ពោធិ៍សាត់៖រមណីយដ្ឋាន“ទឹកធ្លាក់ថ្មដាតូច”ឬហៅថា“ទឹកធ្លាក់ភ្នំ១៥០០”កំពុងទទួលបានការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរជាតិនិងអន្តរជាតិ។ដោយសារទេសភាពនៅទីនោះមានជ្រលងដងអូរជ្រោះជ្រៅព្រៃព្រឹក្សាផ្ទាំងថ្មនៅក្រោមម្លប់ឈើត្រជាក់ល្ហឹមដែលបង្កប់ទៅដោយសំឡេងសត្វយំនិងសំឡេងទឹកហូរធ្លាក់ពីលើភ្នំ១៥០០យ៉ាងរណ្តំ។បានធ្វើឱ្យភ្ញៀវទេសចរមានការចាប់អារម្មណ៍ពីសម្រស់ធម្មជាតិនេះមកលេងម្តងហើយចង់មកម្តងទៀត។ដើម្បីឱ្យកាន់តែច្បាស់។
លោកសំឃីមប្រធានមន្ទីរទេសចរណ៍ខេត្តពោធិ៍សាត់បានឱ្យដឹងថារមណីយដ្ឋានថ្មដាតូចនេះជាកន្លែងកម្សាន្តបែបព្រៃភ្នំធម្មជាតិស្អាតប្លែកភ្នែកពីរមណីយដ្ឋានដទៃទៀតដែលមានទឹកជ្រោះហូរធ្លាក់ចំនួន២ថ្នាក់។គឺថ្នាក់ខាងលើភ្ញៀវទេសចរអាចដើរមកកម្សាន្តមានទឹកធ្លាក់ជម្រាលជាថ្នាក់ៗដូចកាំជណ្តើរងាយស្រួលសម្រាប់ការងូតទឹកលេងកម្សាន្តនិងថ្នាក់ខាងក្រោមជាល្បាក់ទឹកធ្លាក់ដែលមានកម្ពស់ជិត១០ម៉ែត្រ ជាកន្លែងអង្គុយលំហែរកាយ និងងូតទឹកលេងយ៉ាងត្រជាក់ល្ហឹម ។
លោកប្រធានមន្ទីរបានបន្តថា រមណីយដ្ឋានទឹកធ្លាក់ថ្មដាតូចនេះ ស្ថិតនៅភូមិឯកភាព ឃុំថ្មដា ស្រុកវាលវែងខេត្តពោធិ៍សាត់ដែលស្ថិតនៅចន្លោះជ្រលងភ្នំ១៥០០។លោកបញ្ជាក់ថាទិដ្ឋភាពទាំងនេះ បានធ្វើឱ្យភ្ញៀវទេសចរប្លែកភ្នែកប្លែកអារម្មណ៍ក្រៅពីគយគន់ទេសភាពទឹកធ្លាក់តាមព្រៃភ្នំដ៏ស្រស់ត្រកាល។រួចមកនៅមានទិដ្ឋភាពផ្លូវរាងក្រវិចក្រវៀនដូចអន្ទង់អាំងនៅតាមជម្រាលភ្នំខ្ពស់ៗ។
នៅពេលសំឡឹងទៅហាក់បីដូចជាមានអារម្មណ៍ស្រស់ស្រាយជាខ្លាំងដែលពោរពេញទៅដោយព្រៃព្រឹក្សាខៀវស្រងាត់បង្កើតបាននូវផ្ទាំងទស្សនីយភាពដ៏អស្ចារ្យមួយមិនដែលមាន។
លោកបានបន្តថាដោយមើលឃើញអំពីសក្តានុពលនៃរមណីយដ្ឋានធម្មជាតិមួយនេះមន្ទីរទេសចរណ៍ខេត្តបានសហការជាមួយអាជ្ញាធរដែនដីនិងក្រុមហ៊ុនឯកជនជាដៃគូអភិវឌ្ឍន៍ដ៏សំខាន់បានរៀបចំតំបន់នេះឡើង។ដើម្បីឱ្យក្លាយទៅជារមណីយដ្ឋានធម្មជាតិមួយដ៏ទាក់ទាញបម្រើឱ្យការលេងកម្សាន្តរបស់ភ្ញៀវជាតិនិងអន្តរជាតិ។ជាពិសេសបានជួយបង្កើនប្រាក់ចំណូលដល់ប្រជាសហគមន៍នៅក្នុងតំបន់នោះទៀតផង ។
លោកប្រធានបានបន្តថា”អញ្ចឹងខ្ញុំមើលឃើញអំពីវិសាលភាពនេះវាល្អហើយយើងក៏មានការអភិវឌ្ឍតំបន់នេះមិនមានការកែច្នៃឱ្យខុសអ្វីប្លែកពីធម្មជាតិនោះទេ។យើងទុកជាលក្ខណៈធម្មជាតិហើយយើងក៏មានក្រុមហ៊ុនឯកជនគេវិនិយោគនៅតំបន់នេះ។
ដោយទីមួយយើងផ្ដោតទៅលើចំណតរថយន្ត,អនាម័យ,យើងអាចត្រួសត្រាយមួយចំនួនមិនឱ្យអ្វីខុសប្លែកពីធម្មជាតិធ្វើម៉េចឱ្យមានភាពទាក់ទាញដល់ភ្ញៀវជាតិនិងអន្តរជាតិចូលមកកម្សាន្ត” ។
សូមបញ្ជាក់ថានៅទូទាំងខេត្តពោធិ៍សាត់មានតំបន់រមណីយដ្ឋានធម្មជាតិចំនួន៣៤កន្លែង។ប៉ុន្តែបានដាក់ឱ្យដំណើរការជាផ្លូវការតែ១០កន្លែងប៉ុណ្ណោះ។ដែលចំនួននៅសេសសល់នេះគឺមន្ទីរទេសចរណ៍និងអាជ្ញាធរពាក់ព័ន្ធ កំពុងសិក្សានិងរៀបចំឲ្យបានច្បាស់លាស់ជាមុនសិន មុននឹងដាក់ឱ្យដំណើរការ ៕សុផារី