មណ្ឌលគិរីៈមានរថយន្តធុនធំមួយគ្រឿងដឹកស្មៅពេញបានក្រឡាប់ពេលបើកបរបណ្តាលឱ្យបុរសជាកម្មករ២នាក់បានស្លាប់និងប្រុសស្រី៧នាក់ទៀតបានរងរបួស។ហេតុការណ៍នេះបានកើតឡើងនៅត្រង់បង្គោលគីឡូម៉ែត្រលេខ៧៦ភូមិអូរអាមឃុំស្រែខ្ទុមស្រុកកែវសីមាខេត្តមណ្ឌលគិរីកាលពីវេលារំលងអធ្រាត្រចូលថ្ងៃទី១០សីហា២០២០។
មន្ត្រីសមត្ថកិច្ចបានឱ្យដឹងថាៈជនរងគ្រោះទាំងអស់បានស្លាប់និងរបួសក្នុងគ្រោះថ្នាក់ចរាចរណ៍ក្រឡាប់រថយន្តឌុនធំម៉ាកយីឌុបពាក់ស្លាកលេខភ្នំពេញ៣A១៦៣១។រថយន្តនេះបានដឹងផ្ទាំងស្មៅ(ស្មៅទុកដាំវិញ)ទិសដៅពីភ្នំពេញទៅទីរួមខេត្តមណ្ឌលគិរី។លុះដល់ចំណុចកើតហេតុក្នុងស្ថានភាពផ្លូវឡើងទួលរថយន្តបានថយក្រោយធ្លាក់ចេញពីផ្លូវចូលក្នុងលូខាងស្តាំដៃ។
ប្រភពដដែលបានបន្តថាៈគ្រោះថ្នាក់ចរាចរណ៍កើតឡើងដោយខ្លួនឯងនេះបុរសជាកម្មករ២នាក់ត្រូវផ្ទាំងស្មៅកប់ពីលើបណ្តាលឱ្យស្លាប់នៅនឹងកន្លែង។ក្នុងនោះជនរងគ្រោះចំនួន៧នាក់បានបញ្ជួនទៅសង្គ្រោះនៅមន្ទីរពេទ្យឯកជនមួយក្នុងស្រុកកែវសីមា។ចំពោះតៃកុងបានរត់គេចខ្លួនបាត់។បច្ចុប្បន្ននគរបាលចរាចរណ៍កំពុងអន្តរាគមន៍នៅចំណុចកើតហេតុ៕ចាន់បុត្រ
