កំពត៖គ្រោះថ្នាក់ចរចរមួយរវាងរថយន្តបុកជាមួយគោយន្តកន្ត្រៃពេលធ្វើដំណើរច្រាសទិគ្នាបណ្តាលឱ្យមនុស្សប្រុសស្រីចំនួន៦នាក់ក្នុងចំណោមអ្នករួមដំណើរ២៨នាក់បានរងរបួសធ្ងន់និងស្រាល។ហេតុការណ៍នេះបានកើតឡើងនៅលើផ្លូវលំមួយខ្សែស្ថិតក្នុងភូមិទ្វារថ្មីឃុំព្រៃថ្នងស្រុកទឹកឈូកាលពីយប់ថ្ងៃទី១៧ខែកុម្ភៈឆ្នាំ២០២០។
មន្ត្រីនគរបាលចរាចរផ្លូវគោកខេត្តកំពតបានប្រាប់ឱ្យដឹងថាកាលពីយប់ថ្ងៃទី១៧ខែកុម្ភៈមានករណីគ្រោះថ្នាក់ចរាចររវាងរថយន្តនិងគោយន្តបានកើតឡើងបណ្តាលឱ្យមនុស្សប្រុសស្រីប្រាំមួយនាក់រងរបួសធ្ងន់ស្រាល។ជនរងគ្រោះទាំងនោះជាអ្នកដំណើរលើគោយន្តដែលមានគ្នារហូតដល់២៨នាក់និងជាអ្នករស់នៅភូមិមនោណុបឃុំជម្ពូវ័ន្តស្រុកជុំគិរីខេត្តកំពត។
ប្រភពបានបន្តថាអ្នកបើកបររថយន្តបម្រុងរត់គេចតែត្រូវភាគីខាងគោយន្តនាំគ្នាឃាត់ខ្លួនរួចប្រគល់ជូនសមត្ថកិច្ចដើម្បីចាត់ការតាមផ្លូវច្បាប់។ចំណែកអ្នករងរបួសត្រូវបានបញ្ជូនទៅកាន់មន្ទីរពេទ្យដើម្បីទទួលការសង្គ្រោះនិងព្យាបាលជាបន្ទាន់៕