ភ្នំពេញៈរដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទលោក វេង សាខុនកាលពីថ្ងៃទី ១២ខែតុលា ឆ្នាំ២០២០ បាននាំលោកស្រី ខាមេន មូរ៉េណូ ( Carmen Moreno) ឯកអគ្គរដ្ឋទូតសហភាពអឺរ៉ុបប្រចាំកម្ពុជា និងតំណាងអង្គការម្ចាស់ជំនួយមួយចំនួនរួមមាន AFD, FAO និង UNIDO មកភ្លក់រស់ជាតិកង្កែបបោក នៅស្រុកប្រាសាទបាគង ខេត្តសៀមរាប ។
មន្ត្រីក្រសួងកសិកម្ម បានឱ្យដឹងថា ការភ្លក់រស់ជាតិកង្កែបបោកនេះបានធ្វើឡើងនៅក្នុងអំឡុងពេល ដែល លោក វេង សាខុន និង លោកស្រីទូត ព្រមទាំងសមាជិកនៃគណប្រតិភូ បាន អញ្ជើញមកកាន់ទឹកដីអង្គរ។ក្នុងបំណងចុះមកពិនិត្យតាមដាននិងវាយតម្លៃលើវឌ្ឍនភាពនៃការអនុវត្តកម្ម វិធី CaPFish-Capture និង CaPFish Aquaculture ដែលកំពុងដំណើរការក្រោម ជំនួយហិរញ្ញវត្ថុពីសហភាពអឺរ៉ុបចំនួន ៨៧លានអឺរ៉ូ សម្រាប់រយៈពេល៦ឆ្នាំ។
ប្រភពដដែលបានបន្តថា ការភ្លក់រស់ជាតិកង្កែបបោក ដែលជាអាហារប្រពៃណី និង ជាអាហារមូលដ្ឋានរបស់ពលរដ្ឋខ្មែរមួយប្រភេទ នោះ គឺនៅពេលដែលគណប្រតិភូបានចុះទៅ
ពិនិត្យកសិដ្ឋានបង្កាត់-ភ្ញាស់កង្កែបរបស់លោកគង់ គីមឆាវ នៅភូមិអង្គ្រង ឃុំកន្ទ្រាំង ស្រុកប្រាសាទបាគង ដែលកំពុងតែជោគជ័យនៅក្នុងរបរចិញ្ចឹមកង្កែបរបស់លោក ។
កង្កែបបោក គឺជាប្រភេទមុខម្ហូបប្រពៃណីមួយ របស់ខ្មែរ ។ អាហារប្រភេទនេះផ្សំឡើងជាពិសេស ដោយគ្រឿងផ្សំគោលគឺកង្កែប ហើយក្រៅពីនោះ គឺមាន សាច់ជ្រូកបីជាន់ គ្រឿងបុក ។ដែលរួមមានដូចជា គល់ស្លឹកគ្រៃ រមៀត ម្តេង ខ្ទឹមស ស្លឹកក្រូចសើច,ខ្ទឹមក្រហម ខ្ទឹមស ចិញ្ច្រាំអោយល្អិត ទឹកត្រី អំបិល ស្ក ម្សៅស៊ុប ញាត់ចូលកង្កែប ឲ្យប៉ោងរួចយកទៅអាំង៕ភិ រុម
