ព្រះវិហារ៖គ្រោះថ្នាក់ចរាចរណ៍មួយបង្កដោយរថយន្ដប្រភេទវេអងធុនធំដឹកកូនឈើធ្នុងរបស់សាលារាជធានីភ្នំពេញបានដាច់ចង្កូតរ៉េចូលប្រឡាយបណ្តាលឱ្យក្រឡាប់មួយគ្រឿងក្នុងចំណោម២គ្រឿង។ហេតុការណ៍នេះបានកើតឡើងនៅលើដងផ្លូវជាតិលេខ៦២ ចន្លោះគីឡូម៉ែត្រ លេខ៧២-៧៣ស្ថិតត្រង់ព្រៃពពេលក្នុងភូមិត្រពាំងទទឹមឃុំរមទមស្រុករវៀងខេត្តព្រះវិហារកាលពីយប់ថ្ងៃទី១១ខែវិច្ឆិកាឆ្នាំ២០២០។
មន្ត្រីសមត្ថកិច្ចបានឱ្យដឹងថា រថយន្ដវេអង ក្បាលសរ ទ្រុងខៀវ ពាក់ផ្លាកលេខ ព្រះសីហនុ 4A-3650 ដឹកកូនឈើធ្នុងចេញពីភូមិបាក់កាំឃុំឈានមុខស្រុកត្បែងមានជ័យខេត្តព្រះវិហារយកទៅដាំនៅរាជធានីភ្នំពេញរបស់សាលាក្រុងភ្នំពេញ។មន្ត្រីដដែលបានបន្តថាៈលុះដល់ចំណុចកើតហេតុរថយន្ដបានដាច់ចង្កូតធ្លាក់ក្រឡាប់ខ្ទាតចេញកូនឈើធ្នុងដែលបានផ្សាំរួចរាប់រយដើម។
ប្រភពបានបន្តថាៈរថយន្ដរបស់សាលារាជធានីភ្នំពេញដែលប្រមូលទិញកូនឈើប្រភេទធ្នុងពីប្រជាពលរដ្ឋដែលពួកគាត់បានគាស់យកផ្សាំរួចលក់ក្នុង១ដើមតំលៃ១០.០០០រៀល។សូមបញ្ជាក់ថាកាលពីយប់ថ្ងៃទី១១ខែវិច្ឆិកាឆ្នាំ២០២០រថយន្ដវេអង២គ្រឿងរបស់សាលារាជធានីភ្នំពេញបានដឹកកូនឈើធ្នុងចេញពីចំណុចខាងលើ១គ្រឿងត្រូវបានដឹកចេញទៅដោយសុវត្ថិភាពនឹងមួយគ្រឿងទៀតជួបឧប្បត្តិហេតុតែមិនបង្កគ្រោះថ្នាក់ធ្ងន់ធ្ងរនោះទេ។
លោកពឹងទ្រីដាប្រធានមន្ទីកសិកម្មនិងរុក្ខាប្រមាញ់ខេត្តព្រះវិហារបានឱ្យដឹងថារថយន្ដវេអងដឹកកូនឈើធ្នុងខាងលើពិតជារបស់សាលារាជធានីភ្នំពេញ នឹងមានច្បាប់ត្រឹមត្រូវពិតប្រាកដមែន៕វ៉ាន់ឌី/