ព័ត៌មានទេសចរណ៍

ភ្នំពេញ៖សម្តេចធិបតី ហ៊ុនម៉ាណែត នាយករដ្ឋមន្ត្រីនៃកម្ពុជាបានលើកឡើងថា អាកាសយានដ្ឋានអន្តរជាតិសៀមរាប-អង្គរ នឹងក្លាយជាសក្តានុពលស្រូបទាញដ៏ខ្លាំងក្លា សម្រាប់វិស័យទេសចរណ៍ក្នុងខេត្តសៀមរាប។សម្តេចធិបតី​ ហ៊ុន ម៉ាណែត បានលើកឡើងលើបណ្តាញសង្គមនានាថ្ងៃទី៣១​ ខែតុលានេះ ថា “អាកាសយានដ្ឋានអន្តរជាតិសៀមរាប-អង្គរ ត្រូវបានបើកឱ្យដំណើរការកាលពីថ្ងៃទី១៦ ខែតុលាឆ្នាំ២០២៣ ដែលមានទីតាំងស្ថិតនៅឃុំតាយែក ស្រុកសូទ្រនិគម ខេត្តសៀមរាប” ។អាកាសយានដ្ឋាននេះគ្របដណ្តប់លើផ្ទៃដីប្រមាណ៧០០ហិកតា មានចម្ងាយប្រមាណ៤០គីឡូម៉ែត្រពីប្រាសាទអង្គរវត្ត និង៥១គីឡូម៉ែត្រពីទីរួមខេត្តសៀមរាប ព្រមទាំងរចនាឡើងពីការបញ្ចូលគ្នានូវ“វប្បធម៌ធម្មជាតិ និងភាពឆ្លាតវៃ”។សម្តេចនាយករដ្ឋមន្ត្រីបានបន្តថា “អាកាសយានដ្ឋានអន្តរជាតិសៀមរាប-អង្គរ មានលំដាប់ថ្នាក់នៃការហោះហើរប្រភេទ4E ដែលអាចផ្តល់លទ្ធភាពឱ្យយន្តហោះធុនធំ Boeing747 និង Airbus A340 ចុះចតបាននិងអាចមានលទ្ធភាព ទទួលអ្នកដំណើរចំនួន៧លាននាក់ ក្នុងមួយឆ្នាំ។សម្រាប់ផែនការរយៈពេលខ្លីនិង២០លាននាក់ក្នុងមួយឆ្នាំសម្រាប់ផែនការរយៈពេលវែង”។ក្នុងនោះសម្តេចធិបតី បានបញ្ជាក់ថា “កាលានុវត្តភាពថ្មីនេះនឹងក្លាយជាសក្តានុពលស្រូបទាញដ៏ខ្លាំងក្លា និងសំខាន់សម្រាប់វិស័យទេសចរណ៍ក្នុងខេត្តសៀមរាប។និយាយដោយឡែក ព្រមទាំងវិស័យទេសចរណ៍ទូទាំងប្រទេសនិយាយជារួម។ការនេះនឹងអាចទាក់ទាញដល់វិនិយោគិន ក៏ដូចជាផ្តល់ប្រយោជន៍សេដ្ឋកិច្ចមូលដ្ឋានដល់ប្រជាពលរដ្ឋ” ។សម្តេចធិបតីហ៊ុន ម៉ាណែត បញ្ជាក់ថា“ផ្លូវអាកាសគឺអាទិភាពគន្លឹះទី២ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ-ដំណាក់កាលទី១ ហើយក៏ស្ថិតនៅក្នុងកិច្ចការអាទិភាពទី២ នៃបញ្ចកោណទី២។ ដោយផ្តោតលើការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងឡូជីស្ទិកដែលមានគោលដៅយុទ្ធសាស្ត្រផ្តោតលើការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រការកសាង និងការអភិវឌ្ឍហេដ្ឋារចនាសម្ព័ន្ធថ្មីៗ”៕ដោយ៖សហការី

ព្រះវិហារ៖ក្រសួងទេសចរណ៍កម្ពុជា កាលពីថ្ងៃទី១៧ ខែកញ្ញាឆ្នាំ២០២៣បានផ្សាយព័ត៌មាន ប្រាសាទកោះកេរត្រូវដាក់បញ្ចូលជាសម្បត្តិបេតិកភណ្ឌពិភពលោកដោយជោគជ័យ។ មន្ត្រីជំនាញបានឱ្យដឹងថា ប្រាសាទកោះកេរត្រូវបានដាក់បញ្ចូលជាបេតិកភណ្ឌពិភពលោកក្នុងបញ្ជីរបស់អង្គការសហប្រជាជាតិ បន្ទាប់ពីកម្ពុជាបានចូលរួមកិច្ចប្រជុំគណៈកម្មការបេតិកភណ្ឌពិភពលោកលើកទី៤៥ នៅប្រទេសអារ៉ាប៊ីសាអូឌីត ដែលប្រព្រឹត្តឡើងចាប់ពីថ្ងៃទី១០ដល់ថ្ងៃទី២៥ ខែកញ្ញាឆ្នាំ២០២៣។សូមបញ្ជាក់ថា ប្រាសាទកោះកេរ ត្រូវបានក្រសួងវប្បធម៌ និងវិចិត្រសិល្បៈបានបញ្ជូនឯកសារស្នើសុំចុះបញ្ជីនៅតំបន់ប្រាសាទកោះកេរ ទៅអង្គការយូណេស្កូ តាំងពីខែមករា ឆ្នាំ២០២១។ប្រាសាទកោះកេរមានទំហីផ្ទៃដីជាង៨.៧០០ហិកតា ស្ថិតក្នុងស្រុកគូលែន ឃុំស្រយង់ ខេត្តព្រះវិហារ។ប្រាសាទនេះមានលក្ខណៈ ជាប្រាសាទភ្នំ កម្ពស់ប្រមាណ៣៥ម៉ែត្រ ចែកចេញជា៧ថ្នាក់ ដូចជាមហាចេតិយ៍បែរមុខទៅរករាជធានីអង្គរ នៅឯទិសខាងលិច ដោយមានកាំជណ្តើរប្រមាណ៥៥កាំ។តាមថ្នាក់ពីមួយទៅមួយ មានកម្ពស់៥ម៉ែត្រ មានផ្ទៃរាបប្រមាណ២ម៉ែត្រ តាមចន្លោះថ្នាក់នីមួយៗ។ នៅលើកំពូលប្រាសាទនេះ មានរូបចម្លាក់គ្រុឌធំៗជាច្រើន កំពុងសំដែងរិទ្ធ ទ្រនូវសិវលឹង្គ ត្រីភូវនេស្វរៈ ។នៅក្បែរគ្នានេះដែរមានមាត់រន្ធអណ្តូងមួយទំហំ៤មគុណ៤ម។ប្រាសាទកោះកេរបានកសាងឡើងក្នុងរជ្ជកាលព្រះបាទជ័យវរ័្មនទី៤ ឧទ្ទិសដល់អាទិទេពមួយអង្គឈ្មោះ ត្រីភូវនេស្វរៈ ក្នុងព្រហ្មញ្ញសាសនា។ ប្រាសាទកោះកេរ មានរូបរាងជាពីរ៉ាមីតដោយមាន៧ជាន់និងមានកម្ពស់៣៥ម៉ែត្រ។ សព្វថ្ងៃនៅរមណីយដ្ឋានប្រាសាទកោះកេរ មានសំណង់ប្រាសាទ សំណង់សាសនា ប្រព័ន្ធធារាសាស្រ្តចំនួន១២៧ ក្នុងនោះមានប្រាសាទដែលនៅមានរូបរាងចំនួន៥៦៕សៅ វ៉ាន់ឌី      

កំពង់ស្ពឺ៖អាជ្ញាធរស្រុកឱរ៉ាល់ខេត្តកំពង់ស្ពឺ បានជូនដំណឹងដល់បងប្អូនប្រជាពលរដ្ឋ ដែលមានបំណងចង់ទៅលេងតំបន់ទេសចរណ៍“ភ្នំខ្នងផ្សារ”សូមឱ្យផ្អាកបណ្តោះអាសន្ន។ពីព្រោះផ្លូវធ្វើដំណើរទៅទីនោះ ត្រូវបានជំនន់ទឹកភ្លៀងកំពុងជនលិច៕ ​​​                              ក្នុងន័យជូនដំណឹងមានលម្អិតខាងក្រោមនេះ។

ភ្នំពេញ៖ក្រសួងសាធារណការនិងដឹកជញ្ជូន កំពុងសិក្សាផ្លូវរថភ្លើងថ្មី១ខ្សែ ឆ្លងកាត់ខេត្តក្រុងចំនួន៦ ដើម្បីតភ្ជាប់ជាមួយប្រទេសវៀតណាម ក្នុងការបម្រើឱ្យវិស័យដឹកជញ្ជូនកាន់តែសម្បូរបែប និងជំរុញកំណើនសេដ្ឋកិច្ចជាតិ។ក្នុងកិច្ចសម្ភាសន៍ជាមួយអ្នកសារព័ត៌មាន ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួងសាធារណការនិងដឹកជញ្ជូនមានប្រសាសន៍ថា បច្ចុប្បន្នក្រសួងកំពុងសិក្សាគម្រោងផ្លូវរថភ្លើងថ្មីមួយខ្សែ ដែលតភ្ជាប់ពីក្រុងប៉ោយបែតទៅដល់ក្រុងបាវិត។ផ្លូវនេះតភ្ជាប់ជាមួយគម្រោងផ្លូវដែករបស់វៀតណាម ខណៈគម្រោងឆ្លងកាត់ខេត្ដ-ក្រុងសំខាន់ៗចំនួន៦រួមមាន ក្រុងប៉ោយប៉ែត-ខេត្ដសៀមរាប-កំពង់ធំ-កំពង់ឆ្នាំង-រាជធានីភ្នំពេញ និងក្រុងបាវិត។

កំពង់ចាម៖ប្រតិភូដង្ហែព្រះអគ្គិជ័យកីឡា បានហែឆ្លងកាត់ខេត្តចំនួន៣កាលពីរសៀលថ្ងៃទី២៨ ខែមេសាឆ្នាំ២០២៣ ហើយបានចូលដល់ខេត្តកំពង់ចាម ក្រោមសម្រែកទទួលអបអរសាទរយ៉ាងកងរំពងរយៈពេលប្រមាណជាង៣០នាទី មុននឹងបន្តដំណើរឆ្ពោះទៅខេត្តកណ្តាល។ក្នុងពិធីដ៏ប្រវត្តិសាស្រ្ត៦៤ ឆ្នាំមកនេះ រដ្ឋបាលខេត្តកំពង់ចាមបានរៀបចំទទួលគណៈប្រតិភូព្រះអគ្គិជ័យកីឡា នៅវិមានឯករាជ្យខេត្តកំពង់ចាម ដោយមានការដឹកនាំទទួលស្វាគមន៍ពីឯកឧត្តម អ៊ុន ចាន់ដា ជាអភិបាលខេត្តកំពង់ចាម និងមន្រ្តីរាជការ លោកគ្រូអ្នកសិស្សានុសិស្ស ប្រជាពលរដ្ឋអញ្ជើញមកពីសង្កាត់ទាំងបួន របស់ក្រុងកំពង់ចាម មានភាពគគ្រឹកគគ្រេង សប្បាយរីករាយ។បន្ទាប់ពី ឯកឧត្តម អ៊ុន ចាន់ដា ជាអភិបាលខេត្តបានចាប់កាន់ភ្លើងគប់ព្រះអគ្គិជ័យកីឡា លើកឡើងលើសម្រែកអបអរសាទរក៏លន់យ៉ាងកងរំពងមានដូចជាៈ អរគុណសន្តិភាព ជយោ ព្រះរាជាណាចក្រកម្ពុជា, ជយោ ព្រះរាជាអច្ឆរិយកជាដើម។ក្រោយពីពិធីទទួលស្វាគមន៍ប្រតិភូដង្ហែព្រះអគ្គិជ័យកីឡានៅម៉ាងប្រមាណជាង ២ រសៀលក្បួននេះបានបន្តដំណើរ នាំមុខដោយក្បួនម៉ូតូធំ ក្រុមកីឡាជិះកង់ និងរថយន្តក្រុមឆៃយ៉ាំ នៅលើផ្លូវជាតិលេខ៧ ស្រុកកំពង់សៀម ស្រុកព្រៃឈរ ឆ្ពោះទៅកាន់ផ្លូវជាតិលេខ៦ ស្រុកជើងព្រៃនិងស្រុកបាធាយ ដើម្បីបន្តដំណើរទៅខេត្តកណ្តាល និងរាជធានីភ្នំពេញ៕ញ៉ែមសុផល