មន្ទីរពេទ្យចំនួន៨នៅហ្គាហ្សាស្ទ្រីប ត្រូវបានទម្លាក់គ្រាប់បែកក្នុងរយៈពេលត្រឹមតែ៣ថ្ងៃ

អន្តរជាតិ៖តាមប្រព័ន្ធផ្សព្វផ្សាយនៃរដ្ឋាភិបាលតំបន់ហ្គាហ្សាស្ទ្រីប ដែលគ្រប់គ្រងដោយកងកម្លាំងហាម៉ាស់បានបញ្ជាក់ថា មន្ទីរពេទ្យចំនួន៨ត្រូវបានទម្លាក់គ្រាប់បែកដោយកងកម្លាំងអ៊ីស្រាអែលក្នុងរយៈពេល៣ថ្ងៃ។ក្នុងនោះមន្ទីរពេទ្យចំនួន១៨បានបញ្ឈប់ប្រតិបត្តិការចាប់តាំងពីថ្ងៃទី៧ ខែតុលាមក។

យោងតាមប៉ុស្តិ៍ Al Jazeera បានផ្សាយថាកាំភ្លើងធំរបស់អ៊ីស្រាអែលបានបាញ់ផ្លោងទៅលើទីធ្លាមន្ទីរពេទ្យ Al-Shifa និងច្រកទ្វារមន្ទីរពេទ្យ Al-Nasr ។ សេចក្តីថ្លែងការណ៍បានបន្តថា “ការទម្លាក់គ្រាប់បែកក្នុងមន្ទីរពេទ្យគឺជាឧក្រិដ្ឋកម្មសង្គ្រាមនៅក្រោមច្បាប់មនុស្សធម៌អន្តរជាតិ ហើយត្រូវបានប្រព្រឹត្តឧក្រិដ្ឋកម្មនៅក្នុងកិច្ចព្រមព្រៀងអន្តរជាតិចំនួន១៦ និងដំណោះស្រាយរបស់អង្គការសហប្រជាជាតិដែលអំពាវនាវឱ្យមានការការពារកន្លែងព្យាបាលនេះ”។មន្ទីរពេទ្យដ៏ធំបំផុតរបស់ហ្គាហ្សាគឺ al-Shifa បានរងការខូចខាតយ៉ាងខ្លាំងនៅក្នុងការវាយប្រហារតាមអាកាសរបស់អ៊ីស្រាអែល។ អាជ្ញាធរសុខាភិបាលហ្គាហ្សាក៏បានបង្ហោះវីដេអូដែលបង្ហាញពីការខូចខាតដល់នាយកដ្ឋានកាំរស្មីអ៊ិចនៅមន្ទីរពេទ្យ al-Nasser ក្នុងទីក្រុង Khan Younis ភាគខាងត្បូងហ្គាហ្សាស្ទ្រីប។

មុននេះនៅយប់ថ្ងៃទី១៧ ខែតុលា មានការផ្ទុះដ៏ធំមួយនៅមន្ទីរពេទ្យ Ahli Arab ក្នុងទីក្រុង Gaza សម្លាប់មនុស្សយ៉ាងហោចណាស់២០០នាក់។ ប្រភពខ្លះទៀតជឿថា ជនរងគ្រោះរហូតដល់៥០០នាក់បានស្លាប់ក្នុងឧបទ្ទវហេតុនេះ។ ទាំងអ៊ីស្រាអែល និងក្រុមហាម៉ាស់បានចោទប្រកាន់គ្នាទៅវិញទៅមកថាបានបង្កការផ្ទុះខាងលើ៕ដោយ៖សហការី