ភ្នំពេញ៖បុរសវ័យចំណាស់ម្នាក់បានស្លាប់ដោយគេប្រទះឃើញអណ្តែតទឹកទន្លេសាបមិនត្រូវបានស្គាល់អត្តសញ្ញាណនោះទេ។ហេតុការណ៍នេះបង្កឱ្យមានការភ្ញាក់ផ្អើលនៅចំណុចក្នុងទឹកទន្លេសាបត្រើយខាងលិចមុខអាគារក្រុមប្រឹក្សាអភិវឌ្ឍន៍កម្ពុជា(CDC)ផ្លូវព្រះស៊ីសុវត្ថិភូមិ១១សង្កាត់ស្រះចកខណ្ឌដូនពេញកាលពីព្រឹកថ្ងៃទី២៧ខែកក្កដាឆ្នាំ២០២០។ សមត្ថកិច្ចបានឱ្យដឹងថាសពបុរសនេះមិនត្រូវបានស្គាល់អត្តសញ្ញាណនោះទេមានអាយុប្រហែល៥០ឆ្នាំ សក់ខ្មៅលាយស្កូវ ពុកចង្កាស្កូវ ពាក់អាវយឺតកបើកដៃវែងឆ្នូតបង្កង់ ស្លៀកខោជើងវែងពណ៌ខ្មៅ និងស្លៀកខោក្នុងកៅស៊ូជើងខ្លីក្រឡាការ៉ូ(សខ្មៅ)។ បន្ទាប់ពីកើតហេតុកម្លាំងជំនាញខណ្ឌនឹងប៉ុស្តិ៍បានចុះដល់កន្លែងកើតហេតុហើយរាយការណ៍ជូនព្រះរាជអាជ្ញារងអមសាលាដំបូងរាជធានីភ្នំពេញនិងបានសហការជាមួយការិយាល័យបច្ចេកទេសវិឡាសាស្ត្រធ្វើកោសល្យវិច្ច័យពិនិត្យកន្លែងកើតហេតុនិងសព។ ឆ្លងតាមការពិនិត្យរបស់លោកឧកញ៉ាវេជ្ជបណ្ឌិតនងសុវណ្ណរ័ត្នគ្រូពេទ្យកោសល្យវិច្ច័យរាជធានីភ្នំពេញនិងជំនាញបច្ចេកទេសវិទ្យាសាស្ត្របានបញ្ជាក់ថាសពស្លាប់ដោយសារលង់ទឹក។ក្រោយមកមន្ត្រីប៉ុស្ដិ៍នគរបាលរដ្ឋបាលស្រះចកយកទៅតម្កល់នៅវត្តទួលសត្តវ័ត្ថហៅវត្តទួលអស់លោក៕
សន្តិសុខ
រថយន្តបុកជាមួយកង់បីបណ្តាលឱ្យរបួសជាច្រើននាក់នៅស្រុកប្រាសាទបាគង
សៀមរាប៖គ្រោះថ្នាក់ចរាចរណ៍រវាងរថយន្តហាយឡិនឌ័របុកជាមួយកង់បីបណ្តាលឱ្យមានអ្នករងរបួស៨នាក់។ហេតុការណ៍នេះបានកើតឡើងនៅក្នុងភូមិស្នារតេជោ៣១៧ឃុំបល្ល័ង្កស្រុកប្រាសាទបាគងខេត្តសៀមរាបកាលពីរសៀលថ្ងៃទី២៦ខែកក្កដាឆ្នាំ២០២០។ មន្ត្រីនគរបាលស្រុកប្រាសាទបាគងបានឱ្យដឹងថ្ងៃទី២៧ខែកក្កដាឆ្នាំ២០២០នេះថា៖មានរថយន្តម៉ាកហាយឡិនឌ័រពណ៌ទឹកប្រាក់ ស្លាកលេខសៀមរាប 2B 63 16 បើកបរដោយឈ្មោះទាប៊ុនហ៊ីមភេទប្រុសអាយុប្រហែលជាង៤០ឆ្នាំរស់នៅភូមិវត្តស្វាយសង្កាត់សាលាកំរើក ក្រុងសៀមរាប។
តុលាការឃុំខ្លួនក្រុមចោរលួចលុយតាម Wingដាក់ពន្ធនាគារ
ភ្នំពេញ៖លោកសាយសារុនចៅក្រមស៊ើបសួរសាលាដំបូងរាជធានីភ្នំពេញសម្រេចបញ្ជូនទៅឃុំខ្លួនចោរវ័យក្មេង៣នាក់ដែលលួចលុយតាម Wing វេរលុយដាក់ពន្ធនាគារព្រៃសកាលពីរសៀលថ្ងៃទី២៧ ខែកក្កដា ឆ្នាំ២០២០។ តាមប្រភពព័ត៌មានបានឱ្យដឹងថា៖ចោរវ័យក្មេងទាំង៣នាក់នេះត្រូវបានចោទប្រកាន់ពីបទ«លួចមានស្ថានទម្ងន់ទោស»ប្រព្រឹត្តនៅចំណុចរាជធានីភ្នំពេញកាលអំឡុងដើមខែកុម្ភៈឆ្នាំ២០២០តាមមាត្រា៣៥៣និងមាត្រា៣៥៧ នៃក្រមព្រហ្មទណ្ឌ។ ចោរវ័យក្មេងទាំង៣នាក់ នេះ មានឈ្មោះ ឈ្មោះ ប៊ុត បញ្ញា អាយុ៣៣ឆ្នាំ ជាមេក្លោង ឈ្មោះ យន្ត ពិភព អាយុ១៧ឆ្នាំ ជាអ្នកដកលុយ និង ឈ្មោះ យស់ ពិទូ អាយុ២០ឆ្នាំ ជា អ្នកដកលុយ ។ ជនសង្ស័យបានសារភាពថា ពួកខ្លួនពិតជាបានធ្វើសកម្មភាពឆបោក និងលួចប្រាក់តាមប្រព័ន្ធ Wing ប្រាកដមែនដោយប្រើវិធីលួចយកលេខកូដសម្ងាត់ពីអតិថិជនតាមរយៈបណ្តាញសង្គម។ដោយក្លែងបន្លំគណនីហ្វេសប៊ុកអ្នកលក់អនទ្បាញហើយបានទូរស័ព្ទទៅអតិថិជននោះ។ ដើម្បីបានទទួលលេខកូដសម្ងាត់វីងនិងវិធីមួយទៀតគឺចូលបន្លំខ្លួនធ្វើជាអតិថិជននៅតាមភ្នាក់ងារវេរលុយលួចថតលេខកូដសម្ងាត់អតិថិជនផ្សេងទៀតដែលកំពុងតែវេលុយ។ ក្រោយពីបានលេខកូដសម្ងាត់និងលេខទូរស័ព្ទដែលត្រូវវេលុយរួចហើយឈ្មោះប៊ុតបញ្ញាបានប្រើប្រាស់កម្មវិធីមួយឱ្យឈ្មោះ យន្ត ពិភព និងឈ្មោះ យស់ពិទូទៅបើកប្រាក់តាមភ្នាក់ងារវេលុយវីង។ ពេលភ្នាក់ងារវេលុយពិនិត្យលេខទូរស័ព្ទឆែកមិនឃើញលេខជនឆបោកទេតែបែរជាឃើញលេខអ្នកទទួលពិតប្រាកដទៅវិញ ៕
កម្លាំងរដ្ឋបាលព្រៃឈើបង្ក្រាបទីតាំងលាក់ទុកឈើអារចម្រុះប្រភេទលេខ១នៅស្រុករវៀង
ព្រះវិហារ៖កម្លាំងផ្នែករដ្ឋបាលព្រៃឈើរវៀងនិងកម្លាំងកងរាជអាវុធហត្ថស្រុករវៀង,ប៉ុស្តិ៍នគរបាលរដ្ឋបាលឃុំរំដោះបានចុះទប់ស្កាត់ស្រាវជ្រាវរុករកបង្ក្រាបបទល្មើសព្រៃឈើនិងសត្វព្រៃនៅចំណុចត្រពាំងព្រៃស្ថិតនៅភូមិស្វាយប៉ាតឃុំរំដោះស្រុករវៀងខេត្តព្រះវិហារកាលពីថ្ងៃទី២៦ខែកក្កដាឆ្នាំ២០២០។ លោកស៊ុស៊ីវុត្ថានាយផ្នែករដ្ឋបាលព្រៃឈើវៀងបានឱ្យដឹងថាៈបន្ទាប់ពីទទួលបានព័ត៌មានភ្លាមលោកបានដឹកនាំកម្លាំងមកដល់ទីតាំងនេះហើយបានប្រទះឃើញឈើសន្និធិដោយគ្មានលិខិតអនុញ្ញាតពីរដ្ឋបាលព្រៃឈើនូវឈើអារចម្រុះប្រភេទលេខ ១(សុក្រម,ផ្ចឹក,ស្រឡៅ)ដោយជនល្មើសបាន រត់គេចខ្លួនបាត់។តែនៅចំពោះមុខក្រុមការងារមន្ត្រីអាជ្ញាធរមូលដ្ឋានបានបញ្ជាក់ថាៈឈើទាំងអស់នេះជារបស់ឈ្មោះ ហួ សារិទ្ធ ភេទប្រុស និងឈ្មោះព្រីងវុធស្នាក់នៅទីតាំងខាងលើ។ លោកស៊ុស៊ីវត្ថាបានបន្តថាប្រតិបត្តិការនេះធ្វើឡើងក្រោមបញ្ជាផ្ទាល់ពីលោកនួនសុខុមនាយខណ្ឌរដ្ឋបាលព្រៃឈើព្រះវិហារ។ឈើដែលយកមកលាក់ទុកនៅចំណុចខាងលើនោះគឺក្រុមឈ្មួញរង់ចាំឱកាសល្អទើបលួចដឹកជញ្ជូនចេញ។ក៏ប៉ុន្តែដោយមានការចុះល្បាតពីកម្លាំងសមត្ថកិច្ចដោយឃើញគំនរឈើទើបធ្វើការបង្ក្រាបនិងរឹបអូសបានទាន់ពេលដែលក្រុមឈ្មួញមិនទាន់បានដឹកចេញ។ លោកនាយផ្នែកបញ្ជាក់ថាៈរាល់បទល្មើសធនធានធម្មជាតិការរក្សាទុកនិងការដឹកជញ្ជូនផលអនុផលព្រៃឈើដោយគ្មានលិខិតអនុញ្ញាតនេះក្រុមការងារនឹងបង្ក្រាបដូចភ្លៀងរលឹម។ទោះបីក្រុមឈ្មួញប្រើប្រាស់រូបភាពណាមួយដើម្បីបន្លំភែ្នកសមត្ថកិច្ចយ៉ាងណាក៏ដោយ។ បច្ចុប្បន្នវត្ថុតាងនេះត្រូវបានយកមករក្សាទុកនៅផ្នែករដ្ឋបាលព្រៃឈើរវៀងដើម្បីវាស់វែងនិងចាត់ការបន្តទៅតាមនីតិវិធីច្បាប់ស្តីពីរដ្ឋបាលព្រៃឈើ៕ញ៉ែមសុផល
ម៉ូតូបុកជាមួយម៉ូតូបណ្តាលឱ្យស្លាប់ម្នាក់រងរបួសធ្ងន់ពីរនាក់
កំពង់ស្ពឺ៖គ្រោះថ្នាក់ចរាចរណ៍ដោយម៉ូតូបុកជាមួយម៉ូតូបណ្តាលឱ្យស្លាប់ម្នាក់រងរបួសធ្ងន់ពីរនាក់ក្នុងភូមិព្រេចឃុំកក់ស្រុកបសេដ្ឋខេត្តកំពង់ស្ពឺកាលពីល្ងាចថ្ងៃទី២៦ខែកក្កដាឆ្នាំ២០២០។ មន្ត្រីនគរបាលស្រុកបសេដ្ឋបានឱ្យដឹងថាៈម៉ូតូម៉ាកហុងដាសេ១២៥ពណ៌ខ្មៅពាក់ស្លាកលេខភ្នំពេញ1CX9157។បើកបរដោយឈ្មោះសួនវុទ្ធីភេទប្រុសអាយុ២៤ឆ្នាំនៅភូមិបឹងសង្កែឃុំបសេដ្ឋស្រុកបសេដ្ឋបានស្លាប់នៅនិងកន្លែង។ បានបុកជាមួយម៉ូតូម៉ាកអ៊ិចសង់ទ័គ្មានស្លាកលេខបើកដោយឈ្មោះគង់សុខគាភេទប្រុសអាយុ២០ឆ្នាំនៅភូមិត្រពាំងពើកឃុំកាត់ភ្លុកស្រុកបសេដ្ឋ។របួសធ្ងន់ឌុបបងប្អូនជីដូនម្នាក់ឈ្មោះ ចេវចាន់ភេទប្រុស អាយុ១៧ ឆ្នាំនៅភូមិឃុំជាមួយគ្នា របួសធ្ងន់។ ក្រោយកើតហេតុមន្ត្រីជំនាញបានដឹកអ្នករងរបួសទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺ។ចំណែកវត្ថុតាងទាំងពីរគ្រឿងបានយកមករក្សាទុកនៅអធិការដ្ឋាននគរបាលស្រុកបសេដ្ឋរង់ចាំដោះស្រាយនៅពេលក្រោយ៕
បុរសម្នាក់ស្លាប់ដោយចរន្តខ្សែភ្លើងឆក់ពេលឈរទប់ជណ្ដើរដែក
ភ្នំពេញៈកម្មករផ្សាដែកម្នាក់បានស្លាប់ដោយសារតែចរន្តអគ្គិសនីឆ្លងតាមជណ្ដើរដែក១ដើមដែលបុរសនេះកាន់ទប់ឱ្យកម្មករ២នាក់ទៀតឡើងទៅផ្សាដែកនៅលើដំបូល។ តែទប់អត់ឈ្នះក៏ដួលរលំទៅលើខ្សែភ្លើងនៅលើធ្នឹមរបងបណ្ដាលឱ្យឆ្លងចរន្តឆក់ស្លាប់ភ្លាមៗ។ហេតុការណ៍បានកើតឡើងនៅចំណុចការដ្ឋានសំណង់ឃ្លាំងកំពុងសាងសង់មួយកន្លែងក្នុងភូមិព្រៃវែងខាងកើតសង្កាត់ព្រៃវែងខណ្ឌដង្កោកាលពីសៀលថ្ងែទី២៦ខែកក្កដាឆ្នាំ២០២០នៅ។ ជនរងគ្រោះឈ្មោះម៉ូរ៉ារដ្ឋាអាយុ៣៦ឆ្នាំស្នាក់នៅក្នុងការដ្ឋានឃ្លាំងកើតហេតុដែលគាត់និងម្ចាស់ឃ្លាំងគឺជាបងប្អូននិងគ្នាផងដែរមានទីលំនៅបច្ចុប្បន្ននៅភូមិត្រើយត្រឹងឃុំព្រៃកអំបឹលស្រុកស្អាង ខេត្តកណ្ដាល។ក្រោយពេលកើតហេតុកម្លាំងសមត្ថកិច្ចជំនាញចុះទៅពិនិត្យភ្លាមៗឃើញថាជនរងគ្រោះពិតជាស្លាប់ដោយខ្សែភ្លើងឆក់មែន៕
អប់រំយុវជនកំពុងផ្ដាច់សារធាតុញៀននៅមណ្ឌលកែប្រែបាត់ដំបង
បាត់ដំបង៖កាលពីចុងសប្តាហ៍នេះនៅទីបញ្ជាការរកងរាជអាវុធហត្តខេត្តលោកឧត្តមសេនីយ៍ត្រីមាសសុវណ្ណមេបញ្ជាការកងរាជអាវុធហត្ថខេត្តបាត់ដំបងបានណែនាំដល់យុវជនបន្សាបគ្រឿងញៀនជាង១០០នាក់។លោកបានលើកឡើងថា៖”គ្រឿងញៀនបំផ្លាញអនាគតខ្លួនឯងក្រុមគ្រួសារទ្រព្យសម្បត្តិនិងសង្គមជាតិយើង”។ ការលើកឡើងដូចនេះគឺនៅក្នុងពិធីសំណេះណាលនិងអប់រំដល់ស្រទាប់យុវជនកំពុងសម្រាកព្យាបាលផ្ដាច់សារធាតុញៀននៅមណ្ឌលអប់រំកែប្រែនៅក្មុងទីបញ្ជាការកងរាជអាវុធហត្ថខេត្តបាត់ដំបង។ ក្នុងនោះលោកឧត្តមសេនីយ៍ត្រីក៏បានផ្ញើសារមួយចំនួនដល់យុវជនកំពុងសម្រាកព្យាបាលផ្ដាច់សារធាតុញៀនមានខ្លឹមសារថា៖ត្រូវនិយាយថាទេចំពោះគ្រឿងញៀនយុវជនល្អរួមគ្នាគាំទ្រកំចាត់គ្រឿងញៀន។ គ្រឿងញៀនបំផ្លាញការសិក្សានិងជីវិតស្រស់ថ្លារបស់យុវវ័យ,គ្រឿងញៀនបង្កឱ្យមានអំពើហឹង្សាលួចឆក់ប្លន់និងឧក្រិដ្ឋកម្ម-រួមគ្នាបង្ការនិងដោះស្រាយបញ្ហាថ្នាំញៀន។លុបបំបាត់ថ្នាំញៀនត្រូវផ្ដើមចេញពីយើងទាំងអស់គ្នា។ យើងទាំងអស់គ្នាត្រូវចូលរួមធ្វើឱ្យសង្គមគ្មានថ្នាំញៀនដើម្បីសុខភាព និងអនាគត់ភ្លឺថ្លា សូមបដិសេធថ្នាំញៀនដោយឆ្លើយថាទេចំពោះគ្រឿងញៀន៕
រើសគ្រាប់ត្បាល់យកមកទុកក្នុងផ្ទះកូនយកទៅដំលេងផ្ទុះស្លាប់ម្នាក់របួស៣នាក់
ព្រះវិហារ៖ក្មេងប្រុសម្នាក់បានស្លាប់ភ្លាមៗនិងមនុស្ស៣នាក់ទៀតបានរងរបួសធ្ងន់ស្រាលក្នុងករណីផ្ទុះក្បាលគ្រាប់ត្បាល់ប្រភេទ៦០ម.ម.។ហេតុការណ៍នេះបានកើតឡើងនៅចំណុចដូនម៉ុកស្ថិតក្នុងឃុំកន្ទួតស្រុកជាំក្សាន្តខេត្តព្រះវិហារកាលពីវេលាថ្ងៃត្រង់ថ្ងៃទី២៦ខែកក្កដាឆ្នាំ២០២០។ តាមការបញ្ជាក់ពីលោកវរសេនីយ៏ទោឱសេងអធិកានគរបាលស្រុកជាំក្សាន្តបានឱ្យដឹងថា៖ហេតុដែលបណ្តាលឱ្យមានករណីផ្ទុះគ្រាប់យុទ្ធភណ្ឌប្រភេទក្បាលគ្រាប់ត្បាល់៦០.ម.មនេះដោយឪពុករបស់កុមារារងគ្រោះបានទៅស្រែហើយក៏បានប្រទះឃើញក្បាលគ្រាប់ត្បាល់ប្រភេទ.៦០.ម.ម.។បុរសនោះក៏បានរើសកាន់មកទុកចោលនៅក្បែផ្ទះដោយខ្លួនភ្លេចរាយការណ៏ទៅឱ្យក្រុមស៊ីម៉ាក់ដើម្បីយកទៅកម្ទេចចោល។ លោកវរសេនីយ៏ទោឱសេងបានបន្តថា៖ចៃដន្យកូនរបស់ខ្លួនរួមនឹងកុមារីចំនួន២នាក់ទៀតបានបបួលគ្នាមកលេង។តែមិននឹកស្មានថាកូនរបស់ខ្លួននិងគ្នីគ្នាគេនោះបានយកក្បាលគ្រាប់ត្បាល់ដែលខ្លួនបានរើសយកមកទុកនោះយកទៅដំលេងទេ។ ដោយខ្លួនមិនបានចាប់អារម្មតែនៅសុខៗក៏សំឡេងផ្ទុះឡើងយ៉ាងកក្រើកផ្ទះប្រៀបដូចផ្គរលាន់ទាំងកណ្តាលថ្ងៃត្រង់ដែលមេឃមិនមានងងឹតភ្លៀងយ៉ាងដូច្នេះអញ្ចឹងនោះឡើយ។ក្រោយដុំផ្សែងខ្មៅបានរសាត់បាត់ទៅបន្សល់ទុកនៅសាកសពកូន។ គួរបញ្ជាក់ថាកុមារាកុមារីដែលរងគ្រោះក្នុងការផ្ទុះក្បាលគ្រាប់ត្បាល់ប្រភេទ៦០ម.មនោះរួមមាន។ទី១ឈ្មោះស្មាន់ម៉ាភេទប្រុសអាយុ៥ឆ្នាំស្លាប់នៅនឹងកន្លែងកើតហេតុទី២ឈ្មោះអឹមម៉ារ៉ាភេទស្រីអាយុ៤ឆ្នាំរងរបួសធ្ងន់ទី៣ឈ្មោះហេងពៅភេទស្រីអាយុ៤ឆ្នាំរងរបួសធ្ងន់។ទី៤ឈ្មោះសំស្មានភេទប្រុសអាយុ៤២ឆ្នាំដែលត្រូវជាឪពុកបង្កើតរបស់សាកសពកុមារារងគ្រោះបច្ចុប្បន្នស្នាក់នៅភូមិឃុំនឹងស្រុកកើតហេតុ។ ក្រោយកើតហេតុសមត្ថកិច្ចមូលដ្ឋានបានចុះទៅធ្វើកោសល្យវិច្ច័យដោយសមត្ថកិច្ចសន្និដ្ឋានឃើញថាកុមារាដែលស្លាប់និងរងរបួសនេះពិតជាស្លាប់និងរងរបួសដោយសារតែផ្ទុះគ្រាប់ពិតប្រាកដមែន៕ញ៉ែមសុផល
ខេត្តនឹងចាត់ការលើអាជីករផ្សារផ្អាវដែលនៅតែលក់ដូរលើចិញ្ចើមថ្នល់
កំពង់ចាម៖លោកអ៊ុនចាន់ដាអភិបាលខេត្តកំពង់ចាមនឹងចាត់វិធានការច្បាប់លើអាជីវករផ្សារផ្អាវស្រុកបាធាយដែលនៅតែបន្តរឹងរុះលក់ដូរលើចំណីថ្នល់ប្រឆាំងជាមួយអាជ្ញាធរ។អាជ្ញាធរនឹងចុះរៀបចំសណ្តាប់ធ្នាប់ផ្សារមួយនេះឱ្យបានរៀបរយល្អទាំងផ្នែកចរាចរណ៍និងបរិស្ថាននៅថ្ងៃស្អែកថ្ងៃទី២៧កក្កដាដើមសប្តាហ៍នេះ។ លោកអភិបាលខេត្តកំពង់ចាមប្រកាសវិធានក្តៅបែបនេះនៅក្នុងកិច្ចប្រជុំមួយក្នុងសាលាខេត្តដែលមានការចូលរួមពីមន្ត្រីមន្ទីរអង្គភាពពាក់ព័ន្ធ អាជ្ញាធរស្រុកបាធាយ និងគណ:អាជីវករផ្សារផ្អាវ នៅចុងសប្តាហ៍កន្លងទៅ។ លោកផេនសុផលអភិបាលស្រុកបាធាយបានលើកឡើងនៅក្នុងកិច្ចប្រជុំថា ផ្សារផ្អាវ ស្ថិតក្នុងភូមិផ្អាវ ឃុំផ្អាវ ស្រុកបាធាយ ដែលមានតូបជាគ្រែលក់ដូរសរុបចំនួន ២៥៤ កន្លែង។ ប៉ុន្តែការប្រឈមដែលបណ្តាលឱ្យប៉ះពាល់ដល់សណ្តាប់លើផ្លូវសាធារណ: គឺកកស្ទះចរាចរណ៍ និងប៉ះពាល់បរិស្ថានបង្កដោយអាជីវករលក់ដូរលើចំណីថ្នល់ចំនួន ២៦៥ កន្លែង។ លោកអភិបាលស្រុកបាធាយបានលើកឡើងទៀតថាក្នុងនោះមានអ្នកលក់អមលើចំណីថ្នល់សម្តេចតេជោខាងកើតផ្សារ និងខាងលិចផ្សារសរុបចំនួន ១៣២ កន្លែង។ លើចំណីថ្នល់ខាងមុខផ្សារចំនួន ៥២ គ្រែ ។ ផ្ទះខាងក្រោយផ្សារចំនួន ១០ ផ្ទះ និងផ្សារត្រីចំនួន ១៥០ កន្លែង។ លោកបានបន្តថាៈអាជ្ញាធរស្រុកធ្លាប់បានចុះណែនាំដល់ពួកគាត់ដោយផ្ទាល់ច្រើនលើកនិងអាជ្ញាធរខេត្តក៏ធ្លាប់បានចេញលិខិតជូនដំណឹងឱ្យលក់ដូរមានសណ្តាប់ធ្នាប់គឺធ្វើយ៉ាងណាឱ្យបានផុតពីចំណីថ្នល់។ប៉ុន្តែលិខិតនោះបានបញ្ចប់កាលបរិច្ឆេទតាំងពីថ្ងៃទី១៥ខែកក្កដាឆ្នាំ២០២០បែរជាសកម្មភាពលក់ដូរផ្សារផ្អាវ នៅតែកើតនៅលើចំណីថ្នល់ និងហៀរលើទ្រូងផ្លូវបង្កឱ្យការកកស្ទះចរាចរណ៍ដដែល។ លោក អ៊ុន ចាន់ដា អភិបាលខេត្តកំពង់ចាមមានប្រសាសន៍ថា យើងត្រូវសហការគ្នារវាងអាជ្ញាធរ និងគណ:អាជីវករដោះស្រាយបញ្ហាសណ្តាប់ធ្នាប់ផ្សារផ្អាវនេះឱ្យបានរៀបរយចប់សព្វគ្រប់មិនឱ្យឆ្លងផុតឆ្នាំ២០២០នេះទេ។នឹងបន្តដោះស្រាយករណីផ្សារមួយនេះតាមនីតិវិធីគឺអនុវត្តវិធានការច្បាប់នឹងចុះអនុវត្តនៅថ្ងៃចន្ទស្អែកថ្ងៃទី ២៧ ខែកក្កដាដើមសប្តាហ៍នេះ។ លោកអភិបាលខេត្តកំពង់ចាមបានបន្តថាករណីមានបុគ្គលជាអាជីវករណារឹងទទឹងប្រឆាំងនឹងការរៀបចំសណ្តាប់ធ្នាប់ផ្សារនេះគឺអាចនឹងឈានដល់ឃាត់ខ្លួនជននោះ។ការដោះស្រាយផ្សារនេះយើងមានតម្រុយសម្រាប់ការដោះស្រាយនិងសង្ឃឹម៨០ភាគរយនៃការជោគជ័យ។ ពិសេសបានដោះស្រាយបញ្ចប់លើករណីអាជីករលក់ដូរលើចំណីថ្នល់និងទ្រូងថ្នល់ប៉ះពាល់សណ្តាប់ចរាចរណ៍។គឺអាជីវករផ្សារបឹងកុកនិងផ្សារធំថ្មីកំពង់ចាមក្រុងកំពង់ចាមដែលល្បីយូរឆ្នាំហើយនោះគឺលែងកកស្ទះទៀតហើយនាពេលបច្ចុប្បន្ននេះ៕សម្បត្តិ
ផ្នែករដ្ឋបាលព្រៃឈើឆែបឃាត់រថយន្តដឹកឈើអារលេខ១អត់ច្បាប់មួយគ្រឿង
ព្រះវិហារ៖លោកសេងលាងនាយផ្នែករដ្ឋបាលព្រៃឈើឆែបបានឱ្យដឹងថា៖កាលពីរសៀលថ្ងៃទី២៥ខែកក្កដាឆ្នាំ២០២០ផ្នែករដ្ឋបាលព្រៃឈើឆែបសហការជាមួយកម្លាំងកងរាជអាវុធហត្ថស្រុកឆែបបានឃាត់ចាប់រថយន្តមួយគ្រឿងម៉ាកស៊ាំងយ៉ុងពណ៌លឿងពាក់ស្លាកលេខភ្នំពេញ2V9535។ លោកនាយផ្នែករដ្ឋបាលព្រៃឈើបានបន្តថា៖រថយន្តបានដឹកឈើអារប្រភេទលេខ១សុក្រមប្រភេទចំនួន៥០សន្លឹកស្មើនឹង១,១៥មដោយគ្នានលិខិតអនុញ្ញាតដឹកជញ្ជូនពីរដ្ឋបាលព្រៃឈើនៅត្រង់ចំនុចៈUTM522322_1526322។ ស្ថិតនៅភូមិពោធិ៍ទាបឃុំម្លូព្រៃមួយស្រុកឆែបខេត្តព្រះវិហារដោយមានម្ចាស់ឈ្មោះសំប្រុសមុខរបរបើកបរភេទប្រុសអាយុ៤៣ឆ្នាំទីលំនៅភូមិរកាក្រៅឃុំកន្ទួតស្រុកស្វាយលើខេត្តសៀមរាប។ វត្ថុតាងខាងលើក្រុមការងារបានយកមករក្សាទុកនៅស្នាក់ការផ្នែករដ្ឋបាលព្រៃឈើឆែបជាបណ្តោះអាសន្នដើម្បីចាត់ការតាមនីតិវិធីច្បាប់ស្ដីពីព្រៃឈើ៕ប៊ូ រ៉ា