ភ្នំពេញ៖ក្រសួងព័ត៌មាននឹងបើកវគ្គបណ្តុះបណ្តាលនិងបញ្ជូនមន្ត្រីវ័យក្មេងឱ្យទៅរៀននៅក្រៅប្រទេសបន្ថែមទៀតដើម្បីបង្កើនចំណេះដឹងនិងសម្ថភាពគ្រប់គ្រាន់ប្រកបដោយប្រសិទ្ធភាពខ្ពស់ស្របពេលដែលប្រទេសមានសន្ដិភាព។
ថ្លែងក្នុងពិធីអធិបតីបិទវគ្គអប់រំផ្សព្វផ្សាយពីសុខភាពស្ត្រីក្រោមប្រធានបទ«ការយល់ដឹងពីមហារីកមាត់ស្បូននិងជំងឺពុកឆ្អឹងចំពោះស្ត្រីអស់រដូវ»ជូនដល់មន្ត្រីរាជការជាស្ត្រីនៃក្រសួងព័ត៌មាននាព្រឹកថ្ងៃទី២៦ខែកុម្ភៈឆ្នាំ២០២០នេះលោកខៀវកាញារីទ្ធរដ្ឋមន្ត្រីក្រសួងព័ត៌មានបានបញ្ជាក់ថាការអភិវឌ្ឍផ្នែកសមត្ថភាពនិងធនធានមនុស្សគឺជាភារកិច្ចចាំបាច់បំផុតសម្រាប់ស្ថាប័នជាតិនិងឯកជន។
លោករដ្ឋមន្ត្រីក្រសួងព័ត៌មានបានបន្តថាព្រោះបើមានមន្ត្រីរាជការវ័យក្មេងដែលមានចំណេះដឹងគ្រប់គ្រាន់ទាំងផ្នែកទ្រឹស្តីនិងការអនុវត្តធ្វើឱ្យការងារមានប្រសិទ្ធភាពខ្ពស់។លោកបានបន្ថែមថាការបង្កើតវគ្គបណ្តុះបណ្តាលគឺបានផ្តល់ឱកាសជាច្រើនសម្រាប់មន្ដ្រីវ័យក្មេងក្នុងការសិក្សានូវចំណេះដឹងនិងបទពិសោធន៍ដើម្បីជាចំណេះដឹងបន្ថែមក្នុងការអភិវឌ្ឍនិងការទទួលខុសត្រូវ។“យើងត្រូវតែមានការយល់ដឹងពីសង្គម អំពីច្បាប់។
“ខ្ញុំគិតថាកន្លងមកនេះក្រសួងយើងមានរៀបចំសិក្ខាសាលាច្រើនទៀតដើម្បីទាំងនារីទាំងបុរសយល់អំពីការងារមួយចំនួនដែលជាការចាំបាច់ក្រៅអំពីមុខជំនាញដែលយើងធ្វើការជាមួយក្រសួងគឺការងារសង្គមការងារច្បាប់។កន្លងមកយើងប្រុងនឹងបើកវគ្គច្រើនដើម្បីបើកវគ្គទីពីរបីទៀតគឺវាអាស៊ានដើម្បីយើងបានមន្ត្រីវ័យក្មេងក្រោយនេះដើម្បីបញ្ជូន”។
“ឥឡូវយើងប្រជុំអាស៊ានច្រើនប្រជុំអន្តរជាតិច្រើនចាត់ឲ្យមន្ត្រីក្មេងៗក្រោយនេះបញ្ជូនទៅប្រជុំអាស៊ានច្រើប្រជុំអន្ដរជាតិច្រើនចាត់មន្ត្រីក្មេងៗចេញមុខទៅក្នុងពេលប្រជុំជាមួយគេបន្ថែមបង្កើនការយល់ដឹង។ដូច្នេះយើងមានច្បាប់អំពីអាស៊ានរៀនអំពីបញ្ហាច្រើនណាស់ដែលយើងអាចចូលរួម”។
លោករដ្ឋមន្ត្រីបានបញ្ជាក់ថាមិនត្រឹមតែមានការបើកវគ្គបណ្តុះបណ្តាលនិងការបញ្ជូនមន្ត្រីវ័យក្មេងឱ្យចូលរួមប្រជុំទេថែមទាំងមានវគ្គសិក្សានៅក្រៅប្រទេសបន្ថែមទៀតដើម្បីផ្លាស់ប្ដូរបទពិសោធន៍គ្នាទៅវិញទៅមក៕វេបសាយក្រសួងព័ត៌មាន