ព័ត៌មានសង្គម

ព្រះវិហារ៖អភិបាលខេត្តព្រះវិហារលោក គីម រិទ្ធី ព្រឹកថ្ងៃទី១ ខែមិថុនាឆ្នាំ២០២៣នេះ  បានចុះជួបសំណេះសំណាលនិងបើកយុទ្ធនាការកាត់ឈ្វៀលដីជូនប្រជាពលរដ្ឋនៅភូមិអភិវឌ្ឍន៍ ស្ថិតក្នុងសង្កាត់ប៉ាលហាល ក្រុង/ខេត្តព្រះវិហារដោយមានការចូលរួមពីអាជ្ញាធរនិងប្រជាពលរដ្ឋជាម្ចាស់ក្បាលដីដែលត្រូវកាត់ឈ្វៀលជាច្រើនរូប។លោក គីម រិទ្ធី អភិបាលខេត្តបានឱ្យដឹងថា នៅភូមិអភិវឌ្ឍន៍នេះកាលពីដើមគឺស្ថិតនៅក្នុងគម្រោងព្រៃអភិវឌ្ឍន៍របស់បរិស្ថាន។តែលោកបានស្នើសុំរាជរដ្ឋាភិបាល និងបានទទួលការអនុញាតដើម្បីកាត់ឈ្វៀលដីចេញពី គម្រោងដីព្រៃរបស់បរិស្ថាន និងវាស់វែងចេញបណ្ឌកម្មសិទ្ធជូនប្រជាពលរដ្ឋ ដែលស្ថិតក្នុងតំបន់ភូមិអភិវឌ្ឍន៍នេះ។អភិបាលខេត្តក៏បានសំណូមពរដល់ប្រជាពលរដ្ឋទាំងអស់មេត្តាចុះកំណត់ និងដាក់ព្រំឱ្យបាន ច្បាស់លាស់ និងសហការជាមួយក្រុមការងារដើម្បីងាយស្រួលក្នុងការចុះវាស់វែង។ បន្ថែមពីនេះ សូមបងប្អូនត្រូវចេះយោគយល់អធ្យាស្រ័យគ្នា ដែលមានព្រំដី ជាប់គ្នាដើម្បីកុំឱ្យមានបញ្ហាក្នុងការវាស់វែង បើព្រំដីមានបញ្ហាគឺក្រុមការងារមិនអាចវាស់វែងជូនបាននោះទេ៕ញ៉ែមសុផល

ភ្នំពេញ​៖អ្នកគ្រូ​បង្រៀន​នៅ​វិទ្យាល័យ​ម្នា​ក់ត្រូវក្រុមគ្រួសារបានអះអាងថា បានខ្ចីលុយតាមអនឡាញចំនួន១.៥០០ដុល្លារ ហើយបំណុលនោះដោះស្រាយមិនចេញ​សម្រេចចិត្តចងកសម្លាប់ខ្លួន។​ហេតុការណ៍​​​នេះ​បានកើតឡើងនៅ​ផ្សារ​គីឡូម៉ែត្រ​លេខ​៤ សង្កាត់​ទឹកល្អក់​២ ខណ្ឌទួលគោក កាលពីរសៀលថ្ងៃទី២៩ ខែឧសភា។ស្ត្រីដែល​ធ្វើអត្តឃាត​អាយុ​៤៤​ឆ្នាំ ជា​គ្រូបង្រៀន​នៅ​វិទ្យាល័យមួយ​ រស់នៅ​ផ្ទះ​កន្លែងខាងលើ​។អត្តឃាតជនបានយកក្រមាចងកភ្ជាប់ទៅនឹងបង្កាន់ដៃឡៅតឿបន្ទាប់ពីត្រឡប់មកពីសាលាសង្កាត់ដោះស្រាយរឿងបំណុល។​ក្រុម​គ្រួសារ​បានឱ្យ​ដឹង​ថា កន្លង​មក​អ្នកគ្រូ​បាន​ជំពាក់​លុយ​គេ​តាម​អន​ឡាញ​ចំនួន​១.៥០០​ដុល្លារ​បងប្អូនបាន​ជួយ​ជា​ច្រើន​ដង។​តែ​នៅជាប់បំណុលគេ​ទៀតហើយ​ម្ចាស់បំណុល​តែង​មក​ទារ​លុយ​ជា​ញឹកញាប់​ថែមទាំងគំរាមកំហែងទៀត​ផង​។ប្រភពបានបន្តថា ដោយសារ​តែ​​បំណុលកាលពីថ្ងៃទី២ ខែឧសភាអ្នកគ្រូបាន​ព្យាយាម​យក​កាំបិត​អារ​ដៃ​ និង​ចាក់​ពោះ​ប៉ង​សម្លាប់​ខ្លួនតែ​ត្រូវ​បាន​ជួយ​ទាន់​។នៅ​ថ្ងៃ​ទី​២៨ ខែឧសភា​អ្នកគ្រូ​ព្យាយាម​ទិញ​ថ្នាំ​កណ្តុរ​មក​ផឹក​សម្លាប់​ខ្លួន​​តែ​មិន​បាន​សម្រេច។លុះ​ថ្ងៃ​ទី​២៩ ខែឧសភា​អ្នកគ្រូបានចងកសម្លាប់ខ្លួនស្លាប់តែម្តង៕​    

ព្រះវិហារ៖បិទវគ្គហ្វឹកហ្វឺនបំប៉នការងារ ការរក្សាសណ្តាប់ធ្នាប់ ដល់នាយ នាយរងកងរាជអាវុធហត្ថខេត្តព្រះវិហាឆមាសទី១ឆ្នាំ២០២៣។ ពិធីនេះក្រោមអធិបតីភាពឯកឧត្តម គីម រិទ្ឋី អភិបាលខេត្តព្រះវិហារនៅរសៀថ្ងៃទី៣០ ខែឧសភានេះដោយមានការចូលរួមពីលោកកង សៅគុណ មេបញ្ជាការកងរាជអាវុធហត្ថខេត្តនិងមន្ត្រីចំណុះខេត្តខេត្តព្រះវិហារ ។លោកកង សៅគុណបានថ្លែងថា ដើម្បីលើកកម្ពស់សមត្ថភាពយល់ដឹងបន្ថែមអំពីតួនាទី ភារកិច្ច លើការបំពេញបេសកកម្មទាំងចំណេះដឹង ចំណេះធ្វើលើមុខវិជ្ជាយោធា មុខវិជ្ជាជំនាញអាវុធហត្ថ ។ធ្វើឱ្យនាយទាហាននាយទាហានរងកងរាជអាវុធហត្ថខេត្តព្រះវិហារ មានស្មារតីទទួលខុសត្រូវ គោរពច្បាប់ ក្រមសីលធម៌ គុណធម៌មានមនសិការការងារនឹងអត្តចរឹតស្លូតត្រង់ ដើម្បីពង្រឹងសមត្ថភាពដឹកនាំបញ្ជា អនុវត្តន៍ច្បាប់ប្រកបទៅដោយប្រសិទ្ឋភាពនឹងសម្រេចបានជោគជយ័គ្រប់ភារកិច្ចជូនជាតិមាតុភូមិ។លោកគីម រិទ្ឋ បានថ្លែងការកោតសរសើរចំពោះកងរាជអាវុធហត្ថខេត្តព្រះវិហារ ដែលបានបំពេញតួនាទីភារកិច្ចបានល្អប្រសើរជូនជាតិមាតុភូមិ។ អភិបាលខេត្តបានបន្តថា ដាច់ខាតការពារឱ្យបាននូវសុខសន្តិភាព កងកម្លាំងប្រដាប់អាវុធ បង្កើតលើងក្នុងគោលបំណង ការពាររក្សាសណ្តាប់ធ្នាប់សង្គម ការពារជាតិ សាសនាព្រះមហាក្សត្រ ការពាររាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត ការពារដ្ឋធម្មនុញ ការពារភាពសុខសាន្តជូនប្រជាពលរដ្ឋ កងកម្លាំងប្រដាប់អាវុធ។ ក្រៅពីភារកិច្ចស្នូល នៅមានភារកិច្ចសំខាន់ជាច្រើនទៀត ដូចជាជួយប្រជាពលរដ្ឋរងគ្រោះដោយគ្រោះធម្មជាតិ កន្លងមកកម្លាំងរបស់យើងបានជួយបង្កបង្កើនផលប្រជាពលរដ្ឋដែលខ្វះកម្លាំងពលកម្មជាដើម ៕សៅវ៉ាន់ឌី      

ភ្នំពេញ​៖​កម្លាំងនគរបាលខណ្ឌពោធិ៍សែនជ័យ បានបង្ក្រាបក្រុមប្លន់ម៉ូតូនិងអ្នកទទួលផលចោរកម្មសរុបចំនួន៩នាក់ បញ្ជូនទៅតុលាការចាត់ការតាមច្បាប់។ សមត្ថកិច្ចបានឱ្យដឹងថា ជនសង្ស័យ៩នាក់ត្រូវកម្លាំងជំនាញស្រាវជ្រាវចាប់ខ្លួនបានជាបន្តបន្ទាប់ ក្រោយពីពួកគេប្លន់យកម៉ូតូពីជនរងគ្រោះបានសម្រេចនៅផ្លូវ38K ភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ កាលពី​រំលងអធ្រាត្រចូលថ្ងៃទី២៦​ ខែឧសភា​។ជនរងគ្រោះឈ្មោះស័យ្យ​ ពន្លឺ​ អាយុ២៦ឆ្នាំ​មុខរបរដឹកអីវ៉ាន់អនឡាញ​ នៅភូមិសាមគ្គី៣​ ខណ្ឌពោធិ៍សែនជ័យ​។ក្រោយ​ពី​មាន​ករណី​កាប់​វាយ​ប្លន់​យក​ម៉ូតូ​រួចមកកម្លាំង​ខណ្ឌ​ជាមួយ​នគរបាលប៉ុស្តិ៍​ បាន​ស្រាវជ្រាវ​​ចាប់​​មុខ​សញ្ញា​និង​បក្ខពួក​បានចំនួន៥នាក់​ ​ស្ថិតនៅ​ភូមិ​ចម្ការ​ឪឡឹក​២សង្កាត់​កាកាប​ទី​២ខណ្ឌ​ពោធិ៍​សែនជ័យ។បន្ទាប់មកតាមចាប់បក្ខពួក៣នាក់ទៀត​ នៅសង្កាត់​ក្រាំង​ធ្នង់​ខណ្ឌ​សែនសុខ​។​ រហូតមកដល់ព្រឹកថ្ងៃទី៣០​ ខែឧសភា​នេះបន្តចាប់អ្នកទទួលទិញផលចោរកម្មម្នាក់ទៀតនិងដកហូតម៉ូតូមួយគ្រឿង។បច្ចុប្បន្ន​ជនសង្ស័យត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅតុលាការ៕

ភ្នំពេញ៖ស្ត្រីម្នាក់ចេញពីកន្លែងហូបអាហាររួចក៏ដើរសំដៅរថយន្តវិញ ត្រូវចោរបានជិះម៉ូតូមកឆក់កាបូបលុយនិងសម្ភារមានតម្លៃយកទៅបាត់។ ករណីនេះកើតនៅផ្លូវព្រះមុន្នីវង្ស កែងផ្លូវ ២៤០ ក្នុងសង្កាត់បឹងរាំង ខណ្ឌដូនពេញកាលពី ម៉ោង៣ទៀបភ្លឺថ្ងៃទី៣០ ខែឧសភា ។ស្ត្រីរងគ្រោះបានឱ្យដឹងថា មុនកើតហេតុនាងបានចេញពីកន្លែងហូបអាហាររួចក៏ដើរសំដៅរថយន្ត។ពេលនោះស្រាប់តែមានចោរម្នាក់មាឌធំ ជិះម៉ូតូម៉ាកHonda click160 ពណ៌ខ្មៅ មកឆក់យកកាបូបពីដៃនាងបានសម្រេច រួចបើករត់គេចខ្លួនបាត់តាមផ្លូវលេខ៤២។ភ្លាមនោះស្ត្រីរងគ្រោះ បានឱ្យអ្នកជិតខាងជួយរាយការណ៍ប្រាប់សមត្ថកិច្ចផង។ក្រោយមកបន្តិចសមត្ថកិច្ចបានមកដល់ ក៏បាននាំទៅដាក់ពាក្យបណ្តឹងនៅប៉ុស្តិ៍បឹងរាំង ដើម្បីកំណត់មុខសញ្ញាជនសង្ស័យខាងលើ យកមកចាត់ការតាមច្បាប់៕

ភ្នំពេញ៖តុលាការភ្នំពេញកាលពីល្ងាចថ្ងៃទី២៨ ខែឧសភាបានឃុំខ្លួនជនសង្ស័យដាក់ពន្ធនាគារប ពីបទប្រើកាំបិតចុងស្រួចចាក់សម្លាប់មន្ត្រីនគរបាលម្នាក់នៅបុរីកីឡាជិត១ឆ្នាំមុន។  ករណីជនសង្ស័យបានប្រព្រឹត្ត នៅ​ភូមិទ្រុងមាន់​ សង្កាត់អូបែកក្អម​ ខណ្ឌសែនសុខ​ កាលពីថ្ងៃទី៧ ខែកក្កដាឆ្នាំ២០២២កន្លងទៅ។លុះដល់រសៀលថ្ងៃទី២៥ ខែឧសភាឆ្នាំ២០២៣ត្រូវកម្លាំងនគរបាលក្រសួងមហាផ្ទៃស្រាវជ្រាវទើបចាប់ជនសង្ស័យបាន។នៅថ្ងៃទី២៥ ខែឧសភាឆ្នាំ២០២៣ កម្លាំងបានបញ្ជូនជនដៃដល់ទៅតុលាការដើម្បីចាត់ការតាមច្បាប់។ សមត្ថកិច្ចបានឱ្យដឹងដោយរំលឹកថា កាលពីថ្ងៃទី៧ ខែកក្កដាឆ្នាំ២០២២ ជនល្មើសឈ្មោះ សាន ចាន់គឹមហុង អាយុ២២ឆ្នាំបានប្រើកាំបិតចុងស្រួចចាក់សម្លាប់មន្ត្រីនគរបាលម្នាក់ឈ្មោះ យឺន សំណាង ហៅសំណាង អាយុ ៥៦ឆ្នាំ។ ក្រោយប្រព្រឹត្តអំពើឃាតកម្មរួច ជនដៃដល់បានរត់គេចខ្លួនបាត់។ក្រោយមកកម្លាំងក្រសួងមហាផ្ទៃបានស្រាវជ្រាវចាប់ជនសង្ស័យឈ្មោះ សាន ចាន់គឹមហុង ពីបទឃាតកម្មតាមដីកាបង្គាប់ឱ្យចាប់ខ្លួនលេខ១៤៨៧“ក១”.ដ.ច.ន ចុះថ្ងៃទី១៥ ខែធ្នូឆ្នាំ២០២២របស់ចៅក្រុមស៊ើបសួរតុលាការភ្នំពេញ។បច្ចុប្បនតុលាការបានឃុំខ្លួនជនសង្ស័យរូបនេះដាក់ពន្ធនាគារបណ្តោះអាសន្នរង់ចាំបើកសវនាការពេលក្រោយ៕