អន្តរជាតិ៖ កងកម្លាំងអាមេរិកដែលជួយជម្លៀសជនអាហ្វហ្គានីស្ថានចេញពីការគ្រប់គ្រងរបស់តាលីបង់ កំពុងស្ថិតក្នុងការប្រុងប្រយ័ត្នខ្ពស់សម្រាប់ការវាយប្រហារភេរវកម្មបន្ថែម ក្រោយពីការវាយប្រហាររបស់ក្រុមរដ្ឋអីស្លាមបានសម្លាប់មនុស្ស៩២នាក់(ប្រភពខ្លះថា៩៥ ឬ១៦៨នាក់)រួមមានទាហានអាមេរិក១៣នាក់នៅក្រៅអាកាសយានដ្ឋានក្រុងកាប៊ុល។
ឧត្តមសេនីយ៍ ហ្វ្រែង ម៉ាក់កិនហ្ស៊ី ប្រមុខបញ្ជាការកណ្តាលអាមេរិក បាននិយាយថា ពួកមេបញ្ជាការអាមេរិកកំពុងតាមដានអំពីការវាយប្រហារបន្ថែមទៀតរបស់ក្រុមរដ្ឋអីស្លាម រួមទាំងការបាញ់គ្រាប់រ៉ុក្កែត ការបំផ្ទុះគ្រាប់បែកបង្កប់ក្នុងរថយន្តនៅអាកាសយានដ្ឋាន។
ការផ្ទុះគ្រាប់បែក២និងការបាញ់កាំភ្លើងកាលពីថ្ងៃព្រហស្បតិ៍បានកើតឡើងនៅក្រៅរបងជិតមាត់ទ្វារចូលអាកាសយានដ្ឋានក្រុងកាប៊ុល នៅពេលមនុស្សរាប់ពាន់នាក់ផ្តុំគ្នាយ៉ាងកកកុញដើម្បីបានចូលទៅខាងក្នុងនិងឡើងជិះយន្តហោះជម្លៀសខណៈកាលកំណត់ជម្លៀសចុងក្រោយថ្ងៃ៣១សីហាចូលកាន់តែកៀក។
ក្រុមរដ្ឋអីស្លាម បាននិយាយថា ការបំផ្ទុះគ្រាប់បែកមួយបានសំដៅលើអ្នកបកប្រែនិងជនសមគំនិតជាមួយកងទ័ពអាមេរិក។គិតត្រឹមថ្ងៃសុក្រទី២៧សីហាឆ្នាំ២០២១ ភាគច្រើនបំផុតនៃប្រទេសសម្ព័ន្ធមិត្តជាង២០ ដែលបានចូលពាក់ព័ន្ធក្នុងការងារជម្លៀសមនុស្សចេញពីអាហ្វហ្គានីស្ថាននេះបាននិយាយថា ពួកគេបានបញ្ចប់ការជម្លៀសមនុស្សចេញពីអាហ្វហ្គានីស្ថានហើយ៕ប្រែសម្រួលៈវាសនា
