ស្ទឹងត្រែង៖កម្លាំងកងរាជអាវុធហត្ថខេត្តស្ទឹងត្រែងបានបញ្ជូនមុខសញ្ញាគាស់ផ្ទះពលរដ្ឋយកទ្រព្យសម្បត្តិអស់ជាង៣ម៉ឺនដុល្លារទៅតុលាការកាលពីល្ងាចថ្ងៃទី១១ខែមិថុនាឆ្នាំ២០២០។សូមបញ្ជាក់ថាកាលពីថ្ងៃទី៦ខែមិថុនាឆ្នាំ២០២០មានករណីចោរលួចគាស់ផ្ទះយកទ្រព្យសម្បត្តិប្រជាពលរដ្ឋមួយកន្លែង នៅចំណុចភូមិថ្មលាត សង្កាត់ស្រះឫស្សី ក្រុងស្ទឹងត្រែង។
ក្រោយពីមានករណីកើតឡើងប្រជាពលរដ្ឋបានមកដាក់ពាក្យបណ្ដឹងនៅទីបញ្ជាការកងរាជអាវុធហត្ថខេត្តស្ទឹងត្រែង។បន្ទាប់មកដោយមានការបញ្ជាផ្ទាល់ពី នាយឧត្តមសេនីយ៍សៅសុខាអគ្គមេបញ្ជាការរង និងជាមេបញ្ជាកងរាជអាវុធហត្ថលើផ្ទៃប្រទេសព្រមទាំងដឹកនាំផ្ទាល់ដោយលោកឧត្តមសេនីយ៍ត្រីអៀងវ៉ាន់ឌីមេបញ្ជាការអាវុធហត្ថខេត្តស្ទឹងត្រែងសហការជាមួយអាវុធហត្ថខេត្តកំពង់ស្ពឺ, ព្រះវិហារ, បន្ទាយមានជ័យ, ឧត្តរមានជ័យ និងខេត្តសៀមរាបបើកប្រតិបត្តិការតាមចាប់មុខសញ្ញា។
តាមប្រភពព័ត៌មានពីមន្ត្រីកងរាជអាវុធហត្ថខេត្តស្ទឹងត្រែងបានបញ្ជាក់ថាជនសង្ស័យដែលសមត្ថកិច្ចបង្ក្រាបបានឈ្មោះប៉ិចផាណ្ណៈអាយុ៣៦ឆ្នាំបានធ្វើសកម្មភាពលួចមានស្ថានទម្ងន់ទោស(គាស់ទម្លុះទម្លាយ)និងយកទ្រព្យសម្បត្តិសរុបជាង៣៦.០០០ដុល្លារកាលពីថ្ងៃទី៦ខែមិថុនាឆ្នាំ២០២០កន្លងទៅនៅចំណុចភូមិថ្មលាត សង្កាត់ស្រះឫស្សី ក្រុងស្ទឹងត្រែង។
ក្រោយទទួលបានពាក្យបណ្ដឹងពីប្រជាពលរដ្ឋបទបញ្ជាពីថ្នាក់លើអាវុធហត្ថខេត្តស្ទឹងត្រែងតាមចាប់មុខសញ្ញានិងសហការជាមួយអាវុធហត្ថខេត្តដទៃទៀតរហូតឈានដល់ឃាត់ខ្លួនជនជនសង្ស័យកាលពីថ្ងៃទី៨ខែមិថុនានៅស្រុកក្រឡាញ់ខេត្តសៀមរាប។
បន្ទាប់ពីឃាត់ខ្លួនជនសង្ស័យត្រូវបានបញ្ជូនមកកាន់ខេត្តស្ទឹងត្រែងវិញ។កាលពីថ្ងៃទី១១ខែមិថុនាឆ្នាំ២០២០អាវុធហត្ថខេត្តស្ទឹងត្រែងបានបញ្ជូនជនសង្ស័យទៅសាលាដំបូងខេត្តដើម្បីផ្ដន្ទាទោសតាមច្បាប់។
ដោយឡែកទ្រព្យសម្បត្តិរបស់ជនរងគ្រោះដោយមានការអនុញ្ញាតពីលោកជេតខេមរាត្រូវបានជំនាញការិយាល័យព្រហ្មទណ្ឌអាវុធហត្ថខេត្តស្ទឹងត្រែងបានប្រគល់ជូនជនរងគ្រោះវិញ។
ប្រភពជីកងរាជអាវុធហត្ថខេត្តស្ទឹងត្រែងបានឱ្យដឹងនៅព្រឹកថ្ងៃទី១២ខែមិថុនានេះថាជនសង្ស័យពាក់ព័ន្ធករណីចូលលួចទ្រព្យសម្បត្តិប្រជាពលរដ្ឋដែលមានតម្លៃជាង៣ម៉ឺនដុល្លារកំពុងបន្តនីតិវិធីនៅតុលាការ៕សុខុម