ភ្នំពេញ៖ រយៈពេល១០ឆ្នាំ ប្រទេសជាសមាជិកអាស៊ានមានឱកាសរៀបចំ «វេទិកាទេសចរណ៍អាស៊ាន ឬ ASEAN Tourism Forum(ATF)»បានតែម្ដងប៉ុណ្ណោះ។នៅឆ្នាំ២០២១ ខាងមុខ ដល់វេនកម្ពុជាធ្វើជាម្ចាស់ផ្ទះរៀបចំ ATF 2021 វិញម្ដង ខណៈកាលពីដើមឆ្នាំ២០២០ កន្លងទៅ ATF 2020 ត្រូវបានធ្វើឡើងនៅប្រទេសព្រុយណេរួចមកហើយ។
ដើម្បីកៀងគរ និងបំផុសឱ្យមានការត្រៀមខ្លួនចូលរួមក្នុងវេទិកាទេសចរណ៍អាស៊ាន ATF 2021 នាពេលខាងមុខនោះក្រសួងទេសចរណ៍នាថ្ងៃទី១២ខែកុម្ភៈឆ្នាំ២០២០នេះបានរៀបចំពិធីផ្សព្វផ្សាយជាផ្លូវការ«កម្ពុជាទទួលធ្វើជាម្ចាស់ផ្ទះវេទិកាទេសចរណ៍អាស៊ានឆ្នាំ២០២១»។ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ នៅសណ្ឋាគាររ៉េស៊ីដង់សុខាភ្នំពេញ។
ពិធីនេះមានការចូលរួមពីថ្នាក់ដឹកនាំក្រសួង-ស្ថាប័នពាក់ព័ន្ធស្ថានទូតនានាប្រចាំកម្ពុជាមន្ទីរទេសចរណ៍រាជធានី-ខេត្តនិងក្រុមការងារអន្តរក្រសួង។ដើម្បីគ្រប់គ្រងនិងអភិវឌ្ឍន៍វិស័យទេសចរណ៍សមាគមទីភ្នាក់ងារទេសចរណ៍ (CATA) សមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជា (PATACC)។
សហព័ន្ធទេសចរណ៍កម្ពុជា (CTF) និងផ្នែកឯកជនពាក់ព័ន្ធក្នុងវិស័យទេសចរណ៍សរុបប្រមាណ ៩០០នាក់។អង្គពិធីបានឱ្យដឹងថា កម្ពុជានឹងធ្វើជាម្ចាស់ផ្ទះរៀបចំវេទិកាទេសចរណ៍អាស៊ានឆ្នាំ២០២១ (ATF2021)នៅរាជធានីភ្នំពេញចាប់ពីថ្ងៃទី១៧ដល់២៣ខែមករាឆ្នាំ២០២១ក្រោមប្រធានបទ«អាស៊ាន៖សហគមន៍សន្តិភាព និងអនាគតរួម»។
វេទិកាទេសចរណ៍អាស៊ានឆ្នាំ២០២១មានព្រឹត្តិការណ៍សំខាន់ៗដូចជាកិច្ចប្រជុំថ្នាក់រដ្ឋមន្ត្រីទេសចរណ៍អាស៊ាន កិច្ចប្រជុំស្ថាប័នជាតិទេសចរណ៍អាស៊ាន និងកិច្ចប្រជុំពាក់ព័ន្ធ ព្រមទាំងកិច្ចប្រជុំផ្នែកឯកជន សិក្ខាសាលានានានិងព្រឹត្តិការណ៍ពិព័រណ៍ទេសចរណ៍អន្តរជាតិ។
ការតាំងពិព័រណ៍ទេសចរណ៍អន្តរជាតិ ជាវេទិកាធុរកិច្ចទេសចរណ៍ដ៏ធំបំផុតក្នុងអាស៊ាន ដែលនឹងប្រព្រឹត្តទៅចាប់ពីថ្ងៃទី១៧ដល់២៣ ខែមករា ឆ្នាំ២០២១។មានការចូលរួមពីក្រុមហ៊ុនជាអ្នកលក់(Sellers)ប្រមាណជាង៤៥០ក្រុមហ៊ុនក្រុមហ៊ុនជាអ្នកទិញ (Buyers) ប្រមាណជាង ៤៥០ក្រុមហ៊ុន និងអ្នកសារព័ត៌មានជាតិ-អន្តរជាតិ ១០០នាក់ មកពីជុំវិញពិភពលោក។
លោកថោង ខុន បានអំពាវនាវដល់គ្រប់ភាគីពាក់ព័ន្ធក្នុងវិស័យទេសចរណ៍ទាំងផ្នែករដ្ឋ និងឯកជន ក៏ដូចជាប្រជាពលរដ្ឋទូទាំងប្រទេសកម្ពុជាឱ្យចូលរួមផ្សព្វផ្សាយអំពីការទទួលធ្វើជាម្ចាស់ផ្ទះ«វេទិកាទេសចរណ៍អាស៊ានឆ្នាំ២០២១»និងចូលរួមជាមួយរាជរដ្ឋាភិបាលក្នុងការរៀបចំធ្វើជាម្ចាស់ផ្ទះនេះដើម្បីទទួលភ្ញៀវដែលមកលេងកម្ពុជាប្រកបដោយទស្សនទាន«ទីក្រុងស្អាតរមណីយដ្ឋានស្អាតសេវាល្អបដិសណ្ឋារកិច្ចល្អ ផ្តល់ភាពកក់ក្តៅដល់ទេសចរ»។
លោកបន្តថាស្របពេលដែលពិភពលោកកំពុងប្រឈមនឹងការរាតត្បាតនៃជំងឺរលាកផ្លូវដង្ហើមដែលបង្កដោយវីរុសកូរ៉ូណាប្រភេទថ្មី«Covid19»កម្ពុជានៅតែជាគោលដៅទេសចរណ៍ប្រកបដោយសុខសុវត្ថិភាពសម្រាប់ភ្ញៀវទេសចរគ្រប់រូប។ក្នុងនោះគោលដៅទេសចរណ៍ប្រកបដោយសក្តានុពលរបស់កម្ពុជាសម្បូរទៅដោយផលិតផលទេសចរណ៍វប្បធម៌ បេតិកភណ្ឌ និងអេកូទេសចរណ៍។
នាឱកាសនោះសមាគមCATAសមាគមPATACCនិងសមាគមCTFបានប្តេជ្ញាគាំទ្រនិងចុះហត្ថលេខាលើអនុស្សរណៈស្តីពីការយោគយល់គ្នាជាមួយក្រសួងទេសចរណ៍ក្នុងការចូលរួមផ្សព្វផ្សាយនិងកៀងគរសមាជិកដៃគូពាក់ព័ន្ធចូលរួមវេទិកាទេសចរណ៍អាស៊ានឆ្នាំ២០២១ឱ្យបានច្រើនកុះករ៕ជុំ.ជឿន