អន្តរជាតិ(The Guardian)៖ មនុស្ស៦នាក់បានស្លាប់ និងរាប់សិបនាក់ទៀតរងរបួស នៅពេលដែលករណីផ្ទុះអាវុធកើតឡើង ក្នុងហ្វូងបាតុករដែលគាំទ្រក្រុមហេសបូឡា (Hezbollah) បានប្រមូលផ្តុំគ្នាតវ៉ាប្រឆាំងនឹងចៅក្រមស៊ើបអង្កេត ជុំវិញការផ្ទុះកំពង់ផែបេរូត។
អ្នកគាំទ្រក្រុមហេសបូឡាជាច្រើនរយនាក់ និងសម្ព័ន្ធមិត្តពាក់អាវខ្មៅ បានប្រមូលផ្តុំគ្នានៅឯវិមានយុត្តិធម៌បេរូត កាលពីថ្ងៃព្រហស្បតិ៍ ដោយអំពាវនាវឱ្យដកចៅក្រមតារ៉េកប៊ីតារ (Tarek Bitar) ចេញពីការស៊ើបអង្កេត ជុំវិញការផ្ទុះកំពង់ផែបេរូត ដោយចោទប្រកាន់ថាមានភាពលំអៀង។ ការផ្ទុះអាវុធនេះត្រូវបានគេលឺចេញពីតំបន់ Tayyoune ដែលនៅក្បែរវិមានយុត្តិធម៌នោះ។
មន្ត្រីប៉ូលីសលីបង់ បានឲ្យដឹងថា មនុស្ស៦ នាក់បានស្លាប់ និងជាង ៣០ នាក់ផ្សេងទៀតបានរងរបួស ដោយសារការផ្ទុះអាវុធនេះ។ដោយឡែកករណីផ្ទុះអាវុធខាងលើ មន្ត្រីប៉ូលិសក្នុងតំបន់ នៅមិនទាន់កំណត់អត្តសញ្ញាណបាននៅឡើយ ថាតើក្រុមណា ឬអ្នកណាជាអ្នកបាញ់ប្រហារមកលើក្រុមបាតុករដែលធ្វើការតវ៉ានោះ។ ភ្លាមៗនោះ កងទ័ពត្រូវបានបញ្ជូនទៅកាន់តំបន់នោះយ៉ាងច្រើន ហើយកងទ័ពមួយចំនួនផ្សេងទៀតត្រូវបានបញ្ជូនទៅ ដើម្បីស្វែងរកខ្មាន់កាំភ្លើងដែលបើកការបាញ់ប្រហារនោះ។
នៅក្នុងសេចក្តីថ្លែងការណ៍រួមមួយក្រុមហេសបូឡានិងសម្ព័ន្ធមិត្តអាម៉ាល (Amal) បានចោទប្រកាន់មកលើគណបក្សគ្រឹស្តសាសនាលីបង់ ថាជាអ្នកនៅពីក្រោយការបាញ់ប្រហារនេះ។មេដឹកនាំកងកម្លាំងលីបង់លោក Samir Geagea បាននិយាយនៅក្នុងសេចក្តីថ្លែងការណ៍មួយថា លោកនឹងថ្កោលទោសចំពោះការប៉ះទង្គិចគ្នា កាលពីថ្ងៃព្រហស្បតិ៍ កន្លងទៅនេះ។ ប៉ុន្តតែលោកមិនបានឆ្លើយតបទៅនឹងការចោទប្រកាន់ពីសំណាក់ក្រុមហេសបូឡា (Hezbollah) និងអាម៉ាល់ (Amal) ឡើយ។
គួរបញ្ជាក់ថា មូលហេតុចម្បងនៃព្រឹត្តិការណ៍ទាំងនេះគឺ ដោយសារតែមានភាពលំអៀងកើតឡើងក្នុងការស៊ើបអង្កេត ជុំវិញរឿងផ្ទុះកំពង់ផែបេរូត៕ដោយ៖Derm rang