សៀមរាប៖បរិស្ថាននៅក្នុងតំបន់រមណីយដ្ឋានអង្គរទាំងលើគោកក្នុងទឹកនិងបរិយាកាសត្រូវបានអាជ្ញាធរជាតិអប្សរាយកចិត្តទុកដាក់ក្នុងការសម្អាតជាប្រចាំ។នៅព្រឹកថ្ងៃទី១៧ខែមិនាឆ្នាំ២០២០នេះក្រុមការងារអាជ្ញាធរជាតិអប្សរាបានចុះសម្អាតនូវវារីជាតិដែលដុះក្នុងទឹកនៃកសិន្ធុប្រាសាទអង្គរវត្តមានលំចង់សារ៉ាយកំប្លោកជាដើម។ដើម្បីសម្អាតទឹកឱ្យស្អាតនិងធ្វើឱ្យទឹកមានគុណភាពល្អជំនួយដល់ភាពធំធាត់ដល់សត្វរស់នៅក្នុងទឹកផង។
ការសម្អាតវារីជាតិនៅក្នុងទឹកនៅតាមកសិន្ធុនៃប្រាសាទអង្គរវត្តនិងប្រាសាទផ្សេងៗត្រូវបានសម្អាតជាប្រចាំដោយប្រើទូកនិងដង្កាវដើម្បីកាវយករុក្ខជាតិក្នុងទឹកទាំងនោះ។អាជ្ញាធរជាតិអប្សរាក៏សូមអំពាវនាវដល់សាធារណជននិងភ្ញៀវទេសចរណ៍ទាំងអស់សូមកុំបោះសំរាមគ្រប់ប្រភេទចូលក្នុងទឹកកសិន្ធុដែលជាហេតុនាំឱ្យទឹកកខ្វក់ប៉ះពាល់ដល់សោភ័ណភាពប្រាសាទនិងជីវិតសត្វដែលអាស្រ័យក្នុងទឹកផងដែរ៕