកសេវាសុខាភិបាលសាធារណៈឱ្យខិតកាន់កៀកជិតនិងបង្កលក្ខណៈងាយស្រួលដល់ប្រជាជនទទួលយកនូវសេវាសុខមាលភាពបានលឿន និងរហ័ស។ លោកអភិបាលខេត្តប៉ៃលិនបានបន្តថា៖ក្រៅពីការពង្រីកជាមួយនូវសេវាសុខាភិបាលសាធារណៈនៅតាមតំបន់ជនបទឬតំបន់ព្រំដែនបានទូលំទូលាយហើយយើងក៏បានផ្តោតជាសំខាន់ផងដែរទៅលើគុណភាពសុខាភិបាលធ្វើយ៉ាងណាឱ្យប្រជាពលរដ្ឋកាន់តែមានជំនឿទុកចិត្តលើវិស័យនេះ។ ចំពោះមុខនេះដែរមន្ទីរសុខាភិបាលខេត្តប៉ៃលិនបាននឹងកំពុងដើរតួយ៉ាងសំខាន់ក្នុងការងារពិនិត្យនិងព្យាបាលជំងឺដល់ប្រជាពលរដ្ឋ។ ម្យ៉ាងទៀតស្ថាប័ននេះក៏កំពុងបន្តការគ្រប់គ្រងទៅលើមន្ទីរពេទ្យរបស់រដ្ឋនិងឯកជននានាហើយបាននឹងកំពុងបន្តយកចិត្តទុកដាក់កែប្រែឥរិយាបថដោយអនុវត្តន៍តាមជំនាញក្រមសីលធម៌វិជ្ជាជីវៈរបស់គ្រូពេទ្យ។ពិសេសមន្ទីរពេទ្យត្រូវតែកាត់បន្ថយការធ្វើបែបបទច្រើនឬទាលុយពីអ្នកជំងឺមុនការព្យាបាលជៀសវាងមានការថ្នាំងថ្នាក់ពីសំណាក់ប្រជាពលរដ្ឋ។ ផ្ទុយទៅវិញមន្ត្រីសុខាភិបាលឬគ្រូពេទ្យទាំងអស់ត្រូវតែជាជនគំរូក្នុងការជួយពិនិត្យព្យាបាលជំងឺជួយប្រជាពលរដ្ឋឱ្យរឹតតែល្អពីមួយថ្ងៃទៅមួយថ្ងៃ។អគារថ្មីមន្ទីរពេទ្យបង្អែកខេត្តថ្មីខាងលើជាជំនួយឧបត្តម្ភរវាងរាជរដ្ឋាភិបាលកម្ពុជានិងដៃគូអភិវឌ្ឍន៍។ អគារមានបណ្តោយចំនួន៨៥,១ម៉ែត្រទទឹង៤៩,២ម៉ែត្រកម្ពស់៣ជាន់ក្នុងទំហំថវិកាចំនួន២.៤៨៦.២០០,៥៥ដុល្លារអាមេរិក។ដោយចាប់ផ្តើមដំណើរការសាងសង់ចាប់ពីថ្ងៃទី៧ខែកក្កដាឆ្នាំ២០២០ហើយគ្រោងនិងបញ្ចប់ការសាងសង់ក្នុងរង្វង់ខែវិច្ឆិកាឆ្នាំ២០២១៕ខុម
Author: admin
ប្រតិភូរដ្ឋសភាចុះទស្សនៈកិច្ចសិក្សាស្វែងយល់ពីសក្តានុពលពីការដាំបន្លែរបស់កសិករ
ព្រះវិហារ៖លោកឡូយសុផាតប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទបរិស្ថាននិងធនធានទឹកនៃរដ្ឋសភានិងសមាជិក,លោកប្រាក់សុវណ្ណអភិបាលខេត្តព្រះវិហារកាលពីព្រឹកថ្ងៃទី២៨ខែកក្កដាឆ្នាំ២០២០បានចុះទស្សនៈកិច្ចសិក្សា។ដើម្បីស្វែងយល់ពីសក្តានុពលពីការដាំបន្លែរបស់កសិករឈ្មោះសោមឌៀបនិងប្តីឈ្មោះហេងគង់។ កសិករនៅភូមិស្ថាពរសង្កាត់ប៉ាលហាលក្រុង/ខេត្តព្រះវិហារបច្ចុប្បន្នគាត់មានដាំបន្លែនៅក្នុងផ្ទះសំណាញ់៣ខ្នងហើយមានដាំបន្លែនៅខាងក្រៅផ្ទះសំណាញ់ផងដែលមានការចិញ្ចឹមត្រីក្នុងការដាំបន្លែដោយទទួលបានចំណូលសរុប២០.៤៨០.០០០រៀល។ ក្នុងនោះត្រូវចំណាយលើចំណីត្រីសម្ភារស្បៃគ្របប្រេង…អស់សរុប៤.២១០.០០០រៀលគាត់នៅទទួលបានប្រាក់ចំណេញពីមុខរបរទាំងអស់នោះសរុប១៦.២៧០.០០០រៀល សម្រាប់ឆ្នាំ២០១៩ កន្លងមក៕វ៉ាន់ឌី
អភិបាលខេត្តស្វាយរៀងចុះពិនិត្យពីស្ថានភាពរស់នៅរបស់បងប្អូនអតីតយុទ្ធជន
ខេត្តស្វាយរៀង៖អភិបាលខេត្តអញ្ជើញចុះពិនិត្យមើលពីស្ថានភាពរស់នៅរបស់បងប្អូនអតីតយុទ្ធជនដែលទទួលបានផ្ទះនិងដីសម្បទានសង្គមកិច្ចនៅតំបន់ផ្ទះ៤០០ខ្នងក្នុងភូមិជីកដីឃុំអណ្ដូងត្របែកស្រុករមាសហែកខេត្តស្វាយរៀង។ លោកម៉ែនវិបុលអភិបាលខេត្តស្វាយរៀងកាលពីព្រឹកថ្ងៃទី២៨ខែកក្កដាឆ្នាំ២០២០នេះបានអញ្ជើញចុះពិនិត្យមើលពីស្ថានភាពរស់នៅរបស់បងប្អូនអតីតយុទ្ធជនដែលទទួលបានផ្ទះនិងដីសម្បទានសង្គមកិច្ចនៅតំបន់ផ្ទះ៤០០ខ្នង។ ក្នុងភូមិជីកដីឃុំអណ្ដូងត្របែកស្រុករមាសហែកនិងបើកការដ្ឋានស្ថាបនាផ្លូវក្រាលគ្រួសក្រហមប្រវែង១.៩២០ម៉ែត្រដើម្បីបង្កភាពស្រួលដល់ការធ្វើដំណើររបស់បងប្អូនប្រជាពលរដ្ឋនៅតំបន់នោះ ។ លោកអភិបាលខេត្ត ក៏បានលើកទឹកចិត្តឱ្យបងប្អូនបន្តខិតខំបង្កបង្កើនផល ដាំដំណាំ ដើមឈើហូបផ្លែ និងចិញ្ចឹមសត្វបន្ថែមទៀតដើម្បីបង្កើនជីវភាពគ្រួសារ និងអញ្ជើញមករស់នៅឱ្យបានជាប់លាប់ ចូលរួមអនុវត្តគោលនយោបាយភូមិឃុំមានសុវត្ថិភាព ត្រូវធ្វើអនាម័យសុខភាពឲ្យបានជាប្រចាំ ។ដើម្បីការពារកុំឱ្យមានឆ្លងមេរោគកូវីដ-១៩។ចូលរួមគោរពច្បាប់ចរាចរណ៍និងអប់រំណែនាំកូនចៅចៀសឱ្យឆ្ងាយពីគ្រឿងញៀន៕
ជនសង្ស័យ២នាក់កាច់សោម៉ូតូសន្តិសុខឃើញទាន់ចោរបាញ់១គ្រាប់ឡើងលើ
ភ្នំពេញ:ជនសង្ស័យ២នាក់ជិះម៉ូតូមួយគ្រឿងមិនចាំម៉ាកបានលួចកាច់សោរកម៉ូតូនៅមន្ទីរពេទ្យមួយកន្លែងមិនបានសម្រេចត្រូវសន្តិសុខឃើញទាន់ប្រតាយប្រតប់គ្នា។ជនសង្ស័យដកកាំភ្លើងបាញ់១គ្រាប់ឡើងលើគំរាមដើម្បីរំដោះខ្លួន។ហេតុការណ៍នេះបានកើតឡើងនៅចំណុចមន្ទីរសម្រាកព្យាបាលសុខាទំនប់ថ្មីតាមបណ្ដោយផ្លូវ៣៧១ភូមិម័រសង្កាត់ដង្កោខណ្ឌដង្កោរកាលពីរសៀលថ្ងៃទី២៨ខែកក្កដាឆ្នាំ២០២០។ ម៉ូតូដែលជនសង្ស័យធ្វើសកម្មភាពកាច់សោមិនបានសម្រេចម៉ាកឌ្រីមសង់ស៊េរី២០១៩ពណ៌ខ្មៅពាក់ស្លាកលេខកណ្ដាល1AC4489ជារបស់ជនរងគ្រោះមកមើលប្រពន្ធសម្រាកព្យសបាលនៅមន្ទីរពេទ្យខាងលើ។ចំណែកជនសង្ស័យទាំងពីរនាក់ក្រោយពីប្រតាយប្រតប់ជាមួយសន្តិសុខមន្ទីរពេទ្យរួចក៏បាញ់មួយគ្រាប់ឡើងលើគំរាមរួចជិះម៉ូតូគេចខ្លួនបាត់ស្រមោលពីកន្លែងកើតហេតុ៕
ប្រើប្រាស់ឧបករណ៍T300PlusGNSSដែលចាប់ទិន្នន័យពីផ្កាយរណបដើម្បីវាស់វែងដីធ្លី
មណ្ឌលគិរី៖លោកឧបនាយករដ្ឋមន្ត្រី ជាសុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់,លោកវេងសាខុនរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ,លោក សាយសំអាល់រដ្ឋមន្ត្រីក្រសួងបរិសា្ថន។បានប្រជុំផ្សព្វផ្សាយនិងអនុវត្តផែនការចុះបញ្ជីដី,ការដោះស្រាយវិវាទដីធ្លី និងគាំទ្រការរៀបចំផែនការប្រើប្រាស់ដីនៅខេត្តមណ្ឌលគិរី។ កិច្ចប្រជុំនេះ ដោយមានការចូលរួមពីសំណាក់លោក ម៉ែន ង៉ុយ ប្រធានក្រុមប្រឹក្សាខេត្ត,លោក ស្វាយ សំអ៊ាងអភិបាលខេត្តមណ្ឌលគិរីនិងមន្ត្រីមន្ទីរអង្គភាពជុំវិញខេត្តរួមទាំងអាជ្ញាធរក្រុង/ស្រុក/ឃុំ/សង្កាត់ក្នុងខេត្តជាច្រើនរូបដែលធ្វើឡើងនៅសាលាខេត្តមណ្ឌលគិរីកាលពីព្រឹកថ្ងៃទី២៨ខែកក្កដាឆ្នាំ២០២០។ លោកឧបនាយករដ្ឋមន្ត្រី ជា សុផារ៉ា បានពាំនាំការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែននាយករដ្ឋមន្ត្រីនៃកម្ពុជាជូនដល់ថ្នាក់ដឹកនាំមន្ត្រីរាជការនិងប្រជាពលរដ្ឋទាំងអស់ក្នុងខេត្តមណ្ឌលគិរី។លោកឧបនាយករដ្ឋមន្ត្រីបានបញ្ជាក់ថាៈប្រធានបទសំខាន់នាពេលនេះមាន៖៥ចំណុចទី១.ការចុះបញ្ជីដីរដ្ឋ។ទី២.ការចុះបញ្ជីដីរបស់ប្រជាពលរដ្ឋទី៣.ការដោះស្រាយវិវាទនៅក្នុងខេត្តមណ្ឌលគិរីទី៤.ការចុះបញ្ជីដីសហគមន៍ជនជាតិដើមភាគតិចនិងទី៥.ការរៀបចំផែនការប្រើប្រាស់ដីនៅក្នុងខេត្តមណ្ឌលគិរី។ លោក ឧបនាយករដ្ឋមន្ត្រី បានឱ្យដឹងថា ក្រុមការងារអន្តរក្រសួងមានចំនួនសរុបប្រមាណ ៥៥០ នាក់ ។ក្នុងនោះក្រុមការងារវាស់វែងរបស់ក្រសួងរៀបចំដែនដីនគរូបនីយកម្មនិងសំណង់ប្រមាណ៣០០នាក់, ក្រសួងកសិកម្ម រុក្ខាប្រមាញ់ និងនេសាទ ៥០នាក់ និងក្រសួងបរិស្ថាន ប្រមាណ ២០០នាក់។ ដោយប្រើប្រាស់ឧបករណ៍T300PlusGNSSដែលមានភាពជាក់លាក់ខ្ពស់ក្នុងការវាស់វែងតាមរយៈការចាប់យកទិន្នន័យពីផ្កាយរណប ក្រុមការងារវាស់វែងរបស់ក្រសួងរៀបចំដែនដី នគរូបនីយកម្ម និងសំណង់នឹងធ្វើការវាស់វែងនិងចុះបញ្ជីដីរដ្ឋដែលនៅសេសសល់។តាមការចង្អុលបង្ហាញព្រំដីរបស់ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ដែលជាអាជ្ញាធរកាន់កាប់ដីរដ្ឋ។ វាស់វែងនិងប្រមូលទិន្នន័យដីដែលប្រជាពលរដ្ឋកាន់កាប់ជាក់ស្តែងក្នុងទីតាំងដីរដ្ឋ,ចុះបញ្ជីដីប្រជាពលរដ្ឋដែលកាន់កាប់និងអាស្រ័យផលយូរមកហើយដែលនៅសេសសល់នៅតាមភូមិនិងដីសហគមន៍ជនជាតិដើមភាគតិច ព្រមទាំងដោះស្រាយវិវាទដីធ្លី និងគាំទ្រការរៀបចំផែនការប្រើប្រាស់ដី។ សូមបញ្ជាក់ថា កាលពីថ្ងៃទី៣ ខែកក្កដា ឆ្នាំ២០២០ថ្មីៗនេះ នៅក្នុងកិច្ចប្រជុំពេញអង្គគណៈរដ្ឋមន្ត្រី សម្តេចតេជោហ៊ុនសែននាយករដ្ឋមន្ត្រីនៃកម្ពុជាបានបញ្ជាទៅក្រសួងបរិស្ថានក្រសួងកសិកម្មនិងក្រសួងរៀបចំដែនដីឱ្យកាត់ឆ្វៀលដីជូនប្រជាពលរដ្ឋដែលកំពុងរស់នៅអាស្រ័យផលក្នុងតំបន់អភិរក្សតំបន់សត្វព្រៃនិងតំបន់ការពារផ្សេងៗរបស់រដ្ឋ។ ទន្ទឹមនឹងការបញ្ជាឱ្យរៀបចំកាត់ឆ្វៀលដីជូនប្រជាពលរដ្ឋហើយនោះសម្តេចតេជោហ៊ុនសែនក៏បានបញ្ជាក់ពីលក្ខខណ្ឌត្រូវអនុវតមួយចំនួនផងដែរ។សម្តេចតេជោនាយករដ្ឋមន្ត្រីបានបញ្ជាក់ថាចំពោះពលរដ្ឋដែលកំពុងរស់នៅអាស្រ័យផលជាក់ស្តែងក្នុងតំបន់ដីរដ្ឋដូចបញ្ជាក់ខាងលើគឺហាមកាប់ឆ្ការទន្ទ្រានវាតទីយកដីបន្ថែមគឺមិនអនុញ្ញាត្តិជាដាច់ខាត។ ក្រៅពីកាត់ឆ្វៀលដីជូនប្រជាពលរដ្ឋទៅតាមទំហំរស់នៅជាក់ស្តែងគឺរដ្ឋនឹងបន្ថែមជូនផ្ទៃដី១០ភាគរយជាប្រយោជន៍រួមសម្រាប់សហគមន៍ប្រើប្រាស់ជាព្រៃរកអុសនិងជាជម្រកសត្វគោក្របីស៊ីស្មៅជាដើម៕ចាន់បុត្រ
រដ្ឋបាលខេត្តព្រះវិហារទទួលជួបពិភាក្សាជាមួយប្រតិភូរដ្ឋសភា
ព្រះវិហារ៖កាលពីព្រឹកថ្ងៃទី២៨ខែកក្កដាឆ្នាំ២០២០រដ្ឋបាលខេត្តព្រះវិហារដឹកនាំដោយលោកប្រាក់សុវណ្ណអភិបាលខេត្ត,លោកឡុងសុវណ្ណប្រធានក្រុមប្រឹក្សាខេត្តនិងមានការអញ្ជើញចូលរួមពីលោកសួសយ៉ារ៉ាអ្នកតំណាងរាស្ត្រមណ្ឌលព្រះវិហារ។ព្រមទាំងអភិបាលរងខេត្តលោកនាយករដ្ឋបាលសាលាខេត្តនិងមន្ទីរ.អង្គភាពពាក់ព័ន្ធ។ ក្រុមការងារខេត្តបានទទួលជួបពិភាក្សាជាមួយគណៈកម្មការផែនការវិនិយោគកសិកម្មអភិវឌ្ឍន៍ជនបទបរិស្ថាននិងធនធានទឹកនៃរដ្ឋសភា។ដឹកនាំដោយលោកឡូយសុផាតប្រធានគណៈកម្មការនៅក្នុងសាលប្រជុំរបស់សាលាខេត្ត។ កិច្ចពិភាក្សាការងារនាពេលនេះគឺក្នុងគោលបំណងសិក្សាស្វែងយល់ពីស្ថានភាពភូមិសាស្ត្រនិងប្រមូលព័ត៌មានមួយចំនួនពាក់ព័ន្ធនឹងវិស័យទទួលបន្ទុករបស់គណៈកម្មការអំពីប្រសិទ្ធភាពនៃការអនុវត្តន៍ច្បាប់នានា។ វឌ្ឍនភាពការងារបញ្ហាប្រឈមក៏ដូចជាពិនិត្យមើលពីភាពរីកចម្រើននិងជីវភាពរស់នៅរបស់ប្រជាពលរដ្ឋ។ជាពិសេសលើការងារផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន ធនធានទឹក និងឧតុនិយមផងដែរ៕ប៊ូ រ៉ា
បើកត្រាក់ទ័រភ្ជួរកិនចំមីនតោនផ្ទុះខ្ទេចត្រាក់ទ័រអ្នកបើកបរដាច់ជើងម្ខាង
បាត់ដំបង៖នៅភូមិតគ្រក់ឃុំត្រែងស្រុករតនៈមណ្ឌលខេត្តបាត់បងកាលពីរសៀលថ្ងៃទី២៧ខែកក្កដាឆ្នាំ២០២០មានគ្រោះថ្នាក់មួយដោយបុរសម្នាក់បើកត្រាក់ទ័រភ្ជួរដីធ្វើចម្ការកិនចំមីនតោនបណ្តាលឱ្យផ្ទុះឆេះនៅសល់តែគ្រោងឆ្អឹង។ចំណែកអ្នកបើកបរត្រាក់ទ័ររងរបួសធ្ងន់ដាច់ជើងម្ខាង។ ម្ចាស់ចម្ការបានប្រាប់សមត្ថកិច្ចដែលចុះទៅធ្វើកំណត់ហេតុថាដីចម្ការនេះគាត់ធ្លាប់ជួលឱ្យគេភ្ជួររាស់ដាំដំណាំជារៀងរាល់ឆ្នាំមិនដែលប៉ះគ្រាប់មីនអ្វីទេ។លុះឆ្នាំនេះពេលមានភ្លៀងធ្លាក់ទើបគាត់ជួលត្រាក់ទ័រមកភ្ជួររាស់ដីដើម្បីដាំស្វាយវិញ។ស្រាប់តែមានគ្រោះថ្នាក់ជាន់ចំមីនតោនផ្ទុះកក្រើកដីតែម្តង។ ជនរងគ្រោះត្រូវបានដឹកយកទៅសង្គ្រោះនៅមន្ទីរអ៊ីមេគស៊ិនស៊ីខេត្តបាត់ដំបងដោយរបួសធ្ងន់ធ្ងរពេកគ្រូពេទ្យបានសម្រេចកាត់ជើងចោលត្រឹមភ្លៅហើយក្លាយជាជនពិការ៕
សមត្ថកិច្ចចាប់ជនម្នាក់ពាក់ព័ន្ធញៀននៅតំបន់នេសាទសមុទ្រ
ខេត្តព្រះសីហនុ៖សមត្ថកិច្ចកងរាជអាវុធហត្ថបានចាប់ជនសង្ស័យម្នាក់ដែលពាក់ព័ន្ធគ្រឿងញៀនខណៈកំពុងប្រព្រឹត្ត នៅក្រុម២ភូមិ៤ឃុំទំនប់រលកស្រុកស្ទឹងហាវខេត្តព្រះសីហនុកាលពីរសៀលថ្ងៃទី ២៧ ខែកក្កដាឆ្នាំ២០២០។ កម្លាំងកងរាជអាវុធហត្ថស្រុកស្ទឹងហាវ បានឱ្យដឹងថាៈជនសង្ស័យ ឈ្មោះ ជឿន សីហា ហៅអាទិត្យ ភេទប្រុសអាយុ៣៤ឆ្នាំមុខរបរកម្មករស្នាក់នៅក្រុម១៣ភូមិ៤ឃុំទំនប់រលកស្រុកស្ទឹងហាវខេត្តព្រះសីហនុ។ប្រភពដដែលបន្តថា កម្លាំងបានដកហូតយកវត្ថុតាងរួមមាន៖១. ម្សៅសថ្លាចំនួន ១៤កញ្ជប់២.ទូរស័ព្ទដៃចំនួន០២គ្រឿង៣.កាំភ្លើងកែឆ្នៃចំនួន២ដើម៤.ដាវចំនួន១ដើម៥.ដបជក់ចំនួន១។ ៦.ដែកកេះចំនួន១ប្រអប់៧.កន្ទ្រៃចំនួន២៨.ទុយោ១ថង់៩.គ្រាប់កង់មួយចំនួន១០.ម៉ូតូ១គ្រឿងម៉ាក់AIRBIADEពណ៌ក្រហមគ្មានស្លាកលេខ។បច្ចុប្បន្នកម្លាំងកងរាជអាវុធហត្ថកំពុងសាងសំណុំរឿងបញ្ជូនទៅសាលាដំបូងផ្តន្ទាទោសតាមនីតិវិធី៕
សូមប្រយ័ត្នពីជំនន់ទឹកភ្លៀងសម្រាប់ទីទំទាបជាប់តំបន់ភ្នំ
ភ្នំពេញ៖ក្រសួនធនធានទឹកនិងឧតុនិយមជូនដំណឹងថាៈផ្នែកខ្លះនៃបណ្តាខេត្តនៅទីទំនាបជាប់ជួរភ្នំនិងផ្លូវទឹកសូមប្រុងប្រយ័ត្នចំពោះជំនន់ទឹកភ្លៀង។នៅលើផ្ទៃសមុទ្រអាចនឹងមានភ្លៀងច្រើននិងរលក សមុទ្របក់បោកខ្លាំងៗនៅអំឡុងពីថ្ងៃទី១ដល់ថ្ងៃទី៣ខែសីហាឆ្នាំ២០២០។ លោកចាន់យុត្ថាអ្នកនាំពាក្យនិងជារដ្ឋលេខាធិការក្រសួងធនធានទឹកនិងឧតុនិយមបានឱ្យដឹងនៅថ្ងៃទី២៨ខែកក្កដាឆ្នាំ២០២០ថាៈភ្លៀងរដូវវស្សាបន្តធ្លាក់រាយប៉ាយកាន់តែច្រើន។ជាពិសេសនៅតំបន់វាលទំនាបកណ្តាលនិងតំបន់ខ្ពង់រាបនិងទាំងនៅតំបន់ផ្ទៃរងទឹកភ្លៀងរបស់អាងទន្លេមេគង្គលើផងដែរ។ចាប់តាំងពីថ្ងៃនេះ(២៨កក្កដា)ដល់សប្តាហ៍ទី១នៃខែសីហា។ អ្នកនាំពាក្យក្រសួងជំនាញបាននិយាយឱ្យដឹងទៀតថាប្រទេសកម្ពុជាពេលនេះស្ថិតក្រោមឥទ្ធិពលនៃតំបន់សម្ពាធទាបដែលងាយមានភ្លៀងធ្លាក់ច្រើនបង្កជាជំនន់ទឹកភ្លៀងនៅតំបន់ភ្នំជាពិសេសតំបន់ជុំវិញភ្នំឱរ៉ាល់ក្នុងខេត្តកំពង់ស្ពឺ។ លោកចាន់យុត្ថាបន្តថាៈចាប់ពីខែសីហាទៅស្ថានភាពអាកាសធាតុជាទូទៅមានទំនោរទៅរកបាតុភូតឡានីណាពេញលេញដែលធ្វើឱ្យមានភ្លៀងធ្លាក់បន្តបន្ទាប់រហូតដល់ខែធ្នូនិងអាចមានភ្លៀងកក់ខែញឹកញាប់នៅក្នុងរដូវប្រាំងឆ្នាំ២០២១នេះបើយោងតាមការព្យាករអាកាសធាតុសម្រាប់រយៈពេលខាងមុខ។ ក្រសួងធនធានទឹកនិងឧតុនិយមនៅថ្ងៃទី២៨ខែកក្កដាឆ្នាំ២០២០បានជូនដំណឹងស្តីពីស្ថានភាពអាកាសធាតុសម្រាប់ពីថ្ងៃទី២៩កក្កដាដល់ថ្ងៃទី៤ខែសីហាឆ្នាំ២០២០ថាៈខ្យល់មូសុងនិរតីបក់ក្នុងកម្រិតបង្គួរមកលើកម្ពុជាខណៈប្រព័ន្ធសម្ពាធទាបបានអូសបន្លាយលើប្រទេសថៃឡាវនិងប្រទេសវៀតណាម។ ស្ថានភាពអាកាសធាតុដូចខាលើក្នុងសេចក្តីជូនដំណឹងបានសរសេរថាធ្វើឱ្យបណ្តាខេត្តនៅតំបន់វាលទំនាបកណ្តាលសីតុណ្ហភាពអប្បបរមាមានពី២៦ទៅ២៨អង្សាសេសីតុណ្ហភាពអតិបរមាមានពី ៣២ទៅ៣៤អង្សាសេ។ បណ្តាខេត្តនៅតំបន់ជួរភ្នំដងរ៉ែកនិងខ្ពង់រាបភាគឦសានសីតុណ្ហភាពអប្បបរមាមានពី២៤ទៅ២៦អង្សាសេ សីតុណ្ហភាពអតិបរមាមានពី៣០ទៅ៣២ អង្សាសេ។បណ្តាខេត្តនៅតំបន់មាត់សមុទ្រសីតុណ្ហ ភាពអប្បបរមា មានពី២៤ទៅ២៦ អង្សាសេ សីតុណ្ហភាពអតិបរមាមានពី ២០ទៅ៣២អង្សាសេ។ នៅក្នុងសេចក្តីជូនដំណឹងបានសរសេរទៀតថាអំឡុងពីថ្ងៃទី២៩កក្កដដល់ថ្ងៃទី៤ខែសីហាអាចនឹងមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើននៅបណ្តាខេត្តតំបន់វាលទំនាបកណ្តាលបណ្តាខេត្តនៅតំបន់ជួរភ្នំដងរែក និង ខ្ពង់រាប ភាគឦសានតែមានភ្លៀងធ្លាក់ពីតិចទៅបង្គួរសម្រាប់បណ្តាខេត្ត នៅតំបន់មាត់ សមុទ្រ។ ក្នុងសេចក្តីជូនដំណឹងបានបញ្ជាក់ថាចាប់ពីថ្ងៃទូ៣១ខែកក្កដាដល់ថ្ងៃទី៤ខែសីហាឆ្នាំ២០២០ផ្នែកខ្លះនៃបណ្តាខេត្តនៅទីទំនាបជាប់ជួរភ្នំនិងផ្លូវទឹកសូមប្រុងប្រយ័ត្នចំពោះជំនន់ទឹកភ្លៀង។ឯនៅលើផ្ទៃសមុទ្រនឹងមានភ្លៀងច្រើននិងរលកសមុទ្របក់បោកខ្លាំងៗនៅអំឡុងពីថ្ងៃទី១ដល់ថ្ងៃទី៣ខែសីហា។ ចំណែកស្ថានភាពទឹកទន្លេវិញមកដល់ថ្ងៃទី២៨ខែកក្កដាឆ្នាំ២០២០នៅចតុមុខទើបមានកម្ពស់២.៥៦ម៉ែត្រទាបជាងកម្ពស់ទឹកមធ្យមច្រើនឆ្នាំ៦.៦១ម៉ែត្របើធៀបរយៈពេលដូចគ្នា។ឯទឹកបឹងទន្លេសាបទើបមានកម្ពស់០.៦៦ម៉ែត្រ ដែលនៅ ឆ្នាំធម្មតារយៈពេលដូចគ្នានេះទឹកមានកម្ពស់៣ម៉ែត្រ។ ទឹកទន្លេមេគង្គឆ្នាំនេះត្រូវបានគេមើលឃើញថាជន់ឡើងយឺតជាងពេលធម្មតាដល់ទៅពីរខែធ្វើឱ្យបឹងទន្លេសាប ចូលដល់ពាក់កណ្តាលរដូវវស្សាទៅហើយ នៅតែអត់ទឹក។ទឹកជន់ឡើងយឺតបែបនេះ ធ្វើឱ្យប៉ះពាល់ដល់ការពងកូននិងការ លូតលាស់របស់មច្ឆជាតិយ៉ាងធ្ងន់ធ្ងរ៕ខុន ស្ទឹងមោងមានទឹកពេញពោបន្ទាប់ពីភ្លៀងធ្លាក់ច្រើនកាលពីយប់ថ្ងៃទី២៧កក្កដា
បារាំងប្រគល់យន្តហោះប្រយុទ្ធ៥គ្រឿងដំបូងឱ្យទៅឥណ្ឌា
អន្តរជាតិ៖យន្តហោះប្រយុទ្ធទំនើបរបស់បារាំងម៉ាកRafaleចំនួន៥គ្រឿងដំបូង ដែលឥណ្ឌាទិញក្នុងតម្លៃរាប់ពាន់លានដុល្លារត្រូវបានបារាំងបញ្ជូនទៅឱ្យឥណ្ឌាកាលពីថ្ងៃចន្ទទី២៧កក្កដាឆ្នាំ២០២០សម្រាប់ការប្រើប្រាស់ជាបន្ទាន់ចំពេលមានភាពតានតឹងព្រំដែនជាមួយចិន។ កិច្ចព្រមព្រៀងដែលមានតំលៃ៩,៤ពាន់លានដុល្លារ ត្រូវបានញាំញីដោយការចោទប្រកាន់ថាជាប់ពាក់ព័ន្ធក្នុងអំពើពុករលួយ។តែនាយករដ្ឋមន្ត្រី ណារេនដ្រា ម៉ូឌី បានច្រានចោលការចោទប្រកាន់នេះ។ យន្តហោះដែលផលិតឡើងដោយក្រុមហ៊ុនDassault Aviationត្រូវបើកដោយអាកាសយានិកមកពីកងកម្លាំងអាកាសឥណ្ឌា ។ពួកវាបានចេញដំណើរពីក្រុងមេរីញ៉ាច់នៅបារាំងខាងត្បូងហើយត្រឹមថ្ងៃពុធទី២៩កក្កដា ពួកវាអាចនឹងទៅដល់មូលដ្ឋានទ័ពអាកាស Ambala នៅឥណ្ឌាខាងជើង ចម្ងាយប្រមាណ២០០គីឡូម៉ែត្រពីព្រំដែនចិនឬប៉ាគីស្ថាន។ ពួកវានឹងចាក់សាំងបន្ថែមនៅកណ្តាលអាកាស៤ដងក្នុងពេលហោះនិងក៏ត្រូវឈប់នៅក្រុង អាល់ ដាហ្វ្រា ក្នុងប្រទេសអារ៉ាប់រួមអេមីរ៉ាត កន្លែងដែលបារាំងមានតាំងមូលដ្ឋានទ័ពអាកាសមួយ។ ពួកវានឹងត្រូវអមដំណើរដោយយន្តហោះចាក់សាំងA330 Phenix MRTT ពីរគ្រឿងទៅពីកងទ័ពអាកាសបារាំង ដោយយន្តហោះមួយៗមានដឹកឧបករណ៍ជំនួយដង្ហើម៧០គ្រឿង ឧបករណ៍ធ្វើតេស្តិ៍រកវីរុសចំនួន១សែនសម្រាប់ ព្រមទាំងអ្នកជំនាញការសុខភាព១០ក្រុមដើម្បីគាំទ្រឥណ្ឌានៅក្នុងការប្រយុទ្ធនឹងជំងឺកូវីដ១៩។ ឥណ្ឌាបានបញ្ជាទិញយន្តហោះប្រភេទនេះចំនួន៣៦គ្រឿងកាលពីឆ្នាំ២០១៦ ហើយការប្រគល់វាឱ្យឥណ្ឌានឹងត្រូវបញ្ចប់នៅឆ្នាំ២០២២។យន្តហោះទំនើបនេះ ត្រូវរដ្ឋាភិបាលក្រុងញូវដេល្លីរង់ចាំទទួលយ៉ាងអន្ទះសារ ដោយសារតែចង់ធ្វើឱ្យប្រសើរកងកម្លាំងយន្តហោះចាស់ៗរបស់ខ្លួន ចំពេលមានភាពតានតឹងព្រំដែនជាមួយចិននិងប៉ាគីស្ថាន៕សំណាង