សៀមរាប៖ឈ្មួញជើងខ្លាំងដែលហ៊ានយកឬគ្រឿងចក្រចូលទៅឈូសឆាយព្រៃលិចទឹកជីកយកអាចម៍ដីលក់ទទួលទោសពីមន្ទីរជំនាញរ៉ែនិងថាមពលត្រឹមធ្វើកិច្ចសន្យាក្រោមលេសស្តារប្រឡាយចាស់ និងស្តារស្រះចាស់។
កំណត់ហេតុរបស់មន្ទររ៉ែនិងថាមពលខេត្ត សៀម រាប បង្ហាញថា ម្ចាស់គ្រឿងចក្រឈ្មោះវ៉ាន់ណារ៉ាភេទប្រុសអាយុ៣៧ឆ្នាំត្រូវផ្អាកសកម្មភាពឈូសឆាយហើយដកគ្រឿងចក្រចេញពីទីតាំង។ចំណែកឈ្មោះសុខលីនភេទប្រុសអាយុ៣៦ឆ្នាំត្រូវផ្អាកសកម្មភាពហើយដកគ្រឿងចក្រចេញពីទីតាំង។
ការដែលឈ្មួញមានអំណាចយកគ្រឿងចក្រទៅឈូសឆាយព្រៃលិចទឹកហើយជីកយកអាចម៍ដីលក់នៅតំបន់ហាមឃាត់ហើយបែជាទទួលទោសត្រឹមធ្វើកិច្ចសន្យាបែបនេះបានធ្វើអោយសមត្ថកិច្ចដែលចូលរួមទប់ស្កាត់ឃាត់គ្រឿងចក្រសម្តែងការខកចិត្តយ៉ាងខ្លាំង។សមត្ថកិច្ចមូលដ្ឋានដែលខំចេញមុខឃាត់គ្រឿងចក្របានលើកឡើងថាហួសចិត្តមិននឹកថាគេហៅទៅគឺគ្រាន់តែសម្រាប់អោយឡើបេះចឹងសោះ។
ចំណែកពលរដ្ឋដែលឃើញហេតុការក៏បានលើកឡើងថាអ្នកណាក៏ហ៊ានដែរល្បែងដែលលេងហើយមានតែស្មើនិងឈ្នះ មិនចាញ់ចឹងនោះ។ចឹងហើយបានជាពីមួយឆ្នាំ ទៅមួយឆ្នាំព្រៃលិចទឹកចេះតែរលាយ ដល់ពេលដឹងសុទ្ធតែកម្មសិទ្ធិរបស់អ្នកធំនិងឧកញ៉ា។
សូមបញ្ជាក់ថាកាលពីព្រឹកថ្ងៃទី២១ខែធ្នូនេះសមត្ថកិច្ចចម្រុះដែលរួមមានប៉ូលិសមូលដ្ឋានប៉ូលិសប្រឆាំងបទល្មើសសេដ្ឋកិច្វមន្ទីរបរិស្ថានមន្ទីររ៉ែនិងថាមពលជលផលបានចុះទៅឃាត់ឡានដឹកដីនិងគ្រឿងចក្រ ដែលកំពុងជីកកាយទន្ទ្រានដីព្រៃលិចទឹកក្នុងភូមិសាស្ត្រសង្កាត់ជ្រាវ។គ្រឿងចក្រដែលសមត្ថកិច្ចចុះទៅឃាត់នេះ រួមមានឡានដឹកដី៤គ្រឿង អេស្កាវាទ័រ ២គ្រឿងនិងឡានសម្រាប់ដឹកគ្រឿងចក្រមួយគ្រឿង។ ប៉ុន្តែនៅរសៀលថ្ងៃដដែល ក៍បានដោះលែងទៅវិញអស់៕អង្គរតូច