អន្តរជាតិ(CNA)៖ ប្រធានាធិបតីបារាំងលោក អ៊ែមម៉ានុយអ៊ែល ម៉ាក្រុង (Emmanuel Macron) កាលពីថ្ងៃពុធសប្ដាហ៍នេះ(ខែតុលាឆ្នាំ២០០២) បានសម្រេចប្រកាសដាក់ចេញនូវវិធានការ «បំរាមគោចរពេលយប់»សម្រាប់ទីក្រុងប៉ារីសនិងទីក្រុងចំនួន៨ផ្សេងទៀតនៃប្រទេសបារាំង។ដើម្បីទប់ស្កាត់ការឆ្លងរីករាលដាលនៃជំងឺCOVID19បន្ទាប់ពីអត្រាឆ្លងថ្មីៗប្រចាំថ្ងៃបាននិងកំពុងឈានដល់កម្រិតគួរឱ្យព្រួយបារម្ភ។
លោក Emmanuel Macronនិយាយថា ទីក្រុងចំនួន៩ដែលត្រូវបានកំណត់ឱ្យអនុវត្តវិធានការខាងលើ រួមមានទីក្រុងប៉ារីស (Paris) និងតំបន់ជុំវិញ, ក៏ដូចជាទីក្រុង ហ្គ្រេនូបល (Grenoble), លីលល៍ (Lille), លីយ៉ុង (Lyon), ម៉ាសី (Marseille), ម៉ុងប៉េលី (Montpellier), រុរ៉ន (Rouen), សង់អ៊ីត្យេន (Saint-Etienne), និង ទូលួស (Toulouse)។
នៅក្នុងបទសម្ភាសន៍តាមកញ្ចក់ទូរទស្សន៍លោកMacronបានប្រាប់ថា«អ្នករស់នៅក្នុងទីក្រុងទាំងឡាយខាងលើ ដែលជាកន្លែងមានប្រជាជនប្រហែល២០លាននាក់ក្នុងចំណោមប្រជាជនបារាំងសរុបប្រមាណ ៦៧លាននាក់ នឹងមិនត្រូវបានអនុញ្ញាតឱ្យនៅខាងក្រៅនៅចន្លោះម៉ោង ៩៖០០នាទីយប់ ដល់ម៉ោង ៦៖០០នាទីព្រឹកនោះទេ។ វិធានការនេះនឹងចាប់ផ្ដើមអនុវត្តចាប់ពីថ្ងៃសៅរ៍សប្ដាហ៍នេះតទៅ ក្នុងរយៈពេលយ៉ាងហោចណាស់ ០៤សប្តាហ៍ លើកលែងសម្រាប់តែហេតុផលចាំបាច់តែប៉ុណ្ណោះ។
លោកMacronបន្ថែមថាជុំវិញវិធានការខាងលើនេះប្រសិនបើនរណាម្នាក់ត្រូវបានគេរកឃើញនៅខាងក្រៅដោយគ្មានការអនុញ្ញាតពិសេសក្នុងអំឡុងពេលកំពុងអនុវត្តបំរាមគោចរនេះនឹងត្រូវប្រឈមនឹងការផាកពិន័យជាទឹកប្រាក់ចំនួន ១៥៩ដុល្លារអាមេរិកនិងច្រើនជាងនេះ១០ដងសម្រាប់ជនល្មើសច្រំដែល»។
គួរជម្រាបថា បច្ចុប្បន្ននេះ ប្រទេសបារាំងមានករណីឆ្លង COVID-19 សរុបនៅទូទាំងប្រទេសជាង ៧៧៩.០០០ករណី ក្នុងនោះមានអ្នកស្លាប់ជាង ៣៣.០០០នាក់ និងជាសះស្បើយជាង ១០៣.៤០០នាក់៕Derm rang