សន្តិសុខ

ស្វាយរៀង៖ប្រជាពលរដ្ឋបានប្រទះឃើញបុរសម្នាក់ ស្លាប់ក្នុងទឹកស្រែជាមួយមូតូមួយគ្រឿង។ហេតុការណ៍បង្កការភ្ញាក់ផ្អើលនេះបានកើតឡើងលើផ្លូវក្រួសក្រហម ស្ថិតក្នុងភូមិកណ្ដាល ឃុំគ្រួស ស្រុកស្វាយជ្រំ ខេត្តស្វាយរៀង កាលពីថ្ងៃទី២៧ ខែវិច្ឆិកា។សមត្ថកិច្ចបានឱ្យដឹងថា បុរសដែលបាត់បង់ជីវិតឈ្មោះ មឿង សុវណ្ណដារ៉ា អាយុ២១ឆ្នាំនៅភូមិកណ្ដាល ឃុំគ្រួស ស្រុកស្វាយជ្រំ ខេត្តស្វាយរៀង។ម៉ូតូម៉ាកហុងដា​ផ្លាកលេខភ្នំពេញ1GJ-7807។ បន្ទាប់ពីទទួលព័ត៌មានភ្លាម សមត្ថកិច្ចស្រុកជាមួយនគរបាលប៉ុស្តិ៍រដ្ឋបាលឃុំនិងគ្រូពេទ្យ បានចុះពិនិត្យដោយបញ្ជាក់ថា សពស្លាប់ដោយគ្រោះថ្នាក់ចរាចរណ៍។ជនរងគ្រោះទំនងបើកម៉ូតូក្នុងល្បឿនលឿន ក៏រេចង្កូតដួលបោកក្បាលចូលទឹកស្រែតែម្ដង។ព្រោះលើដងខ្លួនមិនមានស្នាកស្នាមអ្វីគួរឱ្យកត់សម្គាល់ជារឿងឃាតកម្មទេ។ក្រោយធ្វើកោសល្យវិច័យរួច សមត្ថកិច្ចបានប្រគល់សពឱ្យក្រុមគ្រួសារយកទៅធ្វើបុណ្យ៕  

សៀមរាប​៖តាមសេចក្តីរាយការណ៍​បឋមបានឱ្យដឹងថា ករណីរថយន្តដឹកក្រុមឆៃយ៉ាំបានបើកចុះចំណោទដ៏ខ្ពស់ក៏ធ្លាក់ពីលើភ្នំគូលែន បណ្តាលឱ្យមនុស្ស៦នាក់ស្លាប់ និងរងរបួសជាង១០នាក់។ហេតុការណ៍នេះបានកើតឡើង នៅស្រុកស្វាយលើ ខេត្តសៀមរាប កាលពីល្ងាចថ្ងៃទី២៧ ខែវិច្ឆិកា។មន្ត្រីនគរបាលស្រុកស្វាយលើបានឱ្យដឹងថា គ្រោះថ្នាក់ចរាចរណ៍កើតឡើងខ្លួនឯង ដោយមានរថយន្តដឹកក្រុមឆៃយ៉ាំ មកពីបុណ្យកឋិននៅវត្តលើភ្នំគូលែន។ពេលកំពុងបើកចុះចំណោតខ្លាំងក៏ធ្លាក់ចេញពីផ្លូវមកក្រោម បណ្តាលឱ្យមនុស្សស្លាប់និងរបួសជាច្រើននាក់។ ក្នុងនោះ​ជនរងគ្រោះដែលស្លាប់ប្រុស៤នាក់ និងស្រី២នាក់។ ចំណែកអ្នករងរបួសធ្ងន់មានប្រមាណជាង១០នាក់។ភ្លាមៗនោះសមត្ថកិច្ចមិនទាន់បានបញ្ជាក់ពីអត្តសញ្ញាណជនរងគ្រោះ និងមូលហេតុនៃការធ្លាក់រថយន្តនៅឡើយទេ ព្រោះកម្លាំងកំពុងរវល់ជួយអន្តរាគមន៍ដឹកជញ្ជូនជនរងគ្រោះទៅមន្ទីរពេទ្យដើម្បីសង្គ្រោះបន្ទាន់៕    

ភ្នំពេញ៖កម្លាំងនគរបាលខណ្ឌពោធិ៍សែនជ័យ បានឃាត់ខ្លួនមន្ត្រីយោធាម្នាក់ ករណីប្រើពិលវាយសន្តិសុខ បណ្តាលឱ្យរយះក្បាលហូរឈាមស្រោចខ្លួន និងបានកសាងសំណុំរឿងនាំខ្លួនទៅតុលាការ កាលពីថ្ងៃទី២៧ ខែវិច្ឆិកា។រូបភាព៖របស់នគរបាល មន្ត្រីនគរបាលខណ្ឌបានឱ្យដឹងថា កម្លាំងជំនាញបានឃាត់ខ្លួនមន្ត្រីយោធាម្នាក់ពាក់ព័ន្ឋករណីយកពិលវាយបុរសសន្តិសុខម្នាក់ បណ្តាលឱ្យរយះក្បាលហូរឈាមពេញខ្លួន។ជាមួយនោះជនបង្កបានទាមទារឱ្យ ជនរងគ្រោះសងថ្លៃពិលរបស់គេថែមទៀត។ប្រភពដដែលបានបន្តថា មន្ត្រីយោធារូបនោះឈ្មោះ ហ៊ូ សុធា អាយុ៥២ឆ្នាំស្នាក់នៅភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ។ចំណែកជនរងគ្រោះឈ្មោះ អ៊ុម កួក អាយុ៤៧ឆ្នាំជាសន្តិសុខ យាមប្រចាំការនៅច្រកចូលបុរីពិភពថ្មី ត្រពាំងថ្លឹង ជាប់ធានាគារ ABA ស្ថិតក្នុងភូមិត្រពាំងថ្លឹង៤ សង្កាត់ចោមចៅទី១។ មុនកើតហេតុមានរថយន្តម៉ាកតូយូតាធុនរ៉ា ផ្លាកលេខភ្នំពេញ2BF-1127 បើកបរដោយបុរសម្នាក់ស្ថិតក្នុងស្ថានភាពស្រវឹង ក៏បុករបងហើយឈប់រថយន្តប្រុងដើរចេញ។ភា្លមនោះបុរសសន្តិសុខបានសួរនាំត្រូវមន្ត្រីយោធាស្លៀកពាក់ស៊ីវិល វាយក្បាលសន្តិសុខមួយពិលឱ្យរយះហូរឈាមតែម្តង។ បន្ទាប់មកសមត្ថកិច្ចបានចុះអន្តរាគមន៍ ត្រូវមន្ត្រីយោធារូបនោះស្រែកជេរប្រមាទ និងគំរាមបាញ់ទៀតផង។ប៉ុន្តែទោះយ៉ាងណាជនបង្ក ត្រូវសមត្ថកិច្ចឃាត់ខ្លួន ហើយកសាងសំណុំរឿងបញ្ជួនបន្តតាមនីតិវិធី៕      

ភ្នំពេញ៖តាមការបង្ហោះសារលើបណ្តាញសង្គម ហ្វេសប៊ុករបស់អ្នកនាង អម្ពរទេវី ត្រូវជាអតីតភរិយា អតីតតារាសម្តែងក្នុងខ្សែភាពយន្ត អំឡុងទសវត្សទី៨០-៩០ លោកពេជ្រ ភារុណ ថាបានទទួលមរណភាព។ ក្រោយមានដំណឹងថា​ លោកពេជ្រ ភារុណ អតីតតារាសម្តែងបានទទួលមរណភាព ក្រុមគ្រួសារ មិត្តភក្តិ និងអ្នកគាំទ្រ កាលពីលោកនៅសម្តែងខ្សែភាពយន្ត អំឡុងទសវត្សទី៨០-៩០នោះ បានរន្ធត់និងស្លុតចិត្តខ្លាំងណាស់ ព្រោះសោកស្តាយនិងអាណិតស្រណោះបំផុត។តាមការបង្ហោះសាររបស់អ្នកនាង អម្ពរទេវី បានបង្ហោះសារមុននេះ ខណៈដែលអ្នកសិល្បៈជាច្រើនបានបង្ហាញអារម្មណ៍សោកស្តាយ និងមិនគួរជឿដែលអតីតតារាសម្តែងរូបនេះបានបាត់មុខពីសិល្បៈជាយូរមកនេះ។ប៉ុន្តែក្នុងសាររបស់អ្នកនាង អម្ពរទេវីមិនបានបញ្ជាក់ថា លោកពេជ្រ ភារុណស្លាប់ដោយអ្វីទេ។ពិធីបុណ្យសពនៃអតីតតារាសម្តែង និងជាម្ចាស់ហាងកាត់ដេរសម្លៀកបំពាក់ ដ៏ល្បីឈ្មោះកាលពីរាប់ទសវត្សរ៍មុនរូបនេះ ត្រូវបានធ្វើឡើងនៅវត្តទួលអស់លោក ក្នុងខណ្ឌឬស្សីកែវដោយបូជាភ្លាមៗព្រោះមានត្រឹមតែសាច់ញាតិ៣ទៅ៤នាក់ចូលរួមប៉ុណ្ណោះ។ ដោយកូនប្រុសស្រីរបស់លោកកំពុងរស់នៅសហរដ្ឋអាមេរិក។គួរបញ្ជាក់ដែរថា លោកពេជ្រ ភារុណ ត្រូវបានគេចាត់ទុកថាជាតារាសម្តែង ដែលស្ថិតក្នុងជួរតារាល្បីៗឯទៀតដូចជា លោកទេពរិនដារ៉ូ-លោកខៃ ប្រសិទ្ធ-យុត្ថារ៉ាឆានី-ហមឈរ៉ា និងយសបូវណ្ណៈជាដើម កាលអំឡុងដែលខ្សែភាពយន្តខ្មែរ កំពុងទទួលបានការគាំទ្រពីទស្សនិកជនក្នុងទសវត្សទី៨០-៩០។ ពេលនេះលោកពេជ្រ ភារុណ អាចស្ថិតក្នុងវ័យប្រប្រមាណជាជិត៧០ឆ្នាំ។ លោកពេជ្រ ភារុណ គេសង្កេតគ្មានវត្តមានក្នុងខ្សែភាពយន្តខ្មែរនាសម័យនេះជាយូរមកហើយ។ ខណៈតារាជើងចាស់មួយចំនួននៅតែបន្តបង្ហាញមុខ តាមកញ្ចក់ទូរទស្សន៍នៅឡើយ។ តែទោះជាយ៉ាងណាលោកធ្លាប់បន្សល់ទុកស្នាដៃសម្តែងជាច្រើន ដក់ជាប់ក្នុងដួងចិត្តទស្សនិកជនខ្មែរស្ទើរគ្រប់រូប៕

ព្រះសីហនុ៖កម្លាំងអាវុធហត្ថខេត្តព្រះសីហនុ កាលពីថ្ងៃទី២៦ ខែវិច្ឆិកាបានស្រាវជ្រាវឈានដល់ចាប់ជនសង្ស័យចំនួន១៧នាក់។ក្រុមនេះពាក់ព័ន្ធករណីប្រើអាវុធខុសច្បាប់និងគ្រឿងញៀន នៅស្រុកកំពង់សីលា និងក្រុងព្រះសីហនុ ហើយត្រូវបានបញ្ជូនទៅតុលាការ។សមត្ថកិច្ចបានឱ្យដឹងថា កម្លាំងអាវុធហត្ថខេត្តផ្នែកជំនាញប្រឆាំងគ្រឿងញៀន បានស្រាវជ្រាវ ឈានដល់ការបង្ក្រាបបទល្មើស ដោយចាប់ក្រុមជនសង្ស័យប្រុសស្រីចំនូន១៧នាក់ និងវត្ថុតាងជាច្រើន។ក្នុងនោះមានម្សៅសថ្លាចំនួន២៨កញ្ចប់-ទូរសព្ទ១២គ្រឿង-ដបជក់៦-បារីអេឡិចត្រូនិច៤កញ្ចប់-ជញ្ជីងថ្លឹងគ្រឿងញៀនចំនួន៣-ដាវ១-ម៉ូតូ៣គ្រឿង-អាវុធខ្លីកែច្នៃ១ដើម-បង់១មានគ្រាប់ចំនួន១០គ្រាប់ និងថង់វេចខ្ចប់គ្រឿងញៀន។បន្ទាប់ពីឃាត់ខ្លួននិងសាកសួររួចរាល់ កម្លាំងអាវុធហត្ថខេត្តបានកសាងសំណុំរឿងបញ្ជូនជនសង្ស័យទាំង១៧នាក់ ជាមួយវត្ថុតាងទៅតុលាការខេត្តព្រះសីហនុ ដើម្បីចាត់ការតាមច្បាប់៕      

បាត់ដំបង​៖​ភ្លើងបានឆេះផ្ទះចំនួន៣ខ្នង ជាមួយទ្រព្យសម្បតិ្តអស់គ្មានសល់។គ្រោះអគ្គិភ័យនេះបានកើតឡើងនៅក្រុមទី១០ ភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង កាលពីល្ងាចថ្ងៃទី២៦ ខែវិច្ឆិកា។មន្ត្រីនគរបាល​​បានឱ្យដឹងថា​ ផ្ទះដែលរងការខូចខាតចំនួន៣ខ្នងនោះ ម្ចាស់ឈ្មោះ រីចន្ធី ភេទស្រី អាយុ៥៥ឆ្នាំ។ផ្ទះទំហំ៥មគុណ៧ម សង់ពី​ឈើ​លើ​ថ្មក្រោម ដំបូងស័ង្កសី សម្ភារប្រើប្រាស់ និងម៉ូតូ១គ្រឿង ត្រូវភ្លើងឆេះគ្មានសល់។ ឈ្មោះ សម សុស្ថាបនា ភេទប្រុស អាយុ៤២ឆ្នាំ ផ្ទះទំហំ៥មគុណ៧ម សង់ពីឈើលើ ថ្មក្រោម ដំបូងស័ង្កសី និងសម្ភារប្រើប្រាស់ឆេះអស់គ្មានសល់។ឈ្មោះ ម៉ី ម៉ៃ ភេទស្រី អាយុ៦៥ឆ្នាំ ផ្ទះទំហំ៥មគុណ៧ម សង់ពីឈើ ដំបូលស័ង្កសី ផ្ទះនេះឆេះមួយផ្នែក។       ពេល​កើត​ហេតុ​សមត្ថកិច្ច​បានចេញរថយន្តពន្លត់អគ្គិភ័យចំនួន៥-៦គ្រឿងដើម្បីជួយអន្តរាគមន៍បាញ់ទឹកពន្លត់ និងមិនឱ្យភ្លើងឆេះរាលដាបន្តទៀត។ ក្រោយមកសមត្ថកិច្ចជំនាញបានសន្និដ្ឋានថា មូលហេតុបង្កឱ្យឆេះផ្ទះនេះអាចមកពីឆ្លងចរន្តអគ្គិសនី៕

ភ្នំពេញ៖បុរសម្នាក់បានជិះម៉ូតូយ៉ាងលឿន ជ្រុលបុករថយន្តដឹកស៊ីម៉ងត៍ចតចិញ្ចើមផ្លូវ ចំពីក្រោយពេញទំហឹង បណ្តាលឱ្យរងរបួសធ្ងន់។ ហេតុការណ៍នេះបានកើតឡើងនៅផ្លូវក្រវាត់ក្រុងទី៣ ក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ កាលពីល្ងាចថ្ងៃទី២៥ ខែវិច្ឆិកា។សមត្ថកិច្ចបានឱ្យដឹងថា ជនរងគ្រោះឈ្មោះ លី ម៉េងហួត អាយុ៤៧ឆ្នាំរងរបួសធ្ងន់ មានទីកំណើតនៅឃុំទ្រៀល ស្រុកបារាយណ៍ខេត្តកំពង់ធំ។ មុនកើតហេតុគេបានឃើញរថយន្តហ៊ីយ៉ាន់ដាយដឹកស៊ីម៉ងត៍កំពុងចតចិញ្ចើមផ្លូវ។ពេលនោះស្រាប់តែមានបុរសម្នាក់ជិះម៉ូតូម៉ាកស្គូបពីផ្លាកលេខភ្នំពេញ1JT-7012 យ៉ាងលឿនក៏ជ្រុលបុករថយន្តនោះពីក្រោយ ពេញទំហឹងបណ្តាលឱ្យរងរបួសធ្ងន់តែម្តង។បន្ទាប់ពីកើតហេតុជនរងគ្រោះត្រូវបានរថយន្តក្រុមសង្គ្រោះ៧១១​ នៃកងពលតូចលេខ៧០ដឹកយកទៅមន្ទីរពេទ្យភ្លាមៗ​។ចំណែកម៉ូតូនិងរថយន្តត្រូវសមត្ថកិច្ចពិនិត្យ​ វាស់វែងនិងយកទៅទុកដើម្បីបន្តនីតិវិធី៕  

ភ្នំពេញ៖​បុរសម្នាក់បានត ខ្សែភ្លើងហើយរាយទៅវាលស្រែដើម្បីឆក់ត្រី តែអកុសក៏បះចំដំណរ បណ្តាលឱ្យឆ្លងចរន្តឆក់ស្លាប់មួយរំពេច អ្នកភូមិមិនអាចជួយសង្គ្រោះទាន់​។ហេតុការណ៍នេះបានកើតឡើងនៅភូមិជម្ពូវ័ន​ សង្កាត់ចោមចៅទី៣​ ខណ្ឌពោធិ៍សែនជ័យ កាលពីល្ងាចថ្ងៃទី២៥ ខែវិច្ឆិកា។មន្ត្រីមូលដ្ឋានបានឱ្យដឹងថា បុរសដែលស្លាប់ឈ្មោះ សួន​ វិច្ឆិកា​ អាយុ៣១ឆ្នាំ​ស្នាក់នៅភូមិឃុំខាងលើ។មុនកើតហេតុជនរងគ្រោះបានតខ្សែភ្លើងរួចរាយទៅវាលស្រែក្បែរផ្ទះដើម្បីឆក់ត្រី។ពេលកំពុងរាយខ្សែភ្លើងស្រាប់តែប៉ះចំខ្សែមានតំណរបណ្តាលឱ្យឆ្លងចរន្តភ្លើងក៏ឆក់ស្លាប់តែម្តង។​ភ្លាមនោះអ្នកភូមិឃើញក៏នាំគ្នារត់ទៅជួយ ដោយដកខ្សែភ្លើងដើម្បីសង្គ្រោះ តែអកុសលជនរងគ្រោះបានស្លាប់បាត់ទៅហើយ។បន្ទាប់មកសមត្ថកិច្ចបានចុះទៅដល់កន្លែងកើតហេតុ ពិនិត្យនិងធ្វើកោសល្យវិច័យ រួចប្រគល់សពឱ្យក្រុមគ្រួសារយកទៅធ្វើបុណ្យ៕

ភ្នំពេញ៖តុលាការរាជធានីភ្នំពេញ ថ្ងៃទី២៣ ខែវិច្ឆិកាឆ្នាំ២០២៣ បានបើកសវនាការសាកសួរជនជាប់ចោទ ដែលបានបាញ់សម្លាប់ប្រពន្ធ កាលពីជិត២ឆ្នាំមុន។ ក្រោយពីបញ្ចប់សវនាការសាកសួរជនជាប់ចោទរួចមក ចៅក្រមក្រុមប្រឹក្សាជំនុំជម្រះ បានកំណត់យកថ្ងៃទី១៣ខែធ្នូខាងមុខដើម្បីប្រកាសសាលក្រម។ជនត្រូវចោទឈ្មោះ ជា អូន អាយុ២៥ឆ្នាំនៅភូមិរោងចក្រ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ចំណែកប្រពន្ធដែលប្តីសម្លាប់ឈ្មោះ នូ សុខនីតា ហៅ ស៊ីវអេង អាយុ២២ឆ្នាំនៅផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ។គួររំលឹកថា កាលពីថ្ងៃទី១៣ ខែមិថុនាឆ្នាំ២០២២ តុលាការរាជធានីភ្នំពេញ បានឃុំខ្លួនជនសង្ស័យករណីប្រើកាំភ្លើងខ្លីបាញ់សម្លាប់ប្រពន្ធនៅខណ្ឌមានជ័យដាក់គុកបណ្តោះអាសន្ន ក្រោមការចោទប្រកាន់ពីបទ “ឃាតកម្មគិតទុកជាមុនតាមមាត្រា២០០ នៃក្រមព្រហ្មទណ្ឌ”។ពេលចាប់ខ្លួនសមត្ថកិច្ចដកហូតវត្ថុតាង អាវុធខ្លី១ដើមម៉ាកK59 រលប់លេខ-បង់១-គ្រាប់១គ្រាប់-កាំបិតហូត១-ម៉ូតូ១គ្រឿងម៉ាកហុងដាឌ្រីមផ្លាកលេខកណ្តាល1D-5011។ករណីបាញ់សម្លាប់ប្រពន្ធនេះបានកើតឡើងនៅផ្ទះលេខ១៤០៣A ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃទី១០ ខែមិថុនាឆ្នាំ២០២២ ៕