ព្រះសីហនុ៖សមត្ថកិច្ចចម្រុះខេត្តព្រះសីហនុកាលពីព្រឹកថ្ងៃ៥ខែកក្កដាឆ្នាំ២០២០នេះបានដេញបង្ក្រាបអំពើប្លន់យកប្រាក់ពីពលរដ្ឋអ្នកប្រកបរបរដូរលុយ។ក្នុងនោះមានជនសង្ស័យម្នាក់ក្នុងចំណោមបក្ខពួក២នាក់ត្រូវបានឃាត់ខ្លួន។
សមត្ថកិច្ចបានឱ្យដឹងបឋមថាជនល្មើសមានគ្នា២នាក់ជាជនជាតិចិនបានធ្វើសកម្មភាពស្ទាក់ប្លន់ដោយប្រើដំបងវាយទៅលើជនរងគ្រោះ២នាក់ប្តីប្រពន្ធកំពុងជិះម៉ូតូតាមផ្លូវចេញចូលម្តុំជិតបុរីហ៊ីលតុនក្នុងសង្កាត់លេខ៤ក្រុងព្រះសីហនុ។នាវេលាម៉ោងជិត៩ព្រឹកថ្ងៃទី៥ខែកក្កដានេះបណ្តាលឱ្យជនរងគ្រោះរងរបួសក្នុងនោះជនល្មើសបានប្លន់យកលុយពីជនរងគ្រោះមួយថង់ប្រមាណ៣០លានរៀល រួចគេចខ្លួន។
ក្រោយពេលកើតហេតុ ក៏មានអន្តរាគមន៍ពីកងសន្តិសុខ ដោយព័ទ្ធចាប់បានជនសង្ស័យម្នាក់ ប្រគល់ជូនកម្លាំងកងរាជអាវុធហត្ថខេត្តនាំយកទៅសាកសួរបន្ត។ចំណែកជនល្មើសម្នាក់ទៀតបានរត់គេចខ្លួនចូលក្នុងព្រៃម្តុំនោះនាំយកលុយប្លន់បានទៅជាមួយដោយបន្សល់ទុកម៉ូតូជិះធ្វើសកម្មភាព។
បច្ចុប្បន្ននគរបាលជំនាញស្នងការដ្ឋាននគរបាលខេត្តបាននាំខ្លួនជនសង្ស័យនិងវត្ថុតាងយកមករក្សាទុក ហើយប្រតិបត្តិការរុករកជនល្មើស ដែលរត់គេចខ្លួន កំពុងធ្វើការរុករកបន្ត៕សហការី
