កំពង់ចាម៖ចូលឆ្នាំរយៈពេល ៣ថ្ងៃពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ នេះ ឯកឧត្ដម អ៊ុន ចាន់ដា អភិបាលខេត្តកំពង់ចាម និងលោកជំទាវ, ឯកឧត្តម ខ្លូត ផន ប្រធានក្រុមប្រឹក្សាខេត្ត,មន្ត្រីពាក់ព័ន្ធជុំវិញខេត្តនិងប្រជាពលរដ្ឋ បានចូលរួម លេងល្បែងប្រជាប្រិយ ប្រពៃណីជាតិខ្មែរមាន ពូនភ្នំខ្សាច់ និងស្រង់ព្រះ នៅតាមទីវត្តអារាម។
ជាមួយគ្នានោះក៏មានពលរដ្ឋ និងភ្ញៀវទេសចរបរទេស មកកម្សាន្ត នៅតំបន់រមណីយដ្ឋានទេសចរណ៍ នៅតាមបណ្តាស្រុកក្រុងនានាប្រមាណជា ១លាន ៥០ម៉ឺននាក់។ក្នុងនោះភ្ញៀវទេសចរបរទេសមានចំនួន ៦៧៦នាក់។
លោក ស៊ាន សុគុន្ធ ប្រធានមន្ទីរទេសចរណ៍ ខេត្តកំពង់ចាម បានឱ្យដឹងថា ដើម្បីបង្កភាពសប្បាយរីករាយ ក្នុងឱកាសឆ្នាំថ្មីប្រពៃណីជាតិ ជូនប្រជាពលរដ្ឋ ឯកឧត្ដម អ៊ុន ចាន់ដា អភិបាលខេត្តកំពង់ចាម បានណែនាំឱ្យមន្ទីរទេសចរណ៍ សហការ ជាមួយមន្ទីរវប្បធម៌ និងវិចិត្រសិល្បៈខេត្ត និងសាលាក្រុងកំពង់ចាម ទទួលភារកិច្ចរៀបចំសង្ក្រាន្ត នៅវាលស្មៅមុខសាលាខេត្ត ដោយមានភ្ញៀវមកលេងកម្សាន្ត យ៉ាងច្រើនកុះករ ។
ចំពោះបញ្ហាសន្តិសុខ សណ្ដាប់ធ្នាប់សាធារណៈ ក្នុងរយៈពេល៣ថ្ងៃនេះដែរ គឺពុំមានបញ្ហាអ្វីកើតឡើងធំដុំឡើយ គឺបានដំណើរការយ៉ាងល្អប្រសើរ ។ លោកប្រធានមន្ទីរ បញ្ជាក់ដែរថា ដើម្បីបង្កភាពសប្បាយដល់ប្រជាពលរដ្ឋទូទៅ ក៏ដូចជាភ្ញៀវបានទស្សនាកម្សាន្តផងនោះ។មន្ទីរទេសចរណ៍ខេត្ត បានសហការណ៍ជាមួយមន្ទីរវប្បធម៌ និងវិចិត្រសិល្បៈរៀបចំកម្មវិធី នៅតាមរមណីដ្ឋានលេងល្បែងប្រជាប្រិយ ដូចជា បោះអង្គុញ ចោលឈូង លាក់កន្សែង ទាញព្រ័ត្រ គោះត្រដោក លោតបាវ វាយក្អម ឡើងសសរខ្លាញ់ និងល្បែងកម្សាន្តមួយចំនួនទៀត។
ល្បែងកម្សាន្តខាងលើក្នុងន័យលើកកម្ពស់វប្បធម៌ប្រពៃណី និងទំនៀមទម្លាប់ខ្មែរ ក្រោមម្លប់សន្តិភាព នៃការដឹកនាំ របស់សម្ដេចអគ្គមហាសេនាបតីតេជោ ហ៊ុន សែន ជាប្រមុខរាជរដ្ឋាភិបាលកម្ពុជា ៕ញ៉ែមសុផល
