ព្រះវិហារ៖កាលពីរសៀលថ្ងៃទី១៨ខែកក្កដាឆ្នាំ២០២០សមត្ថកិច្ចបានចុះបង្ក្រាបបទល្មើសជាបន្តបន្ទាប់ក្នុងរយៈពេល២ថ្ងៃ។ជាលទ្ធផលរឹបអូសឈើប្រភេទលេខ២ជិត១០ម៉ែត្រគូបដែលឈ្មួញលាក់ទុកនៅ២ទីតាំងផ្សេងគ្នាក្នុងស្រុកឆែបខេត្តព្រះវិហារ។
លោកសុកសាន្តតារ៉ាអភិបាលស្រុកឆែបបានប្រាប់ឱ្យដឹងថាដោយអនុវត្តតាមបទបញ្ជារបស់ប្រមុខរាជរដ្ឋាភិបាលក៏ដូចជាបទបញ្ជារបស់នាយឧត្តមសេនីយ៍សៅសុខាប្រធានគណៈកម្មាធិការបង្ក្រាបបទល្មើសធនធានធម្មជាតិ។
ជាមួយនិងបទបញ្ជាលោកប្រាក់សុវណ្ណអភិបាលខេត្តស្តីពីការបង្ក្រាបនិងទប់ស្កាត់ការកាប់បំផ្លាញការដឹកជញ្ជូនឈើដោយខុសច្បាប់ឱ្យមានប្រសិទ្ធិភាពនោះអាជ្ញាធរស្រុកឆែបជានិច្ចជាកាលបានដឹកនាំកម្លាំងចម្រុះរបស់ស្រុកចុះបង្ក្រាបបានជាបន្តបន្ទាប់។
លោកអភិបាលស្រុកបានបន្តថាជាក់ស្តែងនាពេលកន្លងទៅកាលពីថ្ងៃទី១៦ខែកក្កដាឆ្នាំ២០២០បានចុះបង្ក្រាបនិងរឹបអូសឈើចំនួន៣,១២៧ម៉ែត្រគូបដែលជាឈើសន្និធិដោយគ្មានលិខិតអនុញ្ញាត។
ដែលឈ្មួញលាក់ទុកនៅភូមិឆែបលិចឃុំឆែបមួយស្រុកឆែបខេត្តព្រះវិហារ។នៅថ្ងៃទី១៧ខែកក្កដាអាជ្ញាធរបានចុះបង្ក្រាបនិងដកហូតឈើសរុប៥,៣៨១១ម៉ែត្រគូបដែលញ្មួញលាក់ទុកក្នុងព្រៃស្ថិតនៅភូមិពោធិទាបឃុំម្លូព្រៃមួយ ស្រុកឆែប។
ជាមួយគ្នានេះលោកអភិបាលស្រុកឆែបបានថ្លែងកោតសរសើរដល់កម្លាំងចម្រុះរបស់ស្រុកដែលកន្លងមកក៏ដូចជាបច្ចុប្បន្ននេះតែងតែខិតខំបំពេញតួនាទីភារកិច្ចបានល្អប្រសើរក្នុងការបង្ក្រាបនិងទប់ស្កាត់បាននូវបទល្មើសធនធានធម្មជាតិ បានជាបន្តបន្ទាប់ស្របតាមទិសដៅរបស់ថ្នាក់ដឹកនាំ៕ប៊ូ រ៉ា