កំពង់ស្ពឺ: ពលរដ្ឋជាអ្នកប្រកបរបរដឹករទេះគោលក់តាមរ៉ឺម៉កម៉ូតូ នៅក្នុងភូមិសាស្ត្រនានា ដោយនាំគ្នាធ្វើដំណើរតាំងពីខេត្តកំពង់ចាម ខេត្តកំពង់ធំ មកលក់ដូរនៅក្នុងខេត្តកំពង់ស្ពឺ ដល់ល្ងាចត្រង់កន្លែងណា នាំគ្នាសុំវត្តព្រះសង្ឃស្នាក់នៅបណ្តោះអាសន្ន រហូតដល់លក់ដាច់អស់ ទើបនាំគ្នាត្រឡប់ទៅផ្ទះវិញ។
បើតាមសម្តីពលរដ្ឋឈ្មោះ ចិន ចិត្ត ភេទប្រុស អាយុ៤៥ឆ្នាំ រស់នៅភូមិត្រពាំងគ ឃុំត្រពាំងគ ស្រុកជើងព្រៃ ខេត្តកំពង់ចាម ឈ្មោះ ខឹម ថន ភេទប្រុស អាយុ៤៨ឆ្នាំ និង ឈ្មោះ ឌី យិន ភេទប្រុស អាយុ៤៦ឆ្នាំ រស់ នៅក្នុងភូមិត្រពាំងជ្រៃ និងភូមិតាឌុក ឃុំបល័ង្ក ស្រុកបារាយណ៍ ខេត្តកំពង់ធំ។
លោក បានរៀបរាប់ឱ្យដឹងកាលពីល្ងាចថ្ងៃទី២៧ខែកញ្ញាឆ្នាំ២០២០ថា៖ ពួកគាត់បាននាំគ្នាដឹករទេះបុរាណ (រទេះសាឡី) ចេញពីខេត្តកំពង់ចាម ចំនួន១១គ្រឿង ដោយបើកបរដឹកតាមរ៉ឺម៉កម៉ូតូមកលក់ដូរនៅតាមភូមិស្រុកក្នុងខេត្តនានា។ ភាគច្រើនគេទិញយកទៅដាក់តាំងលម្អនៅតាមគហដ្ឋាន ឬរមណីយដ្ឋាន។
ពួកគាត់បានបន្តថា រទេះបុរាណទាំងអស់នេះ ធ្វើឡើងពីឈើគ្រញូង, ឈើធ្នង់, និងឈើកកោះជាដើម ហើយរទេះមួយគ្រឿងលក់ក្នុងតម្លៃ៣៥០ដុល្លារ ដោយអាចបញ្ចុះតម្លៃខ្លះៗដែរ។ ការបើកបររ៉ឺម៉កម៉ូតូដើរលក់រទេះបុរាណ ដែលពួកគាត់ទិញពីខេត្តកំពង់ចាម គឺដើរលក់ដូរនៅក្នុងខេត្តកំពង់ស្ពឺ រយ:ពេល៣ថ្ងៃមកហើយ ។មានម្ចាស់រមណីយដ្ឋាន និងផ្ទះសំណាក់ នាំគ្នាមកតថ្លៃ ដើម្បីទិញយកទៅដាក់តាំងលម្អចំនួន២ទៅ៣គ្រឿងដែរ ហើយពួកគាត់ក៏នៅបន្តលក់ដូរ រហូតដល់ដាច់អស់ ទើបនាំគ្នាត្រឡប់ទៅស្រុកកំណើតវិញ។
ពួកគាត់បញ្ជាក់ថា រទេះបុរាណ (សាឡី)នេះ មិនសូវធំដូចរទេះដឹកកណ្តាប់ស្រូវនោះទេ ជារទេះគោដែលមានលក្ខណៈតូច អាចដឹកបានតិចតួចប៉ុណ្ណោះ។ តែរទេះគោទាំងអស់នេះ មានចំណាប់អារម្មណ៍ភ្ញៀវទេសចរ ខណៈគេទិញយកទៅតាំងលំអ អាចទាក់ទាញឱ្យភ្ញៀវចូលទៅលេង ។ព្រោះបច្ចុប្បន្នរទេះគោស្ទើរតែជិតបាត់បង់អស់រលីងទៅហើយ។ គាត់ថា មុខរបរដឹករទេះគោលក់តាមរ៉ឺម៉កម៉ូតូតាមបណ្តាខេត្តខាងលើ អាចផ្គត់ផ្គង់ជីភាពបានសមរម្យ៕សុភ័ណ្ឌ
