ភ្នំពេញ៖សមាជិកយុវជន ខ្មែរថាវរៈ ចំនួន ៦នាក់ ត្រូវ បាន សមត្ថកិច្ចឃាត់ ខ្លួននាំទៅស្នងការដ្ឋាន នគរបាលរាជធានីភ្នំពេញ កាលពីរសៀលថ្ងៃទី១៣ ខែសីហា ឆ្នាំ២០២០ ពាក់ ព័ន្ធការភាពវឹកវរដល់សន្តិសុខសង្គម។ ការចាប់ខ្លួននេះ ផ្តើមដំបូងសមត្ថកិច្ចបានចាប់ខ្លួនកញ្ញា ឈឿន ដារាវីនៅជិតសាលាដំបូងរាជធានីភ្នំពេញខណៈពេលដែលស្រែកតវ៉ាទាមទារឱ្យមានការដោះលែងលោករ៉ុង ឈុន។បន្ទាប់មកមនុស្សចំនួន ៥នាក់ទៀត ត្រូវបាននាំខ្លួននៅក្នុងផ្ទះ ជួលមួយ កន្លែងនៅសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ក្រុមយុវជនចលនា ខ្មែរថាវរៈ ដែលត្រូវបាននាំខ្លួនទៅកាន់ស្នងការដ្ឋាននគរបាលរាជធានីភ្នំពេញ មានដូចជាៈ ១. កញ្ញា ឈឿន ដារ៉ាវី២.លោក ហ៊ុន វណ្ណៈ៣. លោក ថា ឡាវី៤. កញ្ញា ជា គុនធីន
៥. កញ្ញា យ៉ង សុខហៃ ៦. កញ្ញា សូ មេត្តា ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគររាជធានីភ្នំពេញ បាន មានប្រសាសន៍ ប្រាប់រស្មីកម្ពុជាថា សមត្ថកិច្ចបានអនុវត្តតាមដីការបស់តុលាការជាមួយកញ្ញា ឈឿន ដារ៉ាវី បង្កភាពវឹកវរដល់សន្តិសុខសង្គម ។សមត្ថកិច្ចក៏បានអនុវត្តតាមបញ្ជា របស់ ព្រះរាជអាជ្ញា សមត្ថកិច្ចក៏បានទៅឆេកឆេររកវត្ថុតាងនៅផ្ទះបន្ថែមទៀតនៅក្នុងរឿងនេះ។
គ្នាគាត់ (ឈឿន ដារ៉ាវី) បានទៅឡាំប៉ាស្រែកឡូឡា និងឡាយតាមហ្វេសប៊ុក។ ដោយលោកស្នងការបញ្ជាក់ថា “មនុស្ស៥នាក់ ដែលនៅផ្ទះ គឺហៅមកដើម្បីសួរព័ត៌មាន ដើម្បីអប់រំកុំឱ្យគាត់ធ្វើអ្វីដែលខុសច្បាប់ មិនមែនឃាត់ទាំងអស់នឹងទេ យើងឃាត់តែ ឈឿន ដារ៉ាវី ម្នាក់ទេ តាមដីការបស់តុលាការ គាត់បង្កនូវភាពវឹកវរដល់សន្តិសុខសង្គម”។
សូមជម្រាបថា បន្ទាប់ពីសមត្ថកកិច្ចចាប់ខ្លួនលោករ៉ុង ឈុន ក្រុមយុវជនខាងលើនេះ បាន ធ្វើការតវ៉ាទាមទារឱ្យដោះលែងលោករ៉ុង ឈុន។ដោយការតវ៉ារបស់ពួកគេ គឺបានដើរស្រែកនៅតាមទីសាធារណៈ មុខតុលាការ ដែលធ្វើឱ្យបាត់បង់សណ្តាប់ធ្នាប់សាធារណៈ លើសពីនេះ ការដើរតវ៉ាគ្មានការសុំច្បាប់ ឬជូនដំណឹងទៅអាជ្ញាធរមានសមត្ថកិច្ចនោះទេ៕សុភាព