សៀមរាប៖ការសាងសង់លំនៅស្ថានក្នុងតំបន់រមណីយដ្ឋានអង្គរត្រូវតែប្រព្រឹត្តិទៅតាមលក្ខខណ្ឌដែលបានកំណត់ដោយច្បាប់គ្រប់គ្រងដោយអាជ្ញាធរជាតិអប្សរាដើម្បីរក្សាបាននូវទេសភាពវប្បធម៌ អត្តសញ្ញាណខ្មែរបុរាណដ្ឋាន។ត្រូវការពារនិងចៀសវាងការបំផ្លាញផ្សេងៗនៅក្នុងតំបន់បេតិកភណ្ឌពិភពលោក។តើប្រជាពលរដ្ឋក្នុងតំបន់អង្គរត្រូវមានឯកសារអ្វីខ្លះដើម្បីស្នើសុំសាងផ្ទះថ្មីជំនួសផ្ទះចាស់បាន?
តាមការរៀបរាប់របស់លោកតាកែវផៃពលរដ្ឋនៅភូមិអូរទទឹងឃុំព្រះដាក់ស្រុកបន្ទាយស្រីដែលទើបសង់ផ្ទះរួចបានបរិយាយថាៈខ្ញុំស្នើសុំច្បាប់សាងសង់ផ្ទះមិនមានការលំបាកទេត្រឹម១ខែគេចេញច្បាប់ឱ្យធ្វើ ព្រោះខ្ញុំមានឯកសារគ្រប់គ្រាន់និងត្រឹមត្រូវតាមលក្ខខណ្ឌដែលអាជ្ញាធរជាតិអប្សរាបានកំណត់។
ក្នុងនោះមានដូចជាខ្ញុំជាអ្នកស្រុកចាស់រស់នៅតាំងពីឆ្នាំ១៩៨០ជាង,មានខ្នងផ្ទះចាស់,មានឯកសារកាន់កាប់ដីធ្លីស្របច្បាប់,មានសៀវភៅគ្រួសារ,និងអត្តសញ្ញាណបណ្ណសញ្ជាតិខ្មែរ។មុននិងក្រោយអនុញ្ញាតច្បាប់សាងសង់អាជ្ញាធរជាតិអប្សរាតែងចុះមកពិនិត្យ ថតរូប ក៏ដូចជាប្រឹក្សាយោបល់ផ្សេងៗ។ ពេលបាន ច្បាប់សាងសង់ហើយ យើងកុំធ្វើហួសពីការស្នើសុំ ឬក៏លួចធ្វើដោយគ្មានការអនុញ្ញាត។
ចំណែកលោកសួងដានីពលរដ្ឋក្នុងភូមិឃុំខាងលើក៏បានលើកឡើងថាៈខ្ញុំបានសុំច្បាប់សាងសង់តាមរយៈមេភូមិ ហើយមិនមានជួបការលំបាកអីទេ ព្រោះខ្ញុំភ្ជាប់ជាមួយឯកសារដែលគេត្រូវការត្រឹមត្រូវ។ មិនតែប៉ុណ្ណោះអាជ្ញាធរជាតិអប្សរាបានជួយសម្របសម្រួលគូសប្លង់បច្ចេកទេសនិងរចនាបទផ្ទះបែបខ្មែរឱ្យខ្ញុំទៀតផង។ចំពោះការដាក់ពាក្យស្នើសុំវិញក៏ពុំមានការបង់ប្រាក់ដែរហើយខ្ញុំក៏គោរពទៅតាមការស្នើសុំទាំងម៉ូតផ្ទះទំហំរបងមិនឱ្យលើសពីច្បាប់សុំ។
ក្នុងនោះដែរលោកដានីក៏បានផ្តាំផ្ញើដល់ប្រជាពលរដ្ឋនៅក្នុងឧទ្យានអង្គរទាំងអស់មុនធ្វើផ្ទះធ្វើសំណង់អ្វីមួយត្រូវគោរពតាមច្បាប់ត្រូវមានឯកសារគ្រប់គ្រាន់និងស្របតាមលក្ខខណ្ឌកំណត់នោះមិនមានផលលំបាកក្នុងការស្នើសុំសាងសង់ទេ។ចៀសវាងការលួចធ្វើតាមចិត្តឯងដែលនាំឱ្យប៉ះពាល់ដល់តម្លៃរមណីយដ្ឋានអង្គរនិងផលប្រយោជន៍ខ្លួន។
លោកខៀវវិចិត្រមន្ត្រីបច្ចេកទេសនៃនាយកដ្ឋានរៀបចំដែនដីនិងគ្រប់គ្រងលំនៅស្ថានក្នុងតំបន់អង្គរបាន បញ្ជាក់ថា បើប្រជាពលរដ្ឋមានបំណងចង់ដាក់ពាក្យស្នើសុំសាងសង់លំនៅស្ថាន ជួសជុលតូចតាច និងសំណើផ្សេងៗអាចមកដាក់ពាក្យនៅច្រកចេញចូលទាំង៦របស់អាជ្ញាធរជាតិអប្សរា។
លោកបានបន្តថាៈនៅទីនោះមានមន្ត្រីបុគ្គលិកប្រចាំការនៅទីនោះចាំប្រឹក្សាយោបល់អំពីឯកសារដែលត្រូវភ្ជាប់មកជាមួយដូចជា លិខិតកាន់កាប់ដីធ្លីស្របច្បាប់, សៀវភៅគ្រួសារ,សំបុត្រកំណើត,ប្លង់ដី និងអត្តសញ្ញាណបណ្ណ។ពេលបានលិខិតអនុញ្ញាតក្រុមការងារនឹងចុះមកពិនិត្យទីតាំងផ្ទាល់រួមទាំងតាមដានសកម្មភាពសាងសង់ថាត្រឹមត្រូវឬខុសពីលក្ខខណ្ឌដែលបានស្នើសុំ។
ករណីប្រជាពលរដ្ឋដែលគោរពតាមគោលការណ៍ក្នុងការស្នើសុំអាជ្ញាធរជាតិអប្សរានឹងមានលិខិតសរសើរដល់ពួកគាត់បានចូលរួមលើកស្ទួយតម្លៃតំបន់អង្គរ ហើយរាល់ការដាក់ពាក្យស្នើសុំ គឺពុំមានបង់ថវិកាឡើយ៕ស.សែត