ព័ត៌មានទេសចរណ៍ ព័ត៌មានសង្គម សេដ្ឋកិច្ច

ត្រីអារ៉ាប៉ៃម៉ាប្រភពមកពីតំបន់អាម៉ាហ្សូនបានងាប់ក្នុងកសិន្ធុប្រាសាទអង្គរវត្ដដោយធម្មជាតិ

សៀមរាប៖ អាជ្ញាធរជាតិអប្សរាចេញសេចក្តីប្រកាសព័ត៌មានករណីប្រទះឃើញត្រីអារ៉ាប៉ៃម៉ា (Arapaima) ជាប្រភេទត្រីទឹកសាប មានប្រភពមកពីតំបន់អាម៉ាហ្សូននៅអាម៉េរិកខាងត្បូងបានងាប់នៅក្នុងកសិន្ធុប្រាសាទអង្គរវត្ដដោយធម្មជាតិ។អាជ្ញាធរជាតិអប្សរា មានកិត្តិយសសូមជម្រាបជូនសាធារណជនជ្រាបថា កាលពីរសៀលថ្ងៃទី០៣ ខែវិច្ឆិកាឆ្នាំ២០២២ក្រុមការងារសម្អាតបរិស្ថាន អនាម័យនៃអាជ្ញាធរជាតិអប្សរា បានប្រទះឃើញត្រីអារ៉ាប៉ៃម៉ា (Arapalma)មួយក្បាល។ត្រីនោះ ប្រវែង២,១៥ម៉ែត្រ ទទឹង០.៤០ម៉ែត្រ ដែលជាប្រភេទត្រីទឹកសាប មានប្រភពមកពីតំបន់អាម៉ាហ្សូននៅអាមេរិកខាងត្បូង បានងាប់នៅក្នុងកសិន្ទុប្រាសាទអង្គរវត្ត។ ក្រុមការងារបានស្រង់យកត្រីនោះមកលើច្រាំង ជូនអ្នកជំនាញខាងជលផលពិនិត្យ និងបានកប់នៅផ្នែកខាងជើង នៃកសិន្ធុប្រាសាទអង្គរវត្ត។តាមការសន្និដ្ឋានរបស់អ្នកជំនាញផ្នែកជលផល ត្រីនេះងាប់ដោយធម្មជាតិព្រោះមិនមានស្លាកស្នាមរិតរួតនៃមងឬប្រការអ្វីផ្សេងឡើយ។ ត្រីងាប់នេះ ជាប្រភេទត្រីដែលស៊ីត្រីតូចជាងខ្លួនជាអាហារហើយត្រូវបានមហាជនលួចយកព្រលែងក្នុងកសិន្ទប្រាសាទអង្គរវត្ត។ពាក់ព័ន្ធនឹងករណីនេះ នាពេលកន្លងមក អាជ្ញាធរជាតិអប្សរាធ្លាប់បានចេញសេចក្តីប្រកាសណែនាំហាមឃាត់ការព្រលែងត្រីក្នុងកសិន្ទុ ដែលមិនមែនជាប្រភេទត្រីក្នុងស្រុកពីព្រោះសកម្មភាពនេះ អាចនាំឱ្យមានការបាត់បង់ពូជត្រីធម្មជាតិក្នុងស្រុកផងដែរ។អាស្រ័យហេតុដូចបានជម្រាបជូនខាងលើសូមសាធារណៈជនមេត្តាជ្រាបជាព័ត៌មាន៕

ព័ត៌មានទេសចរណ៍ ព័ត៌មានសង្គម វប្បធម៌

ពិធីអុំទូកនៅខេត្តបាត់ដំបងមានភ្ញៀវទេសចរជាង៦ម៉ឺននាក់មកលេងកម្សាន្ត

បាត់ដំបង៖ថ្ងៃដំបូងក្នុងឱកាសអុំទូក-បណ្តែតប្រទីប-សំពះព្រះខែនៅខេត្តបាត់ដំបងមានភ្ញៀវទេសចរជាង៦ម៉ឺននាក់មកលេងកម្សាន្តនិងអបអរសាទរក្នុងពីធីនេះ។លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឱ្យដឹងនៅថ្ងៃទី១០ ខែតុលានេះថា អ្នកមកកម្សាន្ត ក្នុងពិធីអុំទូកចេញព្រះវស្សាតាមស្ទឹងសង្កែក្នុងក្រុងបាត់ដំបងនាថ្ងៃទី១ ត្រូវនឹងថ្ងៃទី៩ ខែតុលានេះភ្ញៀវទេសចរមានចំនួន ៦១.២៧៨នាក់។ក្នុងចំណោមភ្ញៀវទេសចរជាង៦ម៉ឺននាក់នោះមានភ្ញៀវទេសចរជាតិចំនួន ៦១.១៨៩ នាក់និងភ្ញៀវទេសចរអន្តរជាតិចំនួន៨៩នាក់។លោក សុខ លូ អភិបាលខេត្តបាត់ដំបង បានលើកឡើងថា ការរៀបចំក៏ដូចជាការចូលរួមរបស់ ប្រជាពលរដ្ឋយ៉ាងច្រើនកុះករនៅក្នុងពិធីនេះពិតជាបានបង្ហាញឱ្យឃើញពីទឹកចិត្តស្រឡាញ់ និងការគាំទ្រដល់វិស័យកីឡា ។ជាមួយនោះជាការលើកស្ទួយវប្បធម៌ កេរដំណែលប្រពៃណីរបស់បុព្វបុរសខ្មែរ ព្រមទាំងបានឆ្លុះបញ្ចាំងពីស្មារតីសាមគ្គីភាព មិត្តភាពហើយបានផ្សារភ្ជាប់ទំនៀមទម្លាប់ប្រពៃណី និងវប្បធម៌នៃពលរដ្ឋខ្មែរក្នុង និងក្រៅខេត្តបានយ៉ាងល្អ ៕

Featured ប្លែកៗ ព័ត៌មានទេសចរណ៍ ព័ត៌មានសង្គម សេដ្ឋកិច្ច

សត្វខ្ទីង១ក្បាលទម្ងន់ប្រមាណជាង១តោនងាប់ពេលធ្លាក់ចូលរណ្តៅដី

ឧត្តរមានជ័យ៖ពលរដ្ឋប្រទះឃើញសត្វខ្ទីងឈ្មោល១ក្បាលចេញពីព្រៃទម្ងន់ប្រមាណជាង១តោនធ្លាក់ចូលរណ្តៅដីរហូតដល់ងាប់ខណៈអាជ្ញាធរខំជួយតែមិនអាចសង្គ្រោះបាន។សត្វខ្ទីងឈ្មោលប្រទះរកឃើញក្នុងរណ្ដៅអណ្ដូងចាស់នោះនៅក្បែរដីចម្ការមួយកន្លែងម្តុំជប់ត្រកួន ក្នុងដែនព្រៃសហគមន៍សាមគ្គីសង្គ្រោះព្រៃឈើ ភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យកាលពីថ្ងៃទី៤ ខែតុលា ។មេភូមិអូរតាម៉េង លោក រ៉ុន រឹត បានឱ្យដឹងកាលពីថ្ងៃទី៥ ខែតុលាថា មានសត្វខ្ទីង​ឈ្មោលមួយក្បាល​បានចូលទៅក្នុងភូមិដេញវ័ធក្មេងៗ។ ពេលនោះអ្នកភូមិ-ប្រជាការពារ និងមន្រ្តីបរិស្ថាន​ដែលប្រចាំការទីនោះ បាននាំគ្នាដេញបង្អើលឱ្យចូលទៅក្នុងព្រៃអភិរក្សគូរព្រហ្មទេព ហើយសត្វខ្ទីង​នោះបានរត់គេចចូលទៅក្នុងព្រៃវិញ។មេភូមិបន្តថា លុះដល់រសៀលថ្ងៃដដែលពលរដ្ឋប្រទះឃើញសត្វខ្ទីងមួយក្បាល​នោះកំពុងធ្លាក់ក្នុងរណ្តៅចាស់ដែលគេជីកយកទឹកប្រើជាច្រើនឆ្នាំនៅក្នុង​ចម្ការ​ចេកមួយ។ ភ្លាមៗនោះកម្លាំងអាជ្ញាធរនិងសមត្ថកិច្ចពាក់ព័ន្ធមកជួយសង្គ្រោះអូសសត្វខ្ទីងនោះចេញពីរណ្តៅ។ប៉ុន្តែ​ដោយ​សារសត្វខ្ទីងនោះ វាមានទម្ងន់ប្រមាណជាង១ពាន់គីឡូក្រាម មិនអាចជួយ​សង្រ្គោះបានបណ្តាលឱ្យសត្វនោះងាប់តែម្តង៕

Featured ព័ត៌មានទេសចរណ៍ ព័ត៌មានសង្គម សន្តិសុខ

អាជ្ញាធរដាស់តឿនឱ្យប្រុងប្រយ័ត្នចំពោះដើមឈើអាចរលំក្នុងរមណីយដ្ឋានអង្គរ

សៀមរាប៖អាជ្ញាធរជាតិអប្សរាបានអំពាវនាវ ដល់ពលរដ្ឋនិងភ្ញៀវទេសចរ ដែលមកទស្សនាតំបន់អង្គរនៅក្នុងរដូវវស្សានេះ ឱ្យប្រុងប្រយ័ត្នចំពោះគ្រោះថ្នាក់ ដែលអាចមកពីដើមឈើដួលរលំ។មន្ត្រីអាជ្ញាធរជាតិអប្សរាកាលពីចុងសប្ដាហ៍មុនបានអំពាវនាវដោយបញ្ជាក់អំពីការយកចិត្តទុកដាក់ ទៅលើសុវត្ថិភាពរបស់សាធារណជននិងភ្ញៀវទេសចរថា បច្ចុប្បន្ននេះស្ថានភាពអាកាសធាតុទូទៅកំពុងស្ថិតក្នុងរដូវវស្សា។គឺមានភ្លៀងធ្លាក់ខ្លាំងជាប្រចាំ ព្រមទាំងសម្ពាធទាប ដែលបង្កឱ្យមានឥទ្ធិពលពីខ្យល់ព្យុះផ្សេងៗកាន់តែធ្វើឱ្យមានភ្លៀងធ្លាក់លើសពីធម្មតា និងមានខ្យល់ល្បឿនខ្លាំង។ ក្នុងស្ថានភាពនេះ រមណីយដ្ឋានអង្គរក៏ទទួលរងទឹកភ្លៀងក្នុងកម្រិតខ្ពស់ បណ្តាលឱ្យដីមានភាពទន់ជ្រាយវាអាចបណ្តាលឱ្យដើមឈើមួយចំនួនដួលរលំ ព្រមទាំងបង្កផលប៉ះពាល់ដល់ប្រាង្គប្រាសាទ។ជាមួយនោះសុវត្ថិភាពរបស់ប្រជាពលរដ្ឋ និងភ្ញៀវទេសចរទាំងឡាយដែលឆ្លងកាត់ និងចូលទៅទស្សនាក្នុងរមណីយដ្ឋានអង្គរ។អាជ្ញាធរជាតិអប្សរាបានក្រើនរំលឹក ឱ្យមានការប្រុងប្រយ័ត្នខ្ពស់ ក្នុងដំណើរចូលទៅកម្សាន្តក្នុងរមណីយដ្ឋានអង្គរ ។ជាពិសេស ពេលមានភ្លៀងធ្លាក់ខ្លាំង គឺសូមនៅឱ្យឆ្ងាយពីដើមឈើធំៗ កុំចូលទៅជ្រក ឬចតយានយន្តក្រោមដើមឈើឡើយ ដើម្បីចៀសវាងគ្រោះថ្នាក់ណាមួយកើតឡើង៕

ព័ត៌មានទេសចរណ៍ ព័ត៌មានសង្គម

បុណ្យភ្ជុំបិណ្ឌ៣ថ្ងៃខេត្តព្រះវិហារទទួលភ្ញៀវជាតិនិងអន្តរជាតិប្រមាណជា១ម៉ឺននាក់

ព្រះវិហារ៖រយៈពេល៣ថ្ងៃនៃបុណ្យភ្ជុំបិណ្ឌ៣ថ្ងៃនៅខេត្តព្រះវិហារ បានទទួលភ្ញៀវជាតិនិងអន្តរជាតិសរុបចំនួន១៣.៥៦៤នាក់។នេះជារបាយការណ៍នៃមន្ទីរទេសចរណ៍ខេត្តព្រះវិហារកាលពីរសៀលថ្ងៃទី២៦ ខែកញ្ញា ឆ្នាំ២០២២។មន្ត្រីមន្ទីរទេសចរណ៍ខេត្តបានឱ្យដឹងថា ភ្ញៀវទេសចរណ៍ទាំងជាតិ និងអន្តរជាតិដែលធ្វើដំណើរកម្សាន្តនៅតាមរមណីយដ្ឋានគោលដៅនៅទូទាំងខេត្តព្រះវិហារ ដោយគិតក្នុងរយៈពេល ៣ថ្ងៃ គឺចាប់ពីថ្ងៃទី២៤ ដល់២៦ ខែកញ្ញា ឆ្នាំ២០២២ នៃពិធីបុណ្យភ្ជុំបិណ្ឌ ។ខេត្តព្រះវិហារ ទទួលបានភ្ញៀវទេសចរណ៍សរុបចំនួន ១៣,៥៦៤នាក់ ធៀបនឹងឆ្នាំ២០២១ មានចំនួន ១២.៦៨៦នាក់ កើនឡើង ៦,៩២ភាគរយ។ ក្នុងនោះភ្ញៀវជាតិ ១៣,៤៦១នាក់ ធៀបនឹងឆ្នាំ២០២១ មានចំនួន ១២.៦៥៩នាក់ កើនឡើង ៦,៣៤ភាគរយ ភ្ញៀវបរទេស ១០៣នាក់ ធៀបនឹងឆ្នាំ២០២១ មានចំនួន ២៧នាក់ កើនឡើង ២៨១,៤៨ភាគរយ៕ដោយ៖សៅ វ៉ាន់ឌី

Featured ព័ត៌មានទេសចរណ៍ ព័ត៌មានសង្គម សេដ្ឋកិច្ច

មិនទាន់ដឹងមូលហេតុការងាប់កូនសត្វផ្សោតមួយក្បាលនៅឡើយ

ក្រចេះ៖ពលរដ្ឋប្រទះឃើញកូនសត្វផ្សោតមួយក្បាលទម្ងន់ជាង១០គីឡូក្រាមបានងាប់អណ្តែតទើលើច្រាំងទន្លេមេគង្គរហូតមកដល់ពេលនេះមិនទាន់ដឹងពីមូលហេតុនៅឡើយ។ប្រជាពលរដ្ឋបានឱ្យដឹងថា កាលពីថ្ងៃទី៧ ខែសីហាកូនផ្សោតឈ្មោលមួយក្បាលមានទម្ងន់ជាង១០គីឡូក្រាមត្រូវបានប្រទះឃើញងាប់នៅដងទន្លេមេគង្គក្នុងឃុំសំបុក ស្រុកចិត្របុរី ខេត្តក្រចេះក្នុងតំបន់អភិរក្សតំបន់រមណីយដ្ឋានអន្លង់ផ្សោតកាំពី។មកដល់ពេលនេះ គេនៅមិនទាន់ដឹងពីមូលហេតុ កូនសត្វផ្សោតខាងលើងាប់ដោយសារអ្វីនៅឡើយទេ។ប៉ុន្តែប្រជាពលរដ្ឋសន្និដ្ឋានថា ទំនងជនល្មើសបានប្រើឧបករណ៍នេសាទខុសច្បាប់ដែលនាំឱ្យមានការគំរាមកំហែងដល់ការរស់រានរបស់សត្វផ្សោតនៅរមណីយដ្ឋានអន្លង់ផ្សោតកាំពី។ក្នុងនោះរួមមានការដាក់មងខុសច្បាប់ការប្រើប្រាស់ឧបករណ៍ឆក់ជាដើម។អ្នកជំនាញបានឱ្យដឹងថា សត្វផ្សោតគឺជាប្រភេទសត្វកម្រមួយនៅលើពិភពលោកដែលមានអង្គការជាច្រើនបាននិងកំពុងចូលរួមអភិរក្ស។អង្គការWWF បានសហការជាមួយរាជរដ្ឋាភិបាលកម្ពុជាយ៉ាងជិតស្និទ្ធក្នុងការចូលរួមអភិរក្សសត្វផ្សោតនេះ។ប៉ុន្តែដោយសារតែការនេសាទមួយចំនួនបានប៉ះពាល់ដល់ការរស់នៅរបស់សត្វផ្សោតទើបធ្វើឱ្យងាប់ជាបន្តបន្ទាប់៕

ព័ត៌មានទេសចរណ៍ ព័ត៌មានសង្គម សេដ្ឋកិច្ច

បើកច្រកទ្វារអានសេះឡើងវិញក្រោយផ្អាកជាង២ឆ្នាំដោយជំងឺកូវីដ១៩

ព្រះវិហារ៖ច្រកព្រំដែនអានសេះ ក្នុងភូមិអានសេះ ឃុំជាំក្សាន្ត ស្រុកជាំក្សាន្តខេត្តព្រះវិហារ ព្រំដែនថៃនៅថ្ងៃទី២១ ខែកក្កដាឆ្នាំ២០២២នេះ បានបើកឱ្យពលរដ្ឋចេញ ចូលឡើងវិញហើយ បន្ទាប់ពីបិទជាបណ្តោះអាសន្នជាង២ឆ្នាំ ដោយសារតែការរីករាលដាលនៃជំងឺកូវីដ១៩។ អាជ្ញាធរស្រុកជាំក្សាន្ត បានឱ្យដឹងថា តាមការឯកភាពគ្នារវាងភាគីខ្មែរ និងថៃ កាលពីថ្ងៃ៣០ ខែមិថុនាឆ្នាំ២០២២កន្លងទៅទើបថ្ងៃនេះច្រកព្រំដែនអានសេះ ត្រូវបានបើកឡើងវិញ ហើយ។នៅថ្ងៃនេះដែរ អាជ្ញាធរក៏បានចុះមកពិនិត្យដោយផ្ទាល់បើកច្រកអានសេះ ដើម្បីដោះដូរទំនិញគ្នារវាងពលរដ្ឋនៃប្រទេសពីរ។ លោក វុធ តារ៉ា អាជ្ញាធរស្រុកជាំក្សាន្ត ក៏បានបង្ហាញក្តីសប្បាយរីករាយ ដោយបានមើលឃើញពលរដ្ឋជាអាជីវករគាត់បានប្រកបរបរអាជីវកម្មលក់ដូរឡើងវិញ ដូចមុន។អ្វីៗដែលវិលត្រឡប់មកវិញនៅច្រកព្រំដែនអានសេះនេះ។កត្តាទី១ សុខសន្តិភាព និងកត្តាទី២  ការប្រយុទ្ធប្រឆាំងជំងឺកូវីដ១៩ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា ទទួលបានជោគជ័យ។   អាជ្ញាធរក៏បានណែនាំដល់បងប្អូនអាជីវករខ្មែរ នៅក្នុងជំនួបពិភាក្សាកាលពីថ្ងៃទី៣០ ខែមិថុនា ឆ្នាំ២០២២ ស្តីពីការបើកដំណើរការច្រកអានសេះឡើងវិញ ភាគីកម្ពុជា-ថៃ បានការឯកភាពគ្នា។ថ្ងៃបើកច្រកមានចំនួន៣ថ្ងៃ គឺថ្ងៃអង្គារ៍ ព្រហស្បតិ៍ និង សៅរ៍ ដោយបើកចាប់ពីម៉ោង៨៖៣០នាទីព្រឹក រហូតដល់ម៉ោង៤៖៣០ រសៀល។ ប្រជាពលរដ្ឋចេញ-ចូល ត្រូវកត់ឈ្មោះបង្ហាញកាតចាក់វ៉ាក់សាំង បើគ្មានកាតទេ ត្រូវមានលិខិតបញ្ជាក់ពីមណ្ឌលសុខភាព ក្នុងរយៈ […]

Featured ព័ត៌មានទេសចរណ៍ ព័ត៌មានសង្គម

មន្ទីរបរិស្ថានខេត្តព្រះវិហារអំពាវនាវដល់ព្រានព្រៃសុំទម្លាក់អាវុធកែច្នៃចោល

ព្រះវិហារ៖ប្រជាពលរដ្ឋប្រទះឃើញសត្វខ្ទីងចំនួន២ក្បាលជាសត្វដ៏កម្រស្ទើរតែផុតពូជ បានចូលមកក្នុងហ្វូងសត្វគោរបស់ពួកគាត់នៅ ភូមិស្រែវាល ឃុំធ្មាស្រុកជ័យសែនខេត្តព្រះវិហារកាលពីយប់ថ្ងៃទី១០ខែកក្តដាឆ្នាំ២០២២។ មន្ត្រីមន្ទីរបរិស្ថានខេត្តព្រះវិហារបានឱ្យដឹងនៅព្រឹកថ្ងៃទី១១កក្តដានេះថា សត្វខ្ទីងចំនួន២ក្បាលដែលបានបែកពីហ្វូងរបស់ពួកវាហើយរត់គេចមកពីក្នុងព្រៃឡង់ចូលមកក្នុងហ្វូងសត្វគោរបស់ពលរដ្ឋ។សត្វខ្ទីងទាំង២ក្បាលខាងលើគឺជាសត្វខ្ទីងឈ្មោលមួយក្បាលនិងកូនសត្វទ្ទីងមួយក្បាលដែលបានរត់មកជ្រកក្នុងហ្វូងគោពលរដ្ឋ។ តាមការសន្និដ្ឋានសត្វខ្ទីងទាំង២ក្បាលខាងលើ រត់មកជ្រកជាមួយហ្វូងគោនៅជិតទីស្នាក់ការ ការពារដែនជម្រកសត្វព្រៃនៃព្រៃឡង់នោះ។ដើមចមទំនងបង្កឡើងដោយសារតែពួកព្រានព្រៃដែលបានរំខានតាមបរបាញ់ទើបពួកវាភ័យខ្លាចបានរត់គេចបែកពីហ្វូងមកជ្រកជាមួយហ្វូងគោ។ ពេលនោះមន្ត្រីឩទ្យានុរក្សក៏បានឃើញសត្វខ្ទីងទាំង២ក្បាលដេកជាមួយហ្វូងគោ មួយយប់។លុះព្រឹកឡើងសត្វខ្ទីងទាំង២ក៏បានរត់ចូលទៅក្នុងព្រៃវិញ។ សត្វខ្ទីងទាំង២ក្បាលខាងលើនេះត្រូវបានមន្ត្រីឩទ្យាននុរក្សដែនជម្រកសត្វព្រៃ-ព្រៃឡង់ តាមឃ្លាំមើលយ៉ាងយកចិត្តទុកដាក់ ការពារសុវត្ថិភាពសត្វទាំង២ដើម្បីឱ្យវាបានវិលចូលក្នុងតំបន់ព្រៃឡង់ដែលហ្វូងសត្វដ៏ទៃទៀតកំពុងរស់នៅដោយសុវត្ថិភាព។ ជាមួយគ្នានោះមន្ទីរបរិស្ថានខេត្តព្រះវិហារក៏បានអំពាវនាវយ៉ាងទទួចដល់ពលរដ្ឋដែលរស់នៅជិតៗតំបន់ការពារអភិរក្សក៏ដូចជាក្រុមព្រានព្រៃសូមមេត្តាទម្លាក់អាវុធកែច្នៃចោលនិងបញ្ឈប់តាមបាញ់សត្វព្រៃដើម្បីងាកមកចូលរួមថែរក្សានិងអភិរក្សសត្វនានា។ពិសេសអម្បូរពពួកសត្វខ្ទីងដែលជាសត្វដ៏កម្រហើយស្ទើរតែផុតពូជទៅហើយនោះ។ប្រសិនបើបងប្អូននៅបន្តប្រកប របបរបាញ់សត្វខុសច្បាប់ដែលច្បាប់បានហាមឃាត់គឺវាសនាគេចមិនផុតពីមានទោសទណ្ឌតាមផ្លូវច្បាប់ឡើយ៕ដោយ៖សៅវ៉ាន់ឌី  

ព័ត៌មានទេសចរណ៍ ព័ត៌មានសង្គម

បុរសអាល្លឺម៉ង់ម្នាក់បើកឧទ្ធម្ភាគចក្រចុះចតនៅមាត់ទន្លេដោយអាកាសធាតុមិនល

កំពង់ឆ្នាំង៖​បុរសជនជាតិអាល្លឺម៉ង់ម្នាក់បានបើកឧទ្ធម្ភាគចក្រទេសចរណ៍មកចុះចតនៅមាត់ទន្លេខេត្តកំពុងឆ្នាំងជាបន្ទាន់ដោយសារអាកាសធាតុមិនល្អ។ តាមប្រភពព័ត៌មានពី​លោក​ខៀវ​ កាញារីទ្ធ​ រដ្ឋមន្រ្តីក្រសួងព័ត៌មាន​ បានថ្លែង​នៅលើបណ្ដាញសង្គមហ្វេសប៊ុកផ្ទាល់ខ្លួន​នៅព្រឹកថ្ងៃ​​ទី​៨​ ខែកក្កដា​ឆ្នាំ​២០២២នេះថា​ ឧទ្ធម្ភាគចក្រមួយគ្រឿងបានបង្ខំចុះចតនៅមាត់ទន្លេដើម្បីសុវត្ថិភាពព្រោះតែធាតុអាកាសមិនល្អ។ហេតុការណ៍នេះបានកើតឡើងនៅម៉ោងជាង៧ព្រលប់ថ្ងៃទី៧ ខែកក្កដានៅម្តុំមាត់ទន្លេក្នុងភូមិព្រែករាំង ឃុំទឹកហូត ស្រុករលាប្អៀរខេត្តកំពង់ឆ្នាំង។​ លោករដ្ឋមន្ត្រី​ បានបន្តថា​ មន្ទីរព័ត៌មានខេត្តកំពង់ឆ្នាំង​ យោងតាមរបាយការណ៍របស់លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងបានបញ្ជាក់ឱ្យដឹងថា ក្រោយពេលកើតហេតុ លោកស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានឱ្យក្រុមសមត្ថកិច្ចទៅអន្តរាគមន៍និងដឹកយកអ្នកបើកបរឧទ្ធម្ភាគចក្រជនជាតិអាល្លឺម៉ង់ម្នាក់ឈ្មោះអេន ឌី មកសម្រាកនៅសណ្ឋាគារសុវណ្ណភូមិ ក្នុងក្រុងកំពង់ឆ្នាំង។ ចំណែកឧទ្ធម្ភាគចក្រត្រូវបានកម្លាំងមូលដ្ឋានការពារយ៉ាងយកចិត្តទុកដាក់នៅទីតាំងដែលឧទ្ធម្ភាគចក្របានចុះចត។តាមការបញ្ជាក់ពីអ្នកបើកបរឧទ្ធម្ភាគចក្រ ជនជាតិអាល្លឺម៉ង់បានប្រាប់សមត្ថកិច្ចថា រូបគាត់បើកហោះហើរតែម្នាក់ឯងពីភ្នំពេញទៅខេត្តសៀមរាប។ចំពោះមូលហេតុ គឺដោយសារអាកាសធាតុមេឃងងឹតមានខ្យល់ខ្លាំង។នៅព្រឹកថ្ងៃទី៨ ខែកក្កដាឧទ្ធម្ភាគចក្រនោះបានហោះហើរទៅកាន់គោលដៅខេត្តសៀមរាបវិញ៕

Featured ព័ត៌មានទេសចរណ៍ ព័ត៌មានសង្គម សន្តិសុខ

ដឹកបរទេសទៅមើលថ្ងៃលិចឯប្រាសាទប្រែរូបបាក់ដើមឈើសង្កត់រថយន្ត

សៀមរាប៖ម្ចាស់រថយន្តបានដឹកភ្ញៀវទេសចរបរទេសទៅមើលថ្ងៃលិចនៅប្រាសាទប្រែរូប ។ពេលទៅដល់ស្រាប់តែបាក់ដើមឈើសង្កត់រថយន្តមនុស្សរួចផុតពីគ្រោះថ្នាក់។ អ្នកលក់ដូរនៅទីនោះបានប្រាប់ថា​ កាលពីល្ងាចថ្ងៃទី២០ ខែមិថុនា ក្រោយមានភ្លៀងធ្លាក់មួយមេធំ លាយឡំនិងខ្យល់កន្ត្រាក់ផងនោះ ស្រាប់តែមានដើមឈើយ៉ាងធំមួយនៅម្តុំ ប្រាសាទប្រែរូប បានបាក់ធ្លាក់សង្កត់ត្រូវចំរថយន្តរបស់ភ្ញៀវទេសចរបរទេសដែលកំពុងជិះមកទស្សនាប្រាសាទ ស្ថិតក្នុងភូមិស្រះស្រង់ខាងជើង សង្កាត់នគរធំ ក្រុងសៀមរាប។ សូមបញ្ជាក់ថា រថយន្តដែលដើមឈើបាក់សង្កត់នោះម៉ាកស្តារិចផ្លាកលេខ សៀមរាប 2B-0061 បើកបរដោយឈ្មោះ សោមចាន់ថា អាយុ៣៧ឆ្នាំ នៅស្រុកបន្ទាយស្រី ខេត្តសៀមរាប។ រថយន្តបានដឹកមនុស្ស៥នាក់ ក្នុងចំណោម៥នាក់នោះ មាន៤នាក់ជាភ្ញៀវទេសចរជនជាតិសិង្ហបុរី៣នាក់ អាមេរិកកាំងម្នាក់ និងជនជាតិខ្មែរម្នាក់ជាមគ្គុទេសទេសចរណ៍។ក្រោយកើតហេតុ សមត្ថកិច្ចនិងមន្ត្រីអាជ្ញាធរជាតិអប្សរា បានជួយកាត់មែកឈើយកចេញពីផ្លូវ និងយករថយន្តផ្សេងមកទទួលភ្ញៀវត្រឡប់ទៅស្នាក់នៅសណ្ឋាគារវិញ៕