ស្ទឹងត្រែង:ការរស់នៅរបស់បងប្អូនខ្មែរ-ឡាវតាមព្រំដែនពិតជាខុសប្លែកជាងអ្នកទីក្រុង។កាន់តែពិសេសជាងនេះទៅទៀតនោះគឺពួកគាត់និយាយខ្មែរមិនសូវជាច្បាស់ហើយថែមទាំងរួសរាយរាក់ទាក់ណាស់។
ធ្វើដំណើរពីក្រុងស្ទឹងត្រែងកាត់តាមស្ពានមេគង្គទៅកាន់ឃុំព្រះរំកិលស្រុកបុរីអូរស្វាយសែនជ័យអតីតស្រុកថាឡាបរិវ៉ាត់មានចម្ងាយជាង៦០គីឡូម៉ែត្រភ្ញៀវទេសចរនឹងបានទៅដល់អន្លង់សត្វផ្សោតព្រំដែនឡាវ។ទីនោះគឺឃុំព្រះរំកិលដែលមានប្រវត្តរឿងព្រេងទាក់ទងនឹងវត្តដំរីសដ៏វ័យចំណាស់មួយក្នុងខេត្តស្ទឹងត្រែង។
លោកផយវណ្ណាអ្នកបើកទូកជូនភ្ញៀវនៅភូមិអន្លង់ស្វាយឃុំព្រះរំកិលបានឱ្យដឹងថាៈក្រៅពីទស្សនាសត្វផ្សោតគាត់អាចជូនភ្ញៀវទៅមើលដីកោះថ្មប៉ប្រះទឹកនិងព្រៃលិចទឹកតាមបែបធម្មជាតិបានតាមចិត្តចង់ទៅ។កញ្ញាថងបាងអ្នកលក់ដូរនៅតំបន់ទេសចរអន្លង់ស្វាយបានរៀបរាប់ប្រាប់ភ្ញៀវដោយនិយាយខ្មែរពុំសូវច្បាស់ពីការលក់ដូរជូនភ្ញៀវ។
ជាមួយរូបសម្រស់ដ៏ស្រស់ស្អាតកូនកាត់ខ្មែរឡាវញញឹមរួសរាយរាក់ទាក់ដាក់ភ្ញ្ញៀវណាស់បើទោះបីជានាងនិយាយខ្មែរផងឡាវខ្លះក្តី។បុរសៗជាច្រើនតែងនិយាយឡែបខាយដាក់នាងថងបាងបណ្តើរទិញម្ហូបកាត់ឡាវបណ្តើរ។ក្រៅពីមើលផ្សោតភ្លក់ម្ហូបឆ្ងាញ់សាច់អាំងស្ងោជ្រក់ត្រីធម្មជាតិឆ្ងាញ់បុកល្ហុងដាក់ម្ទេសហើយើងក៏អាចទៅបន្តមើលទឹកធ្លាក់ព្រះនិម្មិតដ៏ស្អាតដូចឋានសួរគ៌ក្នុងទឹកដីខេត្តព្រះវិហារជាប់ខេត្តស្ទឹងត្រែងផងដែរ។
ពេលទៅដល់ទឹកធ្លាក់សំឡេងទឹកធ្លាក់បោកផ្ទុបជាមួយផ្ទាំងថ្មលាន់ឮគ្រឹមៗបន្ធូរអារម្មណ៍តានតឹងនិងមិនភ្លេចថតរូបភាពទុកជាអានុស្សាវរីយ៍ក្រោយពេលវិលត្រឡប់ទៅផ្ទះវិញនោះទេ៕សុខុម
