ខេត្តព្រះវិហារ៖ បុគ្គលិកមន្ត្រីរាជការ ប្រមាណ ៥០នាក់ មកពីតាមបណ្តាស្ថាប័ន មន្ទីរចំនួន១០នៅក្នុងខេត្តព្រះវិហារទទួលបានការពង្រឹងសមត្ថភាពបន្ថែមតាមរយៈការបើកអង្គសិក្ខាសាលាមួយ បណ្តុះបណ្តាលចំណេះដឹងលើផ្នែកហិរញ្ញវត្ថុ។ សម្រាប់អភិវឌ្ឍន៍សហគ្រិនភាពស្ត្រី មានរយៈពេល ២ថ្ងៃចាប់ពីថ្ងៃទី ២១កញ្ញា ដល់ថ្ងៃទី២២កញ្ញាឆ្នាំ២០២០ នៅមន្ទីរអប់រំ យុវជន និងកីឡាខេត្តព្រះវិហារ។
វគ្គបណ្តុះបណ្តាលរយៈពេល២ថ្ងៃនេះមានការអញ្ជើញជាអធិបតីពីលោកស្រីច័ន្ទសូរីយ៍រដ្ឋលេខាធិការក្រសួងកិច្ចការនារី,លោកស្រីចឹកហេងអភិបាលរងខេត្តព្រះវិហារ។រួមមានការចូលរួមពីអគ្គនាយករងក្រសួងកិច្ចការនារី ,ប្រធាននាយកដ្ឋាននិតិកម្មធនាគាជាតិ ,ប្រធានមន្ទីរកិច្ចការនារី ខេត្តព្រះវិហារ រួមនឹងសិក្ខាកាមសិក្សាមកពីមន្ទីរ ចំនួន ១០ នៅក្នុងខេត្តព្រះវិហារ។
លោកស្រី ចឹក ហេង បានសម្តែងគារវកិច្ចស្វាគមន៍ នូវដំណើរអញ្ជើញមក កាន់ខេត្តព្រះវិហារ របស់គណៈប្រតិភូក្រសួងកិច្ចការនារី ,ក្រុមហ៊ុន វីសា និងធនាគារជាតិនៃកម្ពុជា ដែលបានផ្តល់វគ្គបណ្តុះបណ្តាល ដើម្បីបង្កើន និងពង្រឹងសមត្ថភាពធនធានចំណេះដឹង លើផ្នែកហិរញ្ញវត្ថុ។ សម្រាប់អភិវឌ្ឍន៍សហគ្រិនភាពស្ត្រី នៅក្នុងខេត្តព្រះវិហារ ភាគឧត្តរប្រទេសកម្ពុជា ។
លោកស្រី ច័ន្ទ សូរីយ៍រដ្ឋលេខាធិការក្រសួងកិច្ចនារី បានមានប្រសាសន៍ថា ក្រសួងកិច្ចការនារី ធនាគាជាតិនៃកម្ពុជា និងក្រុមហ៊ុន វីសា ដែលជាក្រុមហ៊ុនឈានមុខគេលើពិភពលោក នៅក្នុងការទូទាត់ តាមប្រព័ន្ធឌីជីថល។ ខណៈនេះបានរៀបចំបើកវគ្គបណ្ដុះបណ្ដាលនេះឡើង ក្នុងគោលបំណង ដើម្បីបង្កើន ចំណេះដឹង ដល់មន្ត្រីបុគ្គលិកនៃមន្ទីរ និងមជ្ឈមណ្ឌលអភិវឌ្ឍន៍ស្ត្រី ។
អំពីការគ្រប់គ្រងហិរញ្ញវត្ថុ ការប្រើប្រាស់ សេវាហិរញ្ញវត្ថុផ្លូវការ និងការប្រើប្រាស់ប្រព័ន្ធឌីជីថល សម្រាប់សេវាកម្មហិរញ្ញវត្ថុក្នុងការនាំយកទៅផ្សព្វផ្សាយបន្តសម្រាប់ជួយគាំទ្រដល់ការអភិវឌ្ឍន៍អាជីវកម្ម និងធុរៈកិច្ចរបស់ស្ត្រីនៅតាមមូលដ្ឋាន ក្នុងប្រទេស កម្ពុជា៕វ៉ាន់ឌី
