កំពង់ចាម៖សមាជិកព្រឹទ្ធសភាចំនួនបីរូបនៃមណ្ឌលភូមិភាគទី២បានជួយឧត្ថម្ភផ្តល់ជាសម្ភារបរិក្ខានិងថវិកាជូនដល់ខេត្តកំពង់ចាមដែលជាគណ:កម្មការខេត្តប្រយុទ្ធនឹងជំងឺកូវីដ.១៩គឺដើម្បីចូលរួមបេសកកម្ម ប្រយុទ្ធនឹងជំងឺឆ្លងមួយនេះឱ្យទទួលបានជោគជ័យ។
ពិធីប្រគល់ទទួលម៉ាស់ចំនួន៥.០០០អាកុលចំនួន១២០លីត្រនិងថវិកាចំនួន៦.០០០.០០០រៀលពីសមាជិកព្រឹទ្ធសភាចំនួនបីរូបខាងលើគឺលោកជឹមលាវ,លោកច្រឹងគឹមស្រ៊ាននិងលោកស្រីស៊ីវណ្ណថាធ្វើឡើងនៅក្នុងសាលាខេត្តកំពង់ចាមកាលពីថ្ងៃទី ៧ ខែមេសា ឆ្នាំ២០២០។
លោកជឹមលាវតំណាងឱ្យម្ចាស់ជំនួយជាសមាជិកព្រឹទ្ធសភាបានថ្លែងថាសូមប្រគល់សម្ភារជាគ្រឿងបរិក្ខានិងថវិការបស់ពួកគាត់ទាំងបីរូបជូនទៅអាជ្ញាធរខេត្តកំពង់ចាមជាគណ:កម្មការខេត្តប្រយុទ្ធនឹងជំងឺកូវីដ.១៩។ ដើម្បីចាត់ចែងក្នុងបសកកម្មសមរភូមិមុខប្រយុទ្ធនឹងខ្មាំងសត្រូវដ៏កាចសាហាវ គឺជំងឺកូវីដ.១៩ ដែលបាន និងកំពុងឆ្លងរាតត្បាត គំរាមកំហែងពិភពលោក ពិសេសប្រទេសកម្ពុជាយើង។
លោកអ៊ុនចាន់ដាអភិបាលខេត្តកំពង់ចាមនិងជាប្រធានគណ:កម្មការខេត្តប្រយុទ្ធនឹងជំងឺកូវីដ.១៩បានមានប្រសាសន៍ថាយើងជាគណ:កម្មការខេត្តប្រយុទ្ធនឹងជំងឺឆ្លងមួយនេះគឺពិតជាមានការលំបាកធ្វើសកម្មភាពដល់មូលដ្ឋានក្នុងការទប់ស្កាត់ជំងឺកូវីដ.១៩ កុំឱ្យរីករាលដាលដល់ក្នុងសហគមន៍។
លោកប្រធានគណ:កម្មការខេត្តបានប្រសាសន៍បន្តថា ជុំវិញការជួយឧបត្ថម្ភជាសម្ភារ:បរិក្ខា និងជាថវិការបស់លោកលោកស្រីជាសមាជិកព្រឹទ្ធសភាទាំងបីរូបលើកនេះខាងគណ:កម្មការខេត្តប្រយុទ្ធនឹងជំងឺកូវីដ.១៩បានរាយការណ៍ជូនសម្តេចតេជោហ៊ុនសែនធានគណ:កម្មការជាតិប្រយុទ្ធនឹងជំងឺកូវីដ.១៩ រួចហើយ។
លោកបានបន្ថែមថាដោយសម្តេចបានឆ្លើយតបថាសម្តេចនឹងចេញលិខិតថ្លែងអំណរគុណដោយផ្ទាល់ជូនលោក លោកស្រីទាំងបី រូបផ្ទាល់ គឺមិនចាំបាច់ខាងគណ:កម្មការខេត្តប្រយុទ្ធនឹងជំងឺកូវីដ.១៩ ចេញលិខិតថ្លែងអំណរគុណទេ៕សម្បត្តិ