បន្ទាយមានជ័យ៖រថយន្តបើកបុកម៉ូតូកង់បីបណ្តាលឱ្យស្លាប់ប្ដីនិងប្រពន្ធនៅនឹងកន្លែងភ្លាមៗឯអ្នកបើករថយន្តគេចខ្លួនបាត់។គ្រោះថ្នាក់ចរាចរណ៍នេះបានកើតឡើងនៅលើកំណាត់ផ្លូវជាតិលេខ៥ស្ថិតក្នុងភូមិសូរិយាថ្មីឃុំកូបស្រុកអូរជ្រៅខេត្តបន្ទាយមានជ័យកាលពីម៉ោង៣ទៀបភ្លឺចូលថ្ងៃទី៣១ខែសីហាឆ្នាំ២០២០។
មន្ត្រីនគរបាលស្រុកអូរជ្រៅបានឱ្យដឹងថា៖ជនរងគ្រោះដែលស្លាប់ឈ្មោះស៊ុនជៀនភេទប្រុសអាយុ៤៥ឆ្នាំជាប្តីនិងប្រពន្ធមានឈ្មោះភន់ច័ន្ទថាភេទស្រីអាយុ៤៧ឆ្នាំ។ទាំង២នាក់នៅភូមិផ្សារកណ្ដាលសង្កាត់ផ្សារកណ្ដាលក្រុងប៉ោយប៉ែតខេត្តបន្ទាយមានជ័យ។នៅមុនពេលកើតហេតុជនរងគ្រោះបានបើកម៉ូតូកង់បី ក្នុងទិសដៅពីលិច ទៅកើត ។
មកដល់ចំណុចកើតហេតុស្រាប់តែមានរថយន្ត១គឿងម៉ាកLexusNX300ពណ៌ខ្មៅពាក់ស្លាកលេខបន្ទាយមានជ័យ2B.7979បើកក្នុងទិសដៅស្របគ្នាទៅបុកម៉ូតូកង់បីពីក្រោយពេញទំហឹងបណ្ដាលឱ្យស្លាប់ទាំង២នាក់ប្តីប្រពន្ធ។ឯអ្នកបើករថយន្តបង្កបានចុះពីរថយន្តបានរត់គេចខ្លួនបាត់៕