ស្ទឹងត្រែង៖ដើមខ្ជែង គឺជារុក្ខជាតិព្រៃសន្ដានត្នោត មានគុណប្រយោជន៍ ដែលគេអាចយកធាង និងស្លឹក របស់វាមកកែច្នៃ បានជាច្រើនមុខដើម្បីប្រើប្រាស់។រុក្ខជាតិព្រៃប្រភេទនេះ គេប្រទះឃើញ មានដុះនៅតាមព្រៃរបោះក្នុងខេត្តព្រះវិហារ, ស្ទឹងត្រែង, រតនៈគីរី និងក្រចេះ។ ដើមខ្ជែងនេះ មានកម្ពស់ មិនលើសពី ១០ ម៉ែត្រហើយចេញផ្កាផ្លែ ក្នុងមួយ ជីវិតមានតែម្តងគត់រួច ក៏បានងាប់ទៅវិញ មានអាយុកាលលើសពីមនុស្សយើង។
សហគមន៍ជនជាតិដើម នៅភូមិសង្កែ ឃុំឆែប ស្រុកឆែប ខេត្តព្រះវិហារ បានចងជាក្រុមយកទ្រាំងដែលកើតចេញពីធាងដើមខ្ជែង មកកែច្នៃឱ្យទៅជាផលិតផលអាចលក់បាននៅលើទីផ្សារ ដើម្បីបានប្រាក់ចំណូលផ្គត់ផ្គង់ជីវភាពគ្រួសារ។
ស្លឹករបស់វា ត្រូវបានគេប្រើ សរសេរជាស្ត្រាស្លឹករឹត យកស្លឹកមកប្រក់ផ្ទះ ត្បាញកន្ទេល ការ៉ុង និងសម្ភារៈដងទឹកជាដើម។ ទ្រនុង ធាងប្រើជាកន្លាស់។ រីឯ គែម សងខាងនៃធាងចាស់រឹងមាំហៅថា ទ្រាំង ធ្វើជារនាបគ្រែ ឈើច្រត់ ដំបង ព្រួញ ស្នា ទ្រូ វែកកូបាយ វែកឆា ចង្កឹះ និងសម្ភារៈប្រើប្រាស់ច្រើនមុខទៀត។ តាមតំបន់ខ្លះគេយកទ្រាំងដាក់នៅក្នុងផ្ទះលើក្បាលដំណេក សម្រាប់បណ្ដេញព្រាយបិសាចនឹងនាំមកនូវសុខសប្បាយដល់ក្រុមគ្រួសារ។
ខ្នងនៃធាងខ្ជែងគេយកមកត្បាញជាកន្ទេលទងសម្រាប់ប្រើប្រាស់។ ឬស គេយកមកដុសចម្រោះយកទឹកផឹក ជួយព្យាបាល ជំងឺគ្រុនផ្ដាសាយ កែអាការៈគ្រុនក្តៅ ជួយបញ្ចេញញើស។ ដើមតូច យកមកស្ងោរផឹក ជួយព្យាបាលរោគក្រពះ សម្រួលពោះវៀន បានទៀតផង។សព្វថ្ងៃអ្នកផលិត ទ្រាំង ចេញពីដើមខ្ជែងឃើញមានច្រើននៅភូមិជនជាតិដើមក្នុងស្រុកឆែបខេត្តព្រះវិហារ។ អនុវត្តដោយអង្គការកម្មវិធីផ្លាស់ប្ដូរបទពិសោធន៍អនុផលព្រៃឈើ ហៅកាត់ NTFP-EP-បានជំនួយពីអង្គការ ទីភ្នាក់ងារអភិវឌ្ឍន៍ និងកិច្ចសហប្រតិបត្តិការរបស់ប្រទេសស្វីស ហៅកាត់ SDCដើម្បីជួយដល់សហគមន៍។
លោក សេង សុធា មន្ត្រីអនុវត្តគម្រោងផ្ទាល់ជាមួយសហគមន៍បានឲ្យដឹងថា សហគមន៍កែច្នៃចង្កឹះទ្រាំង ភូមិសង្កែស្រុកឆែប ខេត្តព្រះវិហារបច្ចុប្បន្នមាន៣ក្រុមដែលសកម្មក្នុងការផលិតចង្កឹះទ្រាំងលក់។ សហគមន៍ទាំងនោះបានចាប់ផលិតចង្កឹះទ្រាំងនិងវត្ថុអនុស្សាវរីយ៍ផ្សេងៗ លក់នៅសហគមន៍ផ្ទាល់ និងលក់តាមប្រព័ន្ធ អនឡាញ ចែកចាយបន្តនេះក្នុងខេត្ត និងទីក្រុងភ្នំពេញ ដើម្បីបានប្រាក់ចំណូល។ដើមខ្ជែងពីមុន សំបូរណាស់ តែដោយការកើនឡើងនៃការពង្រីកផ្ទៃដីកសិកម្មបច្ចុប្បន្ន ដើមខ្ជែងមានចំនួនតិចទៅៗគួរឲ្យព្រួយបារម្ភ។
មិនតែប៉ុណ្ណោះ ថែមទាំងមាន ឈ្មួញចូលទៅទិញនាំចេញទៅក្រៅប្រទេសកាន់តែច្រើនក្នុង រយៈពេលកន្លងមកនេះ។ ផលចំណេញមួយពេលអាចនឹងធ្វើអោយបាត់ប្រយោជន៍ដល់សហគមន៍មូលដ្ឋាន។អ្នកគាំទ្រសហគមន៍ បានអំពាវនាវដល់អ្នកប្រើប្រាស់ជួយទិញចង្កឹះ ឬផលិតផលធ្វើពីទ្រាំង ដែលជាស្នាដៃរបស់ខ្មែរ ដើម្បីចូលរួមចំណែក ក្នុងការជួយការពារ និងអភិរក្សធន ធានដែលនៅសេសសល់ឱ្យរស់ឡើងវិញ៕ដោយ:សុខុម