អន្តរជាតិ៖តារាស្រីចិនតៃវ៉ាន់ម្នាក់បានល្បីលើសារព័ត៌មាននៅប្រទេសថៃក្នុងសប្តាហ៍នេះបន្ទាប់ពីនាងបានអះអាងថាត្រូវប៉ូលិសថៃបង្ខំឱ្យបង់ប្រាក់សំណូកអំឡុងពេលនាងទៅលេងទីក្រុងបាងកកកាលពីដើមខែមករា។
តារាស្រីរូបនេះបានព្រមានអ្នកដទៃឱ្យប្រុងប្រយ័ត្នពេលទៅលេងប្រទេសនេះ។នាងអាន យូឈីង An Yuqing ឬឆាលីន អាន Charlene Anបានសរសេរនៅលើគណនី Instagram របស់នាងថា តាក់ស៊ីរបស់នាងត្រូវបានប៉ូលិសឃាត់ក្នុងទីក្រុងបាងកកហើយបានបង្ខំនាងឱ្យចេញពីរថយន្ត។នាងបន្តថា ប៉ូលិសបានឆែកឆេររាងកាយនាង ហើយឆែកមើលហោប៉ៅ កាបូបយួរដៃ និងកាបូបលុយមុនពេលសួរអំពីទិដ្ឋាការ។ ទិដ្ឋាការរបស់នាងគឺជាទិដ្ឋាការពេលមកដល់ VOA ប៉ុន្តែប៉ូលិសបាននិយាយថា VOA មិនអាចទទួលយកបានទេ ហើយវាត្រូវតែបោះលើលិខិតឆ្លងដែនដែលមាននិមិត្តសញ្ញាផ្លូវការតែប៉ុណ្ណោះ។
នាងនិយាយថា ក្រុមរបស់នាងបានថតវីដេអូនៃការឆែកឆេរ ប៉ុន្តែមន្ត្រីប៉ូលីសបានប្រាប់ពួកនាងឱ្យលុបវាចោល។នាងបានអង្វរប៉ូលិសឱ្យដោះលែងពួកនាង ហើយការចរចាបានចំណាយពេលប្រហែល២ម៉ោងមុននឹងមន្ត្រីប៉ូលិសម្នាក់បានយកនាងទៅម្ខាង ហើយទាមទារប្រាក់ចំនួន២៧.០០០ បាត(លុយថៃ)។ បន្ទាប់ពីនាងបង់ប្រាក់ឱ្យប៉ូលិសពួកមន្ត្រីបានហៅតាក់ស៊ីឱ្យពួកនាង ហើយឱ្យពួកនាងចាកចេញទៅ។មានស្ត្រីកូរ៉េ៥នាក់ផ្សេងទៀតត្រូវបានឃាត់នៅប៉ុស្តិ៍ត្រួតពិនិត្យដែរ ហើយនាងមិនប្រាកដទេថាតើពួកគេនឹងត្រូវបង្ខំឱ្យបង់លុយសំណូកដែរឬអត់?នាងបាននិយាយថា “ខ្ញុំនឹងមិនត្រឡប់ទៅប្រទេសថៃវិញទេ ហើយខ្ញុំចង់ព្រមានចិនតៃវ៉ាន់ថា ពួកគេគួរតែប្រយ័ត្នពេលទៅលេងថៃមិនត្រូវយកលុយច្រើនដាក់ក្នុងកាបូបទេ”។រឿងរ៉ាវរបស់នាងបានល្បីពេញកោះតៃវ៉ាន់ និងបានផ្ទុះពេញព័ត៌មាននៅប្រទេសថៃក្នុងសប្តាហ៍នេះ។នាង ឆាលីន អាន សរសេររៀបរាប់រឿងដែលប៉ូលិសថៃជំរិតទារប្រាក់ពីនាងនៅបាងកកបង្ហោះលើ Instagram។
ទោះជាយ៉ាងណា សារព័ត៌មានបាងកកប៉ុស្តិ៍ចុះផ្សាយនៅថ្ងៃទី២៨ ខែមករាឆ្នាំ២០២៣នេះថា កាម៉េរ៉ាសុវត្ថិភាព៣-៤នៅកន្លែងកើតហេតុបានបង្ហាះទិដ្ឋភាពផ្សេងខុសពីការអះអាងរបស់តារារូបនេះ គឺថាអត់មានឃើញសកម្មភាពប៉ូលីសទារឬទទួលប្រាក់ពីនាងទេ។អ្នកនាំពាក្យប៉ូលិសបានអះអាងថា រូបក្នុងការម៉េរ៉ាបានបង្ហាញនាង អាន យូឈីងនិងបុរស៣នាក់ទៀតឈរនិយាយជាមួយប៉ូលិសដ៏យូរ មុនតាក់ស៊ីពណ៌ក្រហមមួយចូលមកនិងនាំពួកគេចេញទៅ។ឥឡូវ ប៉ូលិសថៃបានទាក់ទងទៅប៉ូលិសតៃវ៉ាន់ឱ្យស៊ើបអង្កេតរឿងនេះថា ការនិយាយរបស់នាងជាការពិតឬជាការបំភ្លៃ?
កាលពីថ្ងៃព្រហស្បតិ៍ប៉ូលិស៧នាក់ដែលជាប់ចោទថាជំរិតទារប្រាក់ពីនាងក៏ត្រូវបានហៅទៅសួរនាំហើយពួកគេបានបដិសេធថាមិនបានធ្វើដូចការចោទប្រកាន់ទេ៕ពីស្ត្រេតថែមស៍ប្រែសម្រួលដោយ៖សំណាង រស្មីកម្ពុជា