អន្តរជាតិ៖ប្រធានាធិបតីអាមេរិក លោកJoe Biden និងប្រធានាធិបតីចិន លោក Xi Jinping គ្រោងនឹងជួបប្រជុំនៅតំបន់ San Francisco នាថ្ងៃទី១៥ ខែវិច្ឆិកាខាងមុខដើម្បីព្យាយាម“រក្សាស្ថិរភាពទំនាក់ទំនង”បន្ទាប់ពីភាពតានតឹងនាពេលថ្មីៗនេះ រវាងមហាអំណាចទាំង២។
មន្ត្រីរដ្ឋបាលជាន់ខ្ពស់ម្នាក់បាននិយាយថា កិច្ចប្រជុំដែលមិនត្រូវបានបញ្ជាក់ជាមុន និងមិនត្រូវបានគេរំពឹងថា នឹងផ្តល់លទ្ធផលធំនោះគឺមានបំណងបញ្ចៀសជម្លោះរវាងចិន និងសហរដ្ឋអាមេរិក។លោក Biden និងលោក Xi នឹងពិភាក្សាផងដែរអំពីវិបត្តិសកលលោក ដូចជាសង្រ្គាមរបស់អ៊ីស្រាអែលជាមួយក្រុមហាម៉ាស់។ ការលុកលុយរបស់រុស្ស៊ីលើអ៊ុយក្រែន និងភាពតានតឹងនៅលើកោះតៃវ៉ាន់ជាដើម។
មេដឹកនាំប្រទេសទាំង២ មិនបានជួបគ្នាអស់រយៈពេលមួយឆ្នាំ ចាប់តាំងពីកិច្ចប្រជុំចុងក្រោយរបស់ពួកគេនៅកោះបាលី នៃប្រទេសឥណ្ឌូនេស៊ី កាលពីខែវិច្ឆិកាឆ្នាំ២០២២កន្លងទៅ។ ចាប់តាំងពីពេលនោះមក ទំនាក់ទំនងរវាងទីក្រុងប៉េកាំងនិងទីក្រុងវ៉ាស៊ីនតោន បានធ្លាក់ចូលទៅក្នុងភាពតានតឹងកាន់តែខ្លាំងឡើង។
មន្ត្រីជាន់ខ្ពស់អាមេរិកបានប្រាប់អ្នកយកព័ត៌មាន កាលពីថ្ងៃព្រហស្បតិ៍ទី៩ វិច្ឆិកានេះថា “ប្រធានាធិបតីអាមេរិកលោក Biden ពិតជានឹងជួបជាមួយប្រធានាធិបតីចិន លោក Xi Jinping នៅតំបន់ San Francisco Bay នៃរដ្ឋ California នាថ្ងៃទី១៥ ខែវិច្ឆិកាខាងមុខ”។
មន្ត្រីដដែលនិយាយក្នុងលក្ខខណ្ឌមិនបញ្ចេញឈ្មោះ បានគូសបញ្ជាក់ទៀតថា“គោលដៅរបស់ពួកគេ គឺដើម្បីព្យាយាមចាត់វិធានការដែលជាក់ស្តែង ដើម្បីធ្វើឱ្យទំនាក់ទំនងរវាងសហរដ្ឋអាមេរិកនិងចិនមានស្ថេរភាព និងលុបបំបាត់នូវផ្នែកមួយចំនួននៃការយល់ច្រឡំ និងបើកបណ្តាញទំនាក់ទំនងថ្មី”៕ដោយ៖សហការី
