ប៉ៃលិន៖អាជ្ញាធរខេត្តបានផ្តល់គ្រែអ្នកជំងឺស៊េរីទំនើបជាច្រើនគ្រែដើម្បីចូលរួមបំពេញសេចក្តីត្រូវការដែលមានការកើនឡើងនៃមន្ទីរពេទ្យបង្អែកខេត្តប៉ៃលិន។ក្នុងឱកាសផ្តល់គ្រែអ្នកជំងឺនៅថ្ងៃទី២០ខែកក្កដាឆ្នាំ២០២០កន្លងមកនេះលោកផាន់ចាន់ធុលអភិបាលខេត្តប៉ៃលិនបានលើកឡើងថា៖ការផ្តល់នូវគ្រឿងបរិក្ខាពេទ្យនេះជាការចូលរួមបំពេញនូវសេចក្តីត្រូវការលើកការផ្តល់សេវាសុខាភិបាលជូនប្រជាពលរដ្ឋឱ្យបានកាន់តែល្អប្រសើរឡើងថែមទៀត។
ជៀសវាងប្រជាពលរដ្ឋអ្នកជំងឺចូលទៅសម្រាកព្យាបាលហើយខ្វះខាតមិនមានគ្រែនិងមួយផ្នែកទៀតសំដៅលើកកម្ពស់អនាម័យអនុវត្តវិធានការប្រយុទ្ធប្រឆាំងនឹងជំងឺឆ្លងនានារួមទាំងជំងឺឆ្លងកូវីដ-១៩ផងដែរ។លោកអភិបាលខេត្តក៏បានណែនាំដល់ក្រុមគ្រូពេទ្យទាំងអស់ឱ្យបន្តខិតខំប្រឹងប្រែងបំពេញភារកិច្ចឱ្យបានល្អតាមមុខជំនាញរៀងៗខ្លួនធានាផ្តល់សេវាសុខមាលភាពជូនប្រជាពលរដ្ឋឱ្យបានមានប្រសិទ្ធភាព។
ត្រូវប្រកាន់ខ្ជាប់នូវសីលធម៌វិជ្ជាជីវ:របស់គ្រូពេទ្យដោយប្រើឥរិយាបទទន់ភ្លន់ពាក្យសំដីសមរម្យសាកសមជាលោកគ្រូដែលមានចំណេះដឹងខ្ពស់ជាទីមានទំនុកចិត្តសម្រាប់អ្នកជំងឺទើបមានការគាំទ្រក្តីស្រឡាញ់និងការរាប់អានកោតសរសើរពីសំណាក់បងប្អូនប្រជាពលរដ្ឋមកពីមជ្ឈដ្ឋានផ្សេងៗ។
ជាមួយនេះដែរលោកផាន់ចាន់ធុលក៏បានលើកឡើងនូវការកោតសរសើរខ្ពស់ចំពោះក្រុមគ្រូពេទ្យជំនាញដែលកន្លងបានចំណាយនិងរំលែកពេលវេលាជួបជុំក្រុមគ្រួសារមកបំពេញការងារភារកិច្ចរបស់ខ្លួនបម្រើដល់អ្នកជំងឺប្រកបដោយការយកចិត្តទុកដាក់និងទទួលខុសត្រូវខ្ពស់។ក្នុងការពិនិត្យតាមដានសុខភាពឬជំងឺធ្ងន់ស្រាលរបស់ប្រជាពលរដ្ឋ។
ជាមួយនោះថែមទាំងបានចូលរួមសហការយ៉ាងសកម្មផងដែរក្នុងការចុះអប់រំផ្សព្វផ្សាយដល់ពលរដ្ឋទូទៅ។ពិសេសកូនចៅប្រជាពលរដ្ឋជាពលករដែលទើបវិលមកពីក្រៅប្រទេសតាមការណែនាំរបស់ក្រសួងសុខាភិបាលដើម្បីរួមគ្នាបង្ការនិងទប់ស្កាត់ការរីករាលដាលនៃជំងឺកូវីដ-១៩។
ក្រៅពីការផ្តល់ជំនួយគ្រែអ្នកជំងឺទាំង១៥គ្រែក្រុមការងារអង្គភាពជុំវិញខេត្តក៏នាំយកនូវភេសជ្ជ:ចំនួន ២០កេសព្រមទាំងថវិកាចំនួន២លានរៀលថែមទៀតជួយដល់មន្ទីរពេទ្យបង្អែកខេត្តប៉ៃលិនជាការលើកទឹកចិត្ត៕ខុម
