ព័ត៌មានអន្តរជាតិ៖ពួកមនុស្សល្បីៗនៅលើInstagramកំពុងប្រឈមការរិះគន់យ៉ាងជូរចត់ក្រោយប្រើម៉ាស់ធ្វើជាឈុតប៊ីគីនីដែលគេហៅថា”ក្វារ៉ាន់គីនី”ដែលជាផ្នែកមួយនៃនិន្នាការដ៏គួរឱ្យស្រឡាំងកាំងបំផុតដែលកំពុងបាចសាចពេញបណ្តាញសង្គមចំពេលកំពុងផ្ទុះកូវីដ១៩។
មនុស្សជាច្រើននាំគ្នាទិញម៉ាស់ស្តុកទុកដើម្បីការពារមេរោគយកតែប្រាស់អាយុខណៈមនុស្សរាប់លាននាក់ទៀតនៅទូទាំងពិភពលោកត្រូវដាក់ខ្លួនឯងនៅឯកោដោយសារតែមេរោគកូរ៉ូណាស្របពេលបុគ្គលិកពេទ្យនៅជុំវិញពិភពលោកកំពុងខ្វះឧបករណ៍ការពារដោយសារតែការទិញម៉ាស់ស្តុកទុកបែបនេះ។
ទោះយ៉ាងណាខណៈបុគ្គលិកពេទ្យជាច្រើនសុំអង្វរឱ្យអ្នកទាំងនោះទុកម៉ាស់សម្រាប់អ្នកដែលត្រូវការចាំបាច់បំផុត។ស្រាប់តែមានក្រុមមួយហៅថា”ពួកជនល្បីចោលម្សៀតសម័យកូរ៉ូណា”បានយកម៉ាស់ដែលត្រូវការចាំបាច់ទៅច្នៃធ្វើជាឈុតប៊ីគីនីដើម្បីបង្អួតអ្នកគាំទ្រយ៉ាងឥតប្រយោជន៍ទៅវិញ។ជនមានឥទ្ធិពលលើបណ្តាញសង្គមទាំងអស់នោះភាគច្រើនបានថតរូបខ្លួនឯងក្នុងឈុតប៊ីគីនីធ្វើពីម៉ាស់ដែលគេហៅនិន្នាការនេះថា”ក្វារ៉ាន់គីនី”។
និន្នាការចម្លែកលើអនឡាញនេះកើតឡើងបន្ទាប់ពីអង្គការសុខភាពពិភពលោកស្នើសុំឱ្យមនុស្សដែលមានសុខភាពល្អកុំពាក់ម៉ាស់ព្រោះភស្តុតាងបង្ហាញថាវាជួយបានតិចតួចណាស់។គួរទុកម៉ាស់ឱ្យបុគ្គលិកពេទ្យនិងអ្នកជំងឺកូវីដ១៩ពាក់ល្អជាង។ក្នុងចំណោមតារាបណ្តាញសង្គមល្បីៗដែលរងការរិះគន់ទាំងនោះក៏មាននាងយូលីយ៉ាយូសាកូវ៉ាជនជាតិរុស្ស៊ីផងដែរ។ដោយនាងត្រូវបានអ្នកគាំទ្ររិះគន់យ៉ាងខ្លាំងចំពោះការយកម៉ាស់ច្នៃធ្វើជាឈុតប៊ីគីនីដើម្បីតែបង្អួតអ្នកគាំទ្រ។
អ្នកលេងInstagramម្នាក់សរសេរថា”ក្នុងប្រទេសនេះគ្មានម៉ាស់គ្រប់គ្រាន់ទេ។ប៉ុន្តែម៉ាស់មកនៅទីនេះទាំងអស់…”។ម្នាក់ទៀតបន្ថែមថា”យូលីយ៉ាអើយ…នេះជាការប្រមាថខ្លាំងណាស់។នាងគួរឱ្យម៉ាស់ទៅយាយរបស់នាងល្អជាង”។តារាបណ្តាញសង្គមដែលរងការរិះគន់ដូចទឹកបាក់ទំនប់ដទៃទៀតរួមមាននាង យ៉ាណា កូស៊ីនកា ជនជាតិរុស្ស៊ី និង នាងជេដ ម៉ារី ជនជាតិអូស្ត្រាលី៕រស្មីកម្ពុជា