កំពតៈអ្នកចិញ្ចឹមចង្រិតនៅស្រុកកំពង់ត្រាចខេត្តកំពតកំពុងមានភាពកាក់កបដោយអាចរកប្រាក់ចំណូលបានដ៏ច្រើនសន្ធឹកសន្ធាប់ក្នុងការប្រមូលផលម្តងៗដែលប្រើរយៈពេលត្រឹមតែជាងមួយខែប៉ុណ្ណោះ។
បុរសឈ្មោះអ៊ិចផុកអាយុ៥២ឆ្នាំរស់នៅភូមិបឹងធំខាងលិចឃុំអង្គសុរភីស្រុកកំពង់ត្រាចខេត្តកំពតបានរៀបរាប់ថាៈរយៈពេលជិតបីឆ្នាំហើយដែលគ្រួសាររបស់លោកប្តូរមុខរបរពីការចេញទៅរកស៊ីខាងក្រៅមកចាប់យកអាជីពចិញ្ចឹមចង្រិតលក់។
មកដល់ពេលនេះលោកបង្កើតបានអាងចំនួន១១មានផ្ទៃជិត៦០ម៉ែត្រក្រឡាដែលអាចទទួលផលពី៨០០គីឡូក្រាមទៅ៩០០គីឡូក្រាមបន្ទាប់ពីការដាក់ពងនិងថែទាំជាងមួយខែ។កសិករដដែលបានបញ្ជាក់ថាចង្រិតមានពូជពីរប្រភេទគឺពូជខ្មៅ និងពូជក្រហម។
រីឯតម្លៃនៃការលក់ចេញ ចង្រិតក្រហមក្នុង១គីឡូក្រាមពី៨.០០០រៀល ទៅ៩.០០០រៀល។
ចំណែកចង្រិតខ្មៅមានតម្លៃពី១០.០០០រៀលទៅ១១.០០០រៀលក្នុងមួយគីឡូក្រាម។ លោក អ៊ិច ផុក បានបន្ត ការបានទទួលផលមានរយៈពេលខុសគ្នា ដោយចង្រិតក្រហមពី៥០ថ្ងៃទៅ៦០ថ្ងៃ ឯកចង្រិតខ្មៅត្រឹមតែពី៣៥ថ្ងៃទៅ ៣៦ថ្ងៃប៉ុណ្ណោះ។
សម្រាប់ចង្រិតក្រហមទោះបីអ្នកមិនធ្លាប់ឆ្លងកាត់ការរៀនសូត្រក៏អាចចិញ្ចឹមបានដែរ។ប៉ុន្តែចង្រិតខ្មៅតម្រូវឱ្យមានជំនាញច្បាស់លាស់បើមិនដូច្នោះទេងាយប្រឈមនឹងការខាតបង់បំផុត។អ្នកចិញ្ចឹមចង្រិតរូបនេះបានបញ្ជាក់ថា ពីមុនលោកចិញ្ចឹមទាំងពីរប្រភេទ តែសព្វថ្ងៃចិញ្ចឹមតែចង្រិតខ្មៅ ហើយរក្សាពងសម្រាប់លក់ឱ្យអ្នកយកទៅចិញ្ចឹមបន្តទៀតផង។
តម្លៃលក់ពូជគឺមួយកញ្ចប់ដែលមានបរិមាណពងចង្រិត៥ចានក្នុងតម្លៃ៦ម៉ឺនរៀល ឬ៤ម៉ឺនរៀលចំពោះអ្នកមាជីវភាពខ្វះខាត។ការលក់ជូននូវតម្លៃនេះគឺលោកតាមជួយបង្ហាត់បង្ហាញអំពីការចិញ្ចឹមរបៀបថែទាំនិងកិច្ចការផ្សេងៗទៀតពាក់ព័ន្ធនឹងអាជីវកម្មចិញ្ចឹមចង្រិត។
ប្រសិបើទិញយកតែពងពូជលោកលក់ត្រឹមតម្លៃតែ២ម៉ឺនរៀលទេ។
លោកអ៊ិចផុកបានប្រាប់ឱ្យដឹងថាៈកាលពីជិតបីឆ្នាំមុនលោកបានទៅរៀនយកចំណេះដឹងផ្នែកចិញ្ចឹមចង្រិតពីអ្នកជំនាញម្នាក់នៅខេត្តបន្ទាយមានជ័យ។មកដល់ពេលនេះអ្នកភូមិក្នុងស្រុកកំពង់ត្រាចជិត៤០គ្រួសារហើយដែលបានទទួលការបង្ហាត់បង្ហាញ និងកំពុងប្រកបរបរចិញ្ចឹមចង្រិតដូចរូបលោក។
លោក ចឹក ចាន់លី ប្រធានការិយាល័យកសិកម្មស្រុកកំពង់ត្រាចបានបញ្ជាក់ថា បច្ចុប្បន្ន នៅទូទាំងស្រុកកំពង់ត្រាចមានអ្នកចិញ្ចឹមចង្រិតចំនួន៣៨គ្រួសារ។ ខាងលោកមិនមានឧបករណ៍ សម្ភារៈសម្រាប់បណ្តុះបណ្តាលជំនាញដល់ប្រជាកសិករទេគឺគ្រាន់តែបានជួយតម្រង់ទិសមួយចំនួនប៉ុណ្ណោះ។
លោកប្រធានការិយាល័យបានបន្តថា ដោយសារឃើញចំនួនអ្នកចិញ្ចឹមកើនឡើងកាន់តែច្រើន លោកបានណែនាំពួកគាត់ដោយធ្វើយ៉ាងណាកុំឱ្យវេលានៃការទទួលផលជាន់ពេលគ្នាដែលធ្វើឱ្យតម្លៃចុះថោកនិងយកចិត្តទុកដាក់ក្នុងការថែទាំដើម្បីបញ្ចៀសពីការខាតបង់។នេះជាបញ្ហាប្រឈមដែលលោកមានការព្រួយបារម្ភ។
លោកចឹកចាន់លីបានបញ្ជាក់ថាៈជាការកត់សម្គាល់មុខរបរនេះអាចរកប្រាក់ចំណូលបានច្រើនសន្ធឹកសន្ធាប់ក្នុងពេលប្រមូលផលម្តងៗ។ជាក់ស្តែងពេលចាប់ផ្តើមដំបូងគ្រួសារលោកអ៊ិចផុកមានលទ្ធភាពបង្កើតអាងចិញ្ចឹមត្រឹមតែពីរប៉ុណ្ណោះ៕ឌីណា