អន្តរជាតិ៖យោងតាមការស្រាវជ្រាវដែលចេញផ្សាយកាលពីថ្ងៃពុធទី៦ខែឧសភាឆ្នាំ២០២០បានឱ្យដឹងថាកុមារតូចៗម្នាក់ក្នុងចំណោម៥នាក់នៅសហរដ្ឋអាមេរិកមិនបានទទួលទានគ្រប់គ្រាន់ទេចាប់តាំងពីមានជំងឺរាតត្បាតកូវីដ១៩នោះមក ។
របាយការណ៍វិទ្យាស្ថានBrookingsបាននិយាយថាការស្ទង់មតិមួយបានរកឃើញថា១៧,៤ភាគរយនៃម្តាយ ដែលមានកូនអាយុក្រោម១២ឆ្នាំបានរាយការណ៍ថាកូនៗរបស់ពួកគេមិនបានបរិភោគគ្រប់គ្រាន់ទេ ដោយសារតែខ្វះលុយ ។អ្នកស្រាវជ្រាវលោកស្រី Lauren Bauer បាននិយាយថា “វាច្បាស់ណាស់ថា ក្មេងៗកំពុងជួបប្រទះនឹងបញ្ហាអសន្តិសុខស្បៀងក្នុងកម្រិតមួយដែលមិនធ្លាប់មានពីមុនមកនៅក្នុងសម័យទំនើបនេះ” ។
លោកស្រីបានបន្ថែមថា“អសន្តិសុខស្បៀងក្នុងគ្រួសារដែលមានកុមារអាយុក្រោម១៨ឆ្នាំបានកើនឡើងប្រមាណ១៣០ភាគរយចាប់ពីឆ្នាំ២០១៨រហូតមកដល់ថ្ងៃនេះ”។ការស្ទង់មតិដើម្បីវាស់វែងពីផលវិបាកនៃជំងឺរាតត្បាត កូវីដ-១៩ បានបង្ហាញតួលេខអាក្រក់ជាង ពេលមានវិបត្តិហិរញ្ញវត្ថុឆ្នាំ២០០៨ទៅទៀត ។
លោកស្រីBauerបានពណ៌នាលទ្ធផលនេះថាជារឿងគួរឱ្យព្រួយបារម្ភដែលគ្រួសារជាច្រើនបានកាត់បន្ថយចំណែកអាហាររបស់កុមារ ។
លោកស្រីបាននិយាយថាកម្មវិធីអាហារនៅក្នុងសាលាក៏អាចជាកត្តាមួយដែរដោយក្រុមគ្រួសារមិនប្រមូលអាហារពីកន្លែងចែកចាយ។មនុស្សវ័យចំណាស់ប្រជែងគ្នាដើម្បីអាហារដែលផ្គត់ផ្គង់មានកំណត់នៅតាមផ្ទះ ។យ៉ាងហោចណាស់ មានពលករអាមេរិកចំនួន៣០លាននាក់ បានបាត់បង់ការងាររបស់ពួកគេ ដោយសារការបិទទ្វារសេដ្ឋកិច្ចដើម្បីទប់ស្កាត់ការរីករាលដាលនៃវីរុស ។
មេរោគឆ្លងថ្មីនេះបានឆ្លងដល់មនុស្សជាង១,២លាននាក់នៅក្នុងសហរដ្ឋអាមេរិកនិងបានសម្លាប់មនុស្សចំនួន៧៤.៧៩៩នាក់ហើយអ្នកវិភាគបារម្ភថាការខូចខាតខាងសេដ្ឋកិច្ចមួយចំនួនអាចនឹងមានរយៈពេលវែង៕Skai news