ព័ត៌មានសង្គម សុខាភិបាល

ស្ត្រីផ្ទុកកូវីដ-១៩សម្រាលកូនដោយវះកាត់ទទួលជោគជ័យ

ព្រះវិហារ៖ស្ត្រីម្នាក់មានផ្ទុកជំងឺកូវីដ១៩ត្រូវបានក្រុមគ្រូពេទ្យជំនាញនៃមន្ទីរពេទ្យបង្អែក១៦មករា ខេត្តព្រះវិហារ ជួយសម្រាលកូនដែលមានទម្ងន់៤គីឡូក្រាមដោយវះកាត់ទទួលជោគជ័យកាលពីរសៀលថ្ងៃទី២៥ ខែកញ្ញាឆ្នាំ២០២១។ លោកវេជ្ជបណ្ឌិតគួង ឡូទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារបានថ្លែងថា ស្ត្រីផ្ទុកជំងឺកូវីដ១៩ដែលក្រុមគ្រូពេទ្យជួយសម្រាលកូនដោយវះកាត់ទទួលបានជោគជ័យ។ស្ត្រីនោះឈ្មោះហ៊ុន ដានីអាយុ៤១ឆ្នាំ រស់នៅភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ។នាងបានឆ្លងជំងឺកូវីដ១៩ប្រភេទ Delta កាលពីថ្ងៃទី៩ ខែសីហា ឆ្នាំ២០២១ និងបានបញ្ជូនមកពីមន្ទីរពេទ្យបង្អែកស្រុកជាំក្សាន្ត កាលពីថ្ងៃទី២៣ ខែកញ្ញា។ លោកវេជ្ជបណ្ឌិតបានបន្តថា ស្ត្រីរូបនេះមានផ្ទៃពោះលើកទី៥ ហើយកូនដែលកើតនេះជាកូនទី៣។ លោកបន្តថា មូលហេតុដែលស្ត្រីរូបនេះសម្រាលកូនដោយវះកាត់នេះគឺទី១ដោយសារស្ត្រីរូបនេះមានផ្ទៃពោះគ្រប់ខែតែមិនអាចសម្រាលបាន។ទី២៖ ទារកក្នុងផ្ទៃមានបេះដូងខ្សោយនិងទី៣ ទារកមានទម្ងន់ធ្ងន់រហូត៤ គីឡូក្រាម។ លោកប្រធានមន្ទីរសុខាភិបាល ក៏ថ្លែងទៀតថា ចាប់តាំងពីជំងឺកូវីដ១៩ ឆ្លងរាលដាលមន្ទីរពេទ្យជួយសម្រាលកូនជូនស្ត្រីផ្ទុកជំងឺកូវីដ១៩បានចំនួន៦នាក់ក្នុងនោះសម្រាលដោយវះកាត់ម្នាក់៕ដោយ៖សៅវ៉ាន់ឌី

ព័ត៌មានសង្គម សន្តិសុខ សុខាភិបាល

រដ្ឋបាលខេត្ដសម្រេចបិទខ្ទប់ និងកំណត់ភូមិមហាផល «តំបន់ក្រហម» ២សប្តាហ៍ ដើម្បីទប់ស្កាត់ជំងឺកូវីដ

ព្រះវិហារ៖ រដ្ឋបាលខេត្ដព្រះវិហារ បានចេញសេចក្ដីសម្រេចពីការសម្រេចបិទខ្ទប់ និងកំណត់ភូមិមហាផល ជា «តំបន់ក្រហម» ដែលស្ថិតនៅឃុំឈានមុខ ស្រុកត្បែងមានជ័យ រយៈពេល ២សប្តាហ៍ គិតចាប់ពីថ្ងៃទី២២ ខែកញ្ញា ឆ្នាំ២០២១ រហូតដល់ថ្ងៃទី៥ ខែតុលា ឆ្នាំ២០២១។ ខាងក្រោមនេះ ជាសេចក្ដីសម្រេចរបស់រដ្ឋបាលព្រះវិហារ      

ព័ត៌មានសង្គម សន្តិសុខ សុខាភិបាល

បន្តអនុវត្តវិធានការរដ្ឋបាលមួយសប្តាហ៍ទៀតដើម្បីទប់ស្កាត់ Delta

ព្រះវិហារ៖រដ្ឋបាលខេត្តព្រះវិហារ បានចេញសេចក្តីសម្រេចដាក់ចេញវិធានការរដ្ឋបាលជាបណ្តោះអាសន្ន រយៈពេល១សប្តាហ៍ទៀត រហូតដល់ថ្ងៃទី១៦ ខែកញ្ញា ឆ្នាំ២០២១ ដើម្បីទប់ស្កាត់ការឆ្លងរាលដាលនៃជំងកូវីដ១៩ ប្រភេទ Delta ក្នុងខេត្ត។ តាមសេចក្តីសម្រេចដែលបណ្តាញព័ត៌ទទួលបាននៅព្រលប់ថ្ងៃទី៩ខែកញ្ញា ឆ្នាំ២០២១នេះ បានបញ្ជាក់ថា ត្រូវបានបន្តអនុវត្តន៍វិធានការរដ្ឋបាលជាបណ្តោះអាសន្ន ក្នុងភូមិសាស្ត្រខេត្តព្រះវិហារ សម្រាប់រយៈពេល៧ថ្ងៃ គិតចាប់ពីថ្ងៃទី១០ ខែកញ្ញា ឆ្នាំ២០២១ រហូតដល់ថ្ងៃទី១៦ ខែកញ្ញា ឆ្នាំ២០២១ សំដៅទប់ស្កាត់ការឆ្លងរាលដាលក្នុងសហគមន៍ ដែលបណ្តាលមកពីមេរោគកូវីដ១៩ ប្រភេទ Delta៕ដោយ៖សៅវ៉ាន់ឌី ខាងក្រោមនេះជាសេចក្តីប្រកាសរបស់រដ្ឋបាលខេត្តព្រះវិហារ

ព័ត៌មានសង្គម សុខាភិបាល

បន្តរកឃើញអ្នកជំងឺកូវីដចំនួន១៧នាក់ ជាសះស្បើយម្នាក់នៅព្រះវិហារ

ព្រះវិហារ៖ រដ្ឋបាលខេត្តព្រះវិហារ បានចេញសេចក្តីប្រកាសព័ត៌មានពីការរកឃើញអ្នកជំងឺកូវីដ១៩ ចំនួន១៧នាក់បន្ថែមទៀត តាមរយៈការធ្វើតេស្តរហ័ស Rapid Test និងអ្នកជាសះស្បើយចំនួនម្នាក់ នៅថ្ងៃទី៨ ខែកញ្ញា ឆ្នាំ២០២១នេះ។ តាមសេចក្តីប្រកាសរបស់រដ្ឋបាលខេត្តព្រះវិហារ បានឱ្យដឹងថា ក្នុងចំណោមអ្នកជំងឺកូវីដ១៩ ទាំង១៧នាក់ ត្រូវបានបញ្ជូនទៅសម្រាកព្យាបាលនៅមណ្ឌលព្យាបាលជំងឺកូវីដ១៩ កម្រិតស្រាលនៅវិទ្យាល័យរវៀង និងវិទ្យាល័យជាស៊ីមត្បែងមានជ័យ។ សូមបញ្ជាក់ថា គិតត្រឹមថ្ងៃទ៨ខែកញ្ញា ឆ្នាំ២០២១នេះ ខេត្តព្រះវិហារ បានរកឃើញជំងឺកូវីដ១៩ ចំនួន ១.២៦៤នាក់ ជាសះស្បើយចំនួន ៨១៨នាក់ កំពុងសម្រាកព្យាបាលចំនួន ៤៤៥នាក់ និងស្លាប់ចំនួន៣នាក់៕ដោយ សៅវ៉ាន់ឌី ខាងក្រោមនេះជាសេចក្តីប្រកាសព័ត៌មានរបស់រដ្ឋបាលខេត្តព្រះវិហារ

ព័ត៌មានសង្គម សន្តិសុខ សុខាភិបាល

ប្តីឌុបប្រពន្ធមានផ្ទៃពោះតាមម៉ូតូក៏សម្រាលកូនកណ្តាលផ្លូវ

រតនគិរី៖បុរសម្នាក់បានឌុបប្រពន្ធមានផ្ទៃពោះគ្រប់ខែតាមម៉ូតូទៅមណ្ឌលសុខភាពស្រាប់តែប្រពន្ធឈឺពោះសម្រាលកូនភ្លាមៗតាមផ្លូវ។ហេតុការណ៍នេះបណ្តាលឱ្យមានការភ្ញាក់ផ្អើលដល់ប្រជាពលរដ្ឋ និងអាជ្ញាធរនៅព្រំប្រទល់ឃុំត្រពាំងច្រេស និងឃុំត្រពាំងក្រហម ស្រុកកូនមុំ ខេត្តរតនគិរី កាលពីវេលាម៉ោង៤ទៀបភ្លឺចូលថ្ងៃទី២៧ ខែសីហា ឆ្នាំ២០២១។ ស្ត្រីសម្រាលកូនតាមផ្លូវនេះឈ្មោះ ហេង ស្រីនាថ អាយុ ២៣ឆ្នាំរស់នៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី ។មុនកើតហេតុប្រពន្ធប្រាប់ប្តីថា ឈឺពោះរីឯប្តីក៏ប្រញាប់ឌុបប្រពន្ធទៅមណ្ឌលសុខភាព លុះដល់ពាក់កណ្តាលផ្លូវ ស្រ្តីរូបនេះក៏បានសម្រាលតាមផ្លូវតែម្តង ដោយពុំទាន់ដល់មណ្ឌលសុខភាពនៅឡើយ។ពេលនោះ អាជ្ញាធរឃុំ និងស្រុកបាន បញ្ជាឱ្យខាងមណ្ឌលសុខភាព ដឹកនាំគ្រូពេទ្យទៅអន្ដរាគមន៍ដើម្បីជួយសង្គ្រោះ តែមិនមានគ្រោះថ្នាក់អ្វីឡើយទាំងម្តាយ និងទារក៕ដោយ៖ឦសាន្ត

ព័ត៌មានសង្គម សន្តិសុខ សុខាភិបាល សេដ្ឋកិច្ច

ជំនាញកម្ទេចចោលអាល់កុលក្លែងក្លាយជាង៧ម៉ឺនលីត្រ

ភ្នំពេញ៖អង្គភាពជំនាញផ្នែកប្រយុទ្ធប្រឆាំងផលិតផលក្លែងក្លាយបាន កម្ទេចចោលអាល់កុលក្លែងក្លាយចំនួនជាង ៧ម៉ឺនលីត្រ នៅទីលានចាក់សំរាមខណ្ឌដង្កោ រាជធានីភ្នំពេញ។ ឧត្តមសេនីយ៍ឯក គឹម ជាតិអនុរដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ កាលពី​នៅថ្ងៃទី២៦ ខែសីហា ឆ្នាំ២០២១បានអំពាវនាវដល់ជនខិលខូចឱ្យឈប់លក់អាល់កុល និងបរិក្ខារពេទ្យក្លែងក្លាយបន្តទៀតព្រោះប្រឈមនឹងទោសទណ្ឌ។​ ឧត្តមសេនីយ៍ឯក គឹម ជាតិ បានបន្តថា គណៈកម្មាធិការអត់បញ្ឈប់ការស្រាវជ្រាវ បរិក្ខារពេទ្យទេ ត្រូវតែពិនិត្យ និងបង្ក្រាបជានិច្ច។ក៏សូមអំពាវនាវ ទៅដល់អាជីវករទាំងអស់នាំចូល ចែកចាយឱ្យមានគុណភាព ដើម្បីរួមចំណែកការពារកូវីដ១៩។ គួរបញ្ជាក់ថា អាល់កុលក្លែងក្លាយ ដែលប្រើសារធាតុមេតាណុលលើសកម្រិត តាមលទ្ធផលវិភាគរបស់មន្ទីរពិសោធន៍ និងក្រសួងសុខាភិបាល ចំនួន ៧៤.០៦០លីត្រ ដែលត្រូវកម្ទេចចោលនៅថ្ងៃនេះ បានមកពីការបង្ក្រាបនៅទីតាំងស្ថិតនៅភូមិព្រែកទាល់១ សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ កាលពីថ្ងៃទី១ ខែមិថុនា ឆ្នាំ២០២១កន្លងទៅ៕ដោយ៖មនោរម្យ

ព័ត៌មានសង្គម សន្តិសុខ សុខាភិបាល សេដ្ឋកិច្ច

ចុះចាប់ក្រុមកង់បីប្រមូលផ្ដុំគ្នាផឹកស៊ីតាមទីសាធារណៈ

ភ្នំពេញ៖កម្លាំងអាជ្ញាធរខណ្ឌដូនពេញបានចុះចាប់ក្រុមអ្នករត់កង់បីប្រមាណជាង១០នាក់កំពុងប្រមូលផ្ដុំគ្នាផឹកស៊ីតាមទីសាធារណៈតែដកហូតកង់បីចំនួន១០គ្រឿងឯមនុស្សរត់បាត់អស់។ ការចុះបង្ក្រាបនេះបានធ្វើឡើងនៅម្តុំក្បែរព្រះសក្យមុនីចេតិយ៍ក្នុងសង្កាត់ច្រះចក ខណ្ឌដូនកាលពីល្ងាចថ្ងៃទី២៥ ខែសីហា ឆ្នាំ២០២១ ។មុនពេលកម្លាំងអាជ្ញាធរទៅដល់ក្រុមអ្នករត់កង់បីទាំងអស់ដែលកំពុងប្រមូលផ្តុំគ្នាផឹកស៊ីបានរត់ចោលម៉ូតូកង់បីបាត់អស់ទើបកម្លាំង ដកហូត និងបញ្ជូនទៅរក្សាទុកនៅសាលាខណ្ឌ។ មន្ត្រីមូលដ្ឋានបានឱ្យដឹងថា រដ្ឋបាលរាជធានីកំពុងយកចិត្តទុកដាក់ពីបញ្ហាការប្រមូលផ្ដុំជួបជុំ ខុសពីគោលការណ៍និងសេចក្ដីណែនាំ ព្រោះអាជ្ញាធរគ្រប់លំដាប់ថ្នាក់កំពុងចូលរួម បង្ការទប់ស្កាត់ការរីករាលដាលជំងឺកូវីដ១៩ឬវីរុសបំប្លែងថ្មី ប្រភេទដាតា។ កម្លាំងអាជ្ញាធរបានយកម៉ូតូកង់បីទាំងអស់ទៅរក្សាទុកនៅនគរបាលខណ្ឌដូនពេញរង់ចាំម្ចាស់ចូលខ្លួនមកដោះស្រាយ៕ដោយ៖ចំប៉ា

ព័ត៌មានសង្គម សន្តិសុខ សុខាភិបាល សេដ្ឋកិច្ច

ចាប់ម្ចាស់ហាង,ភ្ញៀវនិងនារីខារ៉ាអូខេ៧នាក់ល្មើសបម្រាម

កំពត៖កម្លាំងនគរបាលខេត្តកាលពីយប់ថ្ងៃទី២៥ ខែសីហា បានចុះចាប់ម្ចាស់ហាងមួយយីហោ“ វាសនាសប្បាយ សប្បាយ”បានជួបជុំផឹកស៊ីច្រៀងលេងល្មើសនឹងបម្រាម។ ម្ចាស់ហាងឈ្មោះ ជា សុខហួរ ភេទប្រុស អាយុ ៤១ឆ្នាំ បានបើកឱ្យដំណើរការ ខារ៉ាអូខេ ជួបជុំផឹកស៊ី និងច្រៀងលេងអឺងកងមួយបន្ទប់រួមមានមនុស្សចំនួន៧នាក់។ក្នុងនោះមានស្រី៤នាក់ ជាការល្មើសបម្រាមរាជរដ្ឋាភិបាល និងក្រសួងសុខាភិបាលដែលហាងនេះនៅសង្កាត់ក្រាំងអំពិល ក្រុងកំពត ខេត្តកំពត។ ចំពោះភ្ញៀវប្រុសស្រីនិងអ្នកបម្រើខារ៉ាអូខេទាំងអស់មានអាយុពី១៨ដល់៣៤ឆ្នាំពួកគេនៅក្រុងកំពត ខេត្តកំពត។បន្ទាប់មក សមត្ថកិច្ចបានធ្វើតេស្តរហ័សលើជនទាំង៧នាក់នេះជាលទ្ធផលគឺអវិជ្ជមានកូវីដ-១៩។សមត្ថកិច្ចបានកសាងសំណុំរឿងដើម្បីបញ្ជូនទៅអនុវត្តបន្ត៕ដោយ៖ទឹកឈូ

ព័ត៌មានសង្គម សន្តិសុខ សុខាភិបាល

បិទខ្ទប់ភូមិចំនួន២ជាតំបន់ក្រហមរយៈពេល១៤ថ្ងៃ

ព្រះវិហារ៖នៅថ្ងៃទី២៦ ខែសីហា ឆ្នាំ២០២១នេះរដ្ឋបាលខេត្តព្រះវិហា បានបិទខ្ទប់ និងកំណត់ភូមិគូលែនជើង និងភូមិគូលែនត្បូងក្នុងឃុំគូលែនជើង ស្រុកគូលែនជាតំបន់ក្រហម រយៈពេល១៤ថ្ងៃ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ បម្លែងថ្មីដេលតា(Delta)។ សេចក្តីសម្រេចនៃរដ្ឋបាលខេត្តបានបង្ហាញឱ្យដឹងនៅល្ងាចថ្ងៃនេះថា៖ ត្រូវបានបិទខ្ទប់តំបន់ដែលមានការឆ្លងរាលដាលនៃជំងឺកូវីដ១៩ ជាបណ្តោះអាសន្ន រយៈពេល ២សប្តាហ៍ គិតចាប់ពីថ្ងៃទី២៦ ខែសីហាដល់ថ្ងៃទី៨ ខែកញ្ញា ឆ្នាំ២០២១។ដើម្បីទប់ស្កាត់ការឆ្លងរាលដាលជំងឺកូវីដ១៩ Delta ដោយកំណត់ភូមិគូលែនជើង និងភូមិគូលែនត្បូង ស្ថិតក្នុងឃុំគូលែនជើង ស្រុកគូលែនជា “តំបន់ក្រហម”៕ដោយ ញ៉ែមសុផល   ខាងក្រោមនេះ ជាសេចក្តីសម្រេចរបស់រដ្ឋបាលខេត្តព្រះវិហារ

ព័ត៌មានសង្គម សន្តិសុខ សុខាភិបាល

បិទខ្ទប់ផ្សារកំពង់ប្រណាក ជាលើកទី៤ រយៈពេល៧ថ្ងៃទៀត

ព្រះវិហារ៖ រដ្ឋបាលខេត្តព្រះវិហារ បានសម្រេចបបិទខ្ទប់ ផ្សារកំពង់ប្រណាកជាបណ្តោះអាសន្ន រយៈពេលមួយសប្តាហ៍បន្ថែមទៀត គិតចាប់ពីថ្ងៃទី២៧ ខែសីហា រហូតដល់ថ្ងៃទី២ ខែកញ្ញា ឆ្នាំ២០២១ ដើម្បីទប់ស្កាត់ការរីករាលដាលនៃជំងឺកូវីដ១៩។ផ្សារនេះស្ថិតក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ។ សេចក្តីសម្រេចនៃរដ្ឋបាលខេត្តបានឱ្យដឹងនៅល្ងាចថ្ងៃទី២៦ ខែសីហានេះថា ការបន្តបិទខ្ទប់ផ្សារកំពង់ប្រណាកជាបណ្តោះអាសន្ន រយៈពេល១សប្តាហ៍ទៀតនេះក្នុងគោលបំណងធានាប្រសិទ្ធភាពដល់ការគ្រប់គ្រងការឆ្លងរាលដាលជំងឺកូវីដ១៩ នៅក្នុងទីតាំងភូមិសាស្ត្រដែលត្រូវបានបិទ និងទប់ស្កាត់មិនឱ្យឆ្លង រាលដាលទៅតំបន់ផ្សេងទៀត រហូតដល់មានការជូនដំណឹងសាជាថ្មី។ បញ្ជាក់ថា ផ្សារកំពង់ប្រណាក នេះត្រូវបានអាជ្ញាធរខេត្តបិទខ្ទប់ជាបណ្តោះអាសន្ន ៣លើកមកហើយ លើកទី១ ថ្ងៃទី១៦ ខែកក្កដា លើកទី២ ថ្ងៃទី៣០ ខែកក្កដា ២១លើកទី៣ ថ្ងៃទី១២ខែសីហា និងលើកទី៤ចាប់ពីថ្ងៃទី២៧ ខែសីហាដល់ថ្ងៃទី២ ខែកញ្ញា ឆ្នាំ២០២១ ៕ដោយ សៅវ៉ាន់ឌី