បរទរស៖ បុរសអូទ្រីសម្នាក់ត្រូវបានពស់ថ្លាន់ចិញ្ចឹមរបស់អ្នកជិតខាងខាំ “លិង្គ” របស់គាត់ បន្ទាប់ពីពស់នោះបានគេចខ្លួនតាមលូហើយទីបំផុតចូលមកដល់បង្គន់របស់គាត់។បុរសអាយុ ៦៥ ឆ្នាំមកពីទីក្រុងហ្គ្រាស ភាគខាងត្បូង ត្រូវបានពស់ខាំលិង្គនៅម៉ោងប្រហែល ៦ ព្រឹកថ្ងៃចន្ទទី៥កក្កដា២០២១នេះ នៅពេលគាត់ចូលបង្គន់ក្នុងផ្ទះល្វែងរបស់គាត់។
ប៉ូលិសនិយាយថា បុរសនោះគ្រាន់តែដាក់គូទអង្គុយភ្លាមក៏មានអារម្មណ៍ថាមានអ្វីមួយ “ច្បិច” លើក្បាលលិង្គរបស់គាត់ ហើយពេលងើបឈរ ស្រាប់តែឃើញពស់ថ្លាន់ប្រវែង ១,៥ ម៉ែត្រកំពុងសំឡឹងមើលមកគាត់។បុរសនោះបានទូរស័ព្ទហៅប៉ូលិស ដែលបានមកដល់ជាមួយអ្នកជំនាញសត្វល្មូនម្នាក់ដើម្បីយកពស់នេះចេញពីបង្គន់។ក្នុងពេលជាមួយគ្នាដែរ បុរសនោះត្រូវបានបញ្ជូនទៅមន្ទីរពេទ្យដើម្បីព្យាបាល “របួសស្រាល” ។
វេជ្ជបណ្ឌិតនិយាយថា សំណាងល្អពស់ថ្លាន់មិនមានពិស ប៉ុន្តែវាមានហានិភ័យឆ្លងមេរោគពីក្នុងបង្គន់។អ្នកជំនាញឈ្មោះ វើនន័រ ស្តាន់ហ្គិល និយាយថា ពស់ថ្លាន់នេះក៏មិនមានរបួសនោះដែរហើយបន្ទាប់ពីត្រូវបានសម្អាតរួចត្រូវបានប្រគល់ជូនម្ចាស់អាយុ ២៤ ឆ្នាំរបស់វាវិញ ដែលជាអ្នកជិតខាងរបស់ជនរងគ្រោះ៕ប្រែសម្រួល : កញ្ញាដាលីស
