សេដ្ឋកិច្ច

ភ្នំពេញ​៖​ រសៀល​ថ្ងៃ​ទី​២២​ ខែវិច្ឆិកា​ឆ្នាំ​២០២៣​លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានថ្លែង​លើបណ្ដាញសង្គមហ្វេសប៊ុកផ្ទាល់​ថា “ផ្លូវជាតិលេខ៥ នឹងជំរុញកំណើនសេដ្ឋកិច្ច ពាណិជ្ជកម្ម វិនិយោគ ទេសចរណ៍ និងការធ្វើដំណើរបានកាន់តែប្រសើរដល់ពលរដ្ឋកម្ពុជា តាមរយៈការតភ្ជាប់ជាមួយផ្លូវជាតិសំខាន់ៗក្នុងប្រទេស ក៏ដូចជាតភ្ជាប់ទៅកាន់ព្រំដែនកម្ពុជា-ថៃ”។  គម្រោងធ្វើឱ្យប្រសើរឡើងផ្លូវជាតិលេខ៥ ជាផ្លូវអាស៊ានហាយវ៉េលេខ១ មានប្រវែងសរុប ៣៣០,៨៩គីឡូម៉ែត្រឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ ផ្លូវមួយនេះមានចំណុចចាប់ផ្ដើមពីស្ពានព្រែកក្តាម ខេត្តកណ្ដាល រហូតដល់ក្រុងសិរីសោភ័ណ ខេត្តបន្ទាយមានជ័យត្រូវបានបែងចែកចេញជា៣កំណាត់គឺ។-កំណាត់ផ្លូវភាគខាងត្បូង ព្រែកក្តាម-ធ្លាម្អម ប្រវែង១៣៥,២៥គីឡូម៉ែត្រ ចាប់ផ្ដើមពីស្ពានព្រែកក្តាម ឆ្លងកាត់ខេត្តកណ្ដាល ខេត្តកំពង់ឆ្នាំងនិងខេត្តពោធិ៍សាត់។កំណាត់ផ្លូវភាគកណ្តាល ធ្លាម្អម-បាត់ដំបង ប្រវែង១១០,៩០គីឡូម៉ែត្រចាប់ផ្ដើមពីធ្លាម្អម ឆ្លងកាត់ខេត្តពោធិ៍សាត់ និងខេត្តបាត់ដំបង។កំណាត់ផ្លូវភាគខាងជើង បាត់ដំបង-សិរីសោភ័ណប្រវែង៨៤,៧៤គីឡូម៉ែត្រ ចាប់ផ្ដើមពីខេត្តបាត់ដំបង រហូតដល់ក្រុងសិរីសោភ័ណ ខេត្តបន្ទាយមានជ័យ។សូមជម្រាបថា​ កាលពីព្រឹកថ្ងៃទី២២ ខែវិច្ឆិកាឆ្នាំ២០២៣ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា​ បានអញ្ជើញជាអធិបតីភាពដ៏ខ្ពង់ខ្ពស់សម្ពោធ បើកឱ្យប្រើប្រាស់ជាផ្លូវការផ្លូវជាតិលេខ៥ លើកំណាត់ផ្លូវភាគកណ្តាល និងភាគខាងត្បូង តភ្ជាប់នឹងកំណាត់ផ្លូវភាគខាងជើង។ការសម្ពោធបើកឱ្យប្រើប្រាស់ជាផ្លូវការរួចរាល់កាលពីថ្ងៃទី១០ ខែមករាឆ្នាំ២០២២ ក្រោមអធិបតីភាពដ៏ខ្ពង់ខ្ពស់សម្ដេចតេជោហ៊ុន សែន។ក្នុងពិធីនេះដែរ សម្ដេចមហាបវរធិបតី ក៏បានប្រកាសបើកការដ្ឋាន​សាងសង់​កំណាត់ផ្លូវជាតិលេខ៥ […]

ភ្នំពេញ៖ករណីឃាត់ខ្លួនលោកឧត្ដមសេនីយ៍ទោ វ៉ាន់ កុសល អនុប្រធានមន្ទីរប្រឆាំងបទល្មើសគ្រឿងញៀន និងបក្ខពួក៤នាក់ទៀតមិនជាប់ករណីគ្រឿងញៀនទេ។តែអាចពាក់ព័ន្ធបទល្មើសកំហែងយក។នាយឧត្ដមសេនីយ៍​ អគ្គស្នងការ​រង​នគរបាលជាតិ​ លោកម៉ក់ ជីតូ ទទួល​បន្ទុក​បង្ក្រាប​បទល្មើស​គ្រឿងញៀន​ បានឱ្យអ្នកសារព័ត៌មានដឹងថា​ ការ​ឃាត់ខ្លួន​លោកឧត្ដមសេនីយ៍​ទោ​ វ៉ាន់​កុសល​ ​និង​បក្ខពួក​៤នាក់ទៀតមិនមាន​ពាក់​ព័ន្ធ​បទល្មើស​គ្រឿងញៀន​ទេ​។តែអាច​ពាក់ព័ន្ធ​បទល្មើស​កំហែង​យក។​នាយឧត្ដមសេនីយ៍បានបន្តថា​ អំឡុង​ខែ​ តុលា​ឆ្នាំ២០២៣​ ឧត្ដមសេនីយ៍​ទោ​ វ៉ាន់​ កុសល​ បាន​ស្នើសុំ​គោលការណ៍​ លោកឧត្ដមសេនីយ៍​ឯក​ ឃីង​ សារ៉ាត់​ ប្រធានមន្ទីរ​ប្រឆាំង​បទល្មើស​គ្រឿងញៀន​ ចុះបង្ក្រាប​ជនជាតិ​ចិនសង្ស័យ​ពាក់ព័ន្ធ​បទល្មើស​គ្រឿងញៀន​ ។នៅពេលឃាត់ខ្លួន​ជនជាតិ​ចិនទាំងនោះ​ គ្មាន​ភស្តុតាង​ពាក់ព័ន្ធ​បទល្មើស​គ្រឿងញៀន​ទេ​។  បន្ទាប់​ពី​ឆែកឆេរ​គ្មាន​ភស្តុតាង​ លោកឧត្ដមសេនីយ៍​ទោ​ វ៉ាន់​ កុសល​ បានសុំគោលការណ៍​ពីលោកប្រធាន​ដើម្បីអនុញ្ញាត​ឱ្យពួកគេត្រឡប់​ទៅវិញ​។ប្រធានមន្ទីរ​បាន​ឯក​ភាព​តាមការ​ស្នើសុំ​ តែ​មិនបាន​ឱ្យលោកឧត្ដមសេនីយ៍​ទោ​ វ៉ាន់​ កុសល​ យកលុយពី​ជនជាតិ​ចិននោះឡើយ។ចំណែក​លោក​ វ៉ាន់​ កុសល​ បាន​ទាមទារ​លុយ​ពី​​ចិនទាំងនោះ​ចំនួន​៣ម៉ឺន​ដុល្លារ​ ជាថ្នូរ​នឹងការ​ដោះលែង​ ដោយទៅយកលុយ​ដល់​ធនាគារ​ថែមទៀត​ផង​។ក្រុម​ចិនទាំងនោះ​បន្ទាប់​ពី​ប្រគល់​លុយឱ្យទៅ​លោកវ៉ាន់​ កុសល​ និង​បក្ខពួក​រួចហើយ​ ពួកគេ​ក៏​ប្ដឹង​ទៅថ្នាក់ដឹកនាំ​ក្រសួង​មហាផ្ទៃ​ ដើម្បី​ទាមទារ​រកយុត្តិធម៌​។ដូច្នេះករណី​ឃាត់ខ្លួន​ឧត្ដមសេនីយ៍​ទោ​ វ៉ាន់​ កុសល​ និង​បក្ខពួក​៤នាក់​មិនពាក់​ព័ន្ធ​បទល្មើស​គ្រឿងញៀន​ទេ​។ តែ​ពាក់ព័ន្ធ​បទល្មើស​កំហែង​យ​ក​។ កាលពីល្ងាចថ្ងៃទី១០ ខែវិច្ឆិកា​ តំណាងអយ្យការ តុលាការរាជធានីភ្នំពេញកំពុងបន្តនីតិវិធី៕

ភ្នំពេញ៖កម្លាំងរដ្ឋបាលជលផលព្រៃវែង កាលពីថ្ងៃទី៣ ខែវិច្ឆិកាបានចុះប្រតិបត្តិការបង្ក្រាបឧបករណ៍នេសាទខុសច្បាប់នៅ២ទីតាំងផ្សេងគ្នា និងបានកាប់ រុះរើរួចដុតបំផ្លាញចោលនូវសម្ភារបទល្មើសជាច្រើន។លោក អូន ស៊ីណាត នាយខណ្ឌរដ្ឋបាលជលផលព្រៃវែង បានឱ្យអ្នកសារព័ត៌មានដឹងនៅថ្ងៃទី៤ ខែវិច្ឆិកានេះថា ផ្នែករដ្ឋបាលជលផលស្ទឹងស្លូត បានចុះទប់ស្កាត់បទល្មើសនេសាទនៅម្តុំស្ថានីយបូមទឹកខ្សាច់ស ភូមិខ្សាច់ស ឃុំរក្សជ័យ ស្រុកបាភ្នំ ខេត្តព្រៃវែង។ក្នុងនោះមានឧបករណ៍នេសាទខុសច្បាប់ដូចជា លូស្បៃមុង២២មាត់-របាំងព្រួលស្បៃមុងប្រវែង១.១០០ម៉ែត្រ និងបង្គោលចម្រឹងចំនួន៦០៥ដើម។កម្លាំងជលផលក៏រុះរើ និងកាប់បំផ្លាញចោល ហើយបានលែងកូនត្រីចម្រុះ ចូលបឹងធម្មជាតិវិញប្រមាណ១០គីឡូក្រាម។លោក អូន ស៊ីណាត បានបន្តថា នៅថ្ងៃដដែលផ្នែករដ្ឋបាលជលផល កំពង់លាវក៏បានចុះទប់ស្កាត់បទល្មើសនេសាទនេះដែរ នៅម្តុំបើកឆ្នុក ភូមិថ្មី ឃុំព្រែកអន្ទះ ស្រុកពោធិ៍រៀង។ជាមួយនោះរកឃើញ លូស្បៃមុង១៩មាត់-របាំងព្រួលស្បៃមុងប្រវែង១.១៤០ម៉ែត្រ និងបង្គោលចម្រឹង៣៨០ដើម។កម្លាំងបានរុះរើកាប់បំផ្លាញចោល តែរក្សាទុកស្បៃមុងដែលមានគុណភាពប្រវែង១៥០ម៉ែត្រ ហើយចាក់លែងកូនត្រីចម្រុះ ប្រមាណជិត២០គីឡូក្រាម ចូលបឹងធម្មជាតិវិញ៕  

ព្រះវិហារ៖មន្ទីរសាធារណការខេត្តព្រះវិហារ កាលពីថ្ងៃទី០១ ខែវិច្ឆិកាបានបន្តជួសជុល និងផ្តើមថែទាំឡើងវិញ កំណាត់ផ្លូវប្រវែងជិត៥៥គីឡូម៉ែត្រ ពីឧទ្យានជាតិតេជោសែនឫស្សីត្រឹប ដល់ព្រំដែនឡាវ ដែលរងការខូចខាតដោយជំនន់ទឹកភ្លៀងកន្លងមក។មន្ត្រីមន្ទីរសាធារណការ និងដឹកជញ្ជូនខេត្តព្រះវិហារបានឱ្យដឹងថា  ក្រុមការងារផ្នែកថែទាំផ្លូវថ្នល់បានបន្តសកម្មភាពជួសជុល និងផ្តើមថែទាំកំណាត់ផ្លូវជាតិលេខ៩៤ប្រវែង៥៤,៩០គីឡូម៉ែត្រ។ផ្លូវនេះចាប់ពីឧទ្យានជាតិតេជោសែនឫស្សីត្រឹប ដល់ឃុំកំពង់ស្រឡៅ១ ព្រំប្រទល់កម្ពុជា-ឡាវ។ការងារត្រូវបានចាក់ថែមដីល្បាយថ្ម រួចកៀរសម្រួលកិនបង្ហាប់ដើម្បីឱ្យពលរដ្ឋងាយស្រួលក្នុងការធ្វើដំណើរ។កំណាត់ផ្លូវនេះតភ្ជាប់ពីផ្លូវជាតិលេខ៩ទីរួមស្រុកឆែប ឆ្ពោះទៅរមណីយដ្ឋានទឹកធ្លាក់ព្រះនិម្មិត ដែលជាតំបន់អេកូរទេសចរណ៍ជាប់ព្រំដែនកម្ពុជា-ឡាវ៕សៅវ៉ាន់ឌី        

ភ្នំពេញ៖រដ្ឋបាលរាជធានីភ្នំពេញ កាលពីថ្ងៃទី៣១ ខែតុលាឆ្នាំ២០២៣ បានចេញសេចក្ដីណែនាំស្តីពីការមិនឱ្យយកភាស៊ី និងបង់ថ្លៃផ្សេងៗ ចំពោះអ្នកលក់ដូរតាមកញ្ច្រែង-កញ្ជើ-ល្អី និងលក់ដូរចល័តគ្រប់ប្រភេទ។ តាមសេចក្តីណែនាំបានបញ្ជាក់ថា កន្លងមកដោយមានការយកចិត្តទុកដាក់ ពីជីវភាពរស់នៅប្រជាពលរដ្ឋ នៃរាជរដ្ឋាភិបាលអាណត្តិទី៦ ក្រោមការដឹកនាំរបស់ សម្តេចតេជោ ហ៊ុន សែន បានដាក់ចេញសារាចរចុះថ្ងៃទី៩ ខែធ្នូឆ្នាំ២០១៦។សារាចរបានសម្រេចលុបការបង់ភាស៊ី និងបង់ថ្លៃផ្សេងៗទៀត ចំពោះពលរដ្ឋលក់ដូរតាមកញ្ច្រែង-កញ្ជើ-ល្អី-និងចល័តគ្រប់ប្រភេទនៅទីកន្លែងលក់ដូរ និងទីផ្សារទូទាំងប្រទេស។ជាមួយនេះកាលពីថ្ងៃទី៣ ខែតុលាឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់បទបញ្ជាឱ្យអនុវត្តនូវសារាចរណែនាំខាងលើ ឱ្យបានម៉ឺងម៉ាត់បំផុត នាឱកាសសម្តេចជួបសំណេះសំណាលជាមួយកម្មករ-កម្មការិនីនៅភ្នំពេញ។ បទបញ្ជានេះដើម្បីពង្រឹង និងចៀសវាងជនខិលខូចមួយចំនួនឆ្លៀតឱកាស ដើរប្រមូលថវិកាក្រោមរូបភាពប្រមូលភាស៊ី ពីអ្នកលក់ដូរតាមកញ្ច្រែង-កញ្ជើ-ល្អី និងការលក់ដូរចល័តពីអាជីវករ។ រដ្ឋបាលរាជធានីភ្នំពេញ បានណែនាំដល់រដ្ឋបាលខណ្ឌ-សង្កាត់-គណៈកម្មការផ្សារ-ក្រុមហ៊ុនវិនិយោគធ្វើអាជីវកម្មភាស៊ី និងអាជីវកម្មប្រមូលចំណូលអនាម័យ ព្រមទាំងភាគីពាក់ព័ន្ធទាំងអស់។ ត្រូវពង្រឹងប្រកបដោយស្មារតីទទួលខុសត្រូវខ្ពស់ក្នុងការអនុវត្ត សារាចរនៃរាជរដ្ឋាភិបាល ស្ដីពីការលុបការបង់ថ្លៃចំពោះពលរដ្ឋលក់ដូរតាមកញ្ច្រែង-កញ្ជើ-ល្អីនិងចល័តឱ្យមានប្រសិទ្ធភាព។ សេចក្តីណែនាំដដែលបានបញ្ជាក់ថា ក្នុងករណីមានអ្នកទាមទារ ឬបង្ខិតបង្ខំឱ្យបង់ភាស៊ី ឬបង់ថ្លៃផ្សេងៗតាមគ្រប់រូបភាព អាជីវករទាំងឡាយអាចរាយការណ៍ ជាបន្ទាន់មកអាជ្ញាធរមានសមត្ថកិច្ចនៅជិតបំផុតឬ Hotline 1299 ដើម្បីចាត់វិធានការរដ្ឋបាល និងវិធានការច្បាប់ចំពោះជនបង្កបានទាន់ពេលវេលា៕    

ភ្នំពេញ៖ដោយបានសុំគោលការណ៍ពីរាជរដ្ឋាភិបាល ទីស្តីការគណៈរដ្ឋមន្ត្រីបានជម្រាបជូនរដ្ឋមន្ត្រីក្រសួងព័ត៌មានដែលមានខ្លឹមសារថា៖ទី១-ណែនាំឱ្យម្ចាស់អាជីវកម្មប្រព័ន្ធផ្សព្វផ្សាយទាំងអស់ ដែលកំពុងដំណើរការដោយគ្មានអាជ្ញាបណ្ណ ត្រូវមកសុំច្បាប់អនុញាតប្រកបអាជីកម្មពីក្រសួងព័ត៌មាន ដោយទុករយៈពេល៣ខែ។ផុតរយៈពេលកំណត់បុគ្គលណាដែលធ្វើអាជីវកម្មផ្សព្វផ្សាយ ដោយគ្មានច្បាប់អនុញាតត្រូវប្រឈមចំពោះមុខច្បាប់។ ទី២-អង្គភាពប្រព័ន្ធផ្សព្វផ្សាយទាំងអស់ត្រូវគោរព និងអនុវត្តតាមច្បាប់ស្តីពីរបបសារព័រមាននិងក្រមសិលធម៌ វិជ្ជាជីវៈដើម្បីពង្រឹងគុណភាពនៃការផ្សព្វផ្សាយ។ករណីម្ចាស់អង្គភាពប្រព័ន្ធផ្សព្វផ្សាយណាបំពានវិជ្ជាជីវៈមិនព្រមអនុវត្តតាមការណែនាំក្រសួងព័ត៌មានត្រូវដកហូតអាជ្ញាបណ្ណ បញ្ឈប់ការធ្វើអាជីវកម្មជាស្ថាពរ។ទី៣-លុបអាជ្ញាបណ្ណអាជីកម្មប្រព័ន្ធផ្សព្វផ្សាយគ្រប់ប្រភេទ និងសមាគមអ្នកសារព័ត៌មានដែលបានចុះបញ្ជីហើយតែមិនដំណើរការក្នុងរយៈពេល១ឆ្នាំ។ដោយឡែកសម្រាប់ស្ថានីយទូរទស្សន៍គ្រប់ប្រភេទទុកលទ្ធភាពជូនរយៈពេល៣ឆ្នាំ ដោយសារប្រើទុនវិយោគច្រើននិងត្រូវសិក្សារយៈពេលយូរ៕ ហូសាន់