អន្តរជាតិ៖អ្នកការទូតកូរ៉េខាងត្បូងម្នាក់បានអះអាងថា លោក គីម ជុងអ៊ុន មេដឹកនាំកូរ៉េខាងជើងកំពុងសន្លប់បាត់ស្មារតី ហើយបងប្អូនស្រីរបស់លោក នឹងគ្រប់គ្រងប្រទេសកូរ៉េខាងជើង។នេះបើតាការផ្សាយរបស់សារព័ត៌មានដេល្លីម៉េលអនឡាញ។
លោកចាង សុង មីន អតីតជំនួយការរបស់ លោកគីម ដេជុង ប្រធានាធិបតីកូរ៉េខាងត្បូងបានអះអាងថាកូរ៉េខាងជើងកំពុងលាក់បាំងការពិតអំពីសុខភាពរបស់មេដឹកនាំរបស់ខ្លួនដែលកាន់តែយ៉ាប់យ៉ឺនហើយថាលោកយល់ថាមេដឹកនាំផ្តាច់ការនេះកំពុងស្ថិតក្នុងសភាពសន្លប់បាត់ស្មារតី។
ព័ត៌មានស្តីពីសុខភាពរបស់លោកគីម ជុងអ៊ុនកើតឡើងនៅពេលដែលការសង្ស័យអំពីស្ថានភាពសុខភាពពិតរបស់លោក ដោយសារតែមិនសូវឃើញវត្តមានជាសាធារណៈនៅឆ្នាំនេះ។ដោយនិយាយជាមួយប្រព័ន្ធផ្សព្វផ្សាយក្នុងស្រុក លោកចាង សុង មីន បាននិយាយថា”ខ្ញុំវាយតម្លៃបានថា “គាត់សន្លប់ ប៉ុន្តែជីវិតរបស់គាត់មិនទាន់ចប់ទេ”។
លោកបានបន្ថែមថា ប្អូនស្រីរបស់មេដឹកនាំផ្តាច់ការនេះ គឺ លោកស្រីគីម យ៉ូចុង អាយុ ៣៣ ឆ្នាំមានឋានៈខ្ពស់ក្នុងការកាន់កាប់អំណាចពីបងប្រុសរបស់លោកស្រី។លោកបាននិយាយថា”រចនាសម្ព័ន្ធស្នងតំណែងបន្តទាំងស្រុងមិនត្រូវបានបង្កើតឡើងទេដូច្នេះ លោកស្រី គីម យ៉ូចុង កំពុងត្រូវបានចាប់អារម្មណ៍ ខណៈដែលតំណែងទំនេរនេះមិនអាចរក្សាបានក្នុងរយៈពេលយូរទេ”។
ការអះអាងរបស់លោកចាង សុង មីន កើតឡើង ទោះបីជាប្រព័ន្ធផ្សព្វផ្សាយកូរ៉េខាងជើង បានបញ្ចេញរូបភាពលោកគីមជុងអ៊ុនចូលរួមកិច្ចប្រជុំរដ្ឋាភិបាលកាលពីថ្ងៃព្រហស្បតិ៍ក៏ដោយ ។កាលពីដើមសប្តាហ៍នេះមានការអះអាងថា លោក គីម ជុង អ៊ុនបានដំឡើងឋានៈប្អូនស្រីរបស់លោកឱ្យកាន់តំណែងដ៏សំខាន់របស់កូរ៉េខាងជើង៕សំណាង