ភ្នំពេញ៖អាជ្ញាធររាជធានីផ្តើមសាងសង់ស្ពានអាកាសថ្មើរជើងមួយទៀតនៅស្តុបសន្ធរម៉ុកដោយត្រូវបញ្ចុះបឋមសិលាសាងសង់ព្រឹកថ្ងៃទី២៨ធ្នូឆ្នាំ២០១៩ក្រោមអធិបតីភាពលោកឃួងស្រេងអភិបាលរាជធានីភ្នំពេញ។ស្ពាននេះមានទីតាំងស្ថិតនៅសង្កាត់ទឹកល្អក់ទី២ខណ្ឌទួលគោករាជធានីភ្នំពេញ។
កាលពីពេលកន្លងមកសាលារាជធានីភ្នំពេញមានគម្រោងសាងសង់ស្ពានអាកាសចំនួនពីរទី១ស្ថិតនៅផ្សារដើមគរនិងទី២នៅមុខបឋមសិក្សាសន្ធរម៉ុក។គម្រោងស្ថាបនាស្ពានអាកាសថ្មើរជើងទាំង២ធ្វើឡើងឱ្យធានាបានគុណភាពខ្ពស់បំផុតរហូតដល់៥០ឆ្នាំឡើងទៅក្នុងទិសដៅសម្រួលការឆ្លងកាត់របស់សិស្សនិងអ្នកដំណើរនៅតំបន់នោះ។
គួរបញ្ជាក់ថា៖ មកដល់ពេលនេះរាជធានីភ្នំពេញមានស្ពានអាកាសថ្មើរជើងចំនួន៣កន្លែងហើយ ដោយនៅតំបន់ជម្ពូវ័ន្តខណ្ឌពោធិសែនជ័យមានចំនួន២កន្លែង និងនៅតំបន់ភ្លើងស្តុបនាងគង្ហីង មានចំនួន១កន្លែង។ រដ្ឋបាលរាជធានីភ្នំពេញគ្រោងពង្រីកគម្រោងស្ថាបនានេះឱ្យបាន ច្រើន កន្លែងបន្ថែមទៀត ដើម្បីឆ្លើយតបទៅនឹងប្រទេសជាតិមានការអភិវឌ្ឍនិងទីក្រុងមានភាព ស៊ីវិល័យ និងបង្កលក្ខណៈងាយស្រួលដល់ប្រជាពលរដ្ឋឆ្លងកាត់ផ្លូវប្រកបដោយសុវត្ថិភាព៕