ភ្នំពេញ៖លោកឧបនាយករដ្ឋមន្ដ្រីប្រាក់សុខុនរដ្ឋមន្ដ្រីការបរទេស និងសហប្រតិបត្តិការអន្តរជាតិ និងលោកមិកាមិម៉ាសាហ៊ីរ៉ូឯកអគ្គរាជទូតជប៉ុនប្រចាំកម្ពុជាកាលពីរសៀលថ្ងៃទី៥ខែមិថុនាឆ្នាំ២០២០ បានអញ្ជើញចុះហត្ថលេខាលើលិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់ជប៉ុន។ ដែលមានទឹកប្រាក់សរុបចំនួន ៤.៥០១ លានយ៉េនប្រមាណ៤១,៤លានដុល្លារអាមេរិក សម្រាប់អនុវត្តគម្រោងចំនួនបីនៅកម្ពុជា។
គម្រោងទាំងបីនោះរួមមាន៖អាហារូបករណ៍អភិវឌ្ឍន៍ធនធានមនុស្សចំនួន៣៤៨លានយ៉េន(ប្រមាណ៣,២លានដុល្លារអាមេរិក។ការធ្វើឱ្យប្រសើរឡើងនៃមន្ទីរពេទ្យបង្អែកខេត្តសៀមរាបចំនួន២.១៥៣លានយ៉េនប្រមាណ១៩,៨លានដុល្លារអាមេរិក។កម្មវិធីអភិវឌ្ឍន៍សេដ្ឋកិច្ចនិងសង្គមតាមរយៈការផ្តល់សម្ភារវេជ្ជសាស្ត្រសម្រាប់ការការពារ និងការឆ្លើយតបការរីករាលដាលនៃជំងឺកូវីដ-១៩ ចំនួន ២.០០០ លានយ៉េនប្រមាណ១៨,៤០លានដុល្លារអាមេរិក។
ហិរញ្ញប្បទានឥតសំណងដែលផ្តល់ដោយរដ្ឋាភិបាលជប៉ុននេះនឹងរួមចំណែកយ៉ាងសំខាន់ដល់ការលើកកម្ពស់កិច្ចអភិវឌ្ឍសេដ្ឋកិច្ចនិងសង្គមនៃព្រះរាជាណាចក្រកម្ពុជាព្រមទាំងពង្រឹងទំនាក់ទំនងមិត្តភាព និងកិច្ចសហប្រតិបត្តិការ រវាងប្រទេសទាំងពីរ៕
