ភ្នំពេញ៖មន្ត្រីនគរបាល ចំនួនប្រាំរូប ត្រូវបានដាក់ពិន័យ ដោយសារតែប្រព្រឹត្តខុសទៅនឹងបទបញ្ជា និងសេចក្តីណែនាំ របស់អគ្គស្នងការដ្ឋាននគរបាលជាតិ នៅក្នុងការចុះអនុវត្តការរឹតបន្តឹងច្បាប់ចរាចរណ៍ផ្លូវគោក។ មន្ត្រីនគរបាលទាំងប្រាំរូបនេះ មានដូចជា មន្ត្រីនគរបាលនៃស្នងការដ្ឋាននគរបាលខេត្តកំពង់ធំ ខេត្តស្វាយរៀង និងនៅរាជធានីភ្នំពេញ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ កាលពីថ្ងៃទី២៩ ខែឧសភា ក្នុងពិធីផ្ទេរតំណែងអភិបាលខេត្តកែបថា ទាក់ទងការរឹតបន្តឹងច្បាប់ចរាចរណ៍ផ្លូវគោក គឺសម្តេចបានដាក់ពិន័យមន្ត្រីមួយចំនួន ហើយបញ្ហានេះ មិនអាចដកថយបានទេ ត្រូវបន្តទៅទៀត។ សម្តេចក្រឡាហោម មិនបានបញ្ជាក់ អំពីឈ្មោះមន្ត្រី ដែលត្រូវបានដាក់ពិន័យនោះទេ។
ចំណែកមន្ត្រីជាន់ខ្ពស់ នៃអគ្គស្នងការដ្ឋាននគរបាលជាតិ បានឱ្យដឹងកាលពីរសៀល ថ្ងៃទី៣០ ខែឧសភាថា មន្ត្រីនគរបាលចំនួនប្រាំរូប ត្រូវបានដាក់ពិន័យ គឺលោកវរសេនីយ៍ឯក រុំ សុវិជ្ជា អតីតប្រធានការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ធំ ។លោកដោយត្រូវបញ្ចប់មុខតំណែង បន្ទាប់ពីបើកបរស្រវឹង និងជេរប្រមាថ លើអភិបាលខេត្តកំពង់ធំ។
លោកវរសេនីយ៍ទោ សួគ៌ ធី អធិការរងនគរបាលស្រុកចន្ទ្រា នៃស្នងការដ្ឋាននគរបាលខេត្តស្វាយរៀង ដោយបានផ្អាកការងារ ជាបណ្ដោះអាសន្ន បន្ទាប់ពីលោកអធិការរងរូបនេះ បានអនុវត្តន៍លើសគោលការណ៍ណែនាំ របស់ថ្នាក់ដឹកនាំ បង្កឱ្យប្រជាពលរដ្ឋ មានការថ្នាំងថ្នាក់។ ចំណែកមន្ត្រីនគរបាលចំនួនបី រូបទៀត នៃស្នងការដ្ឋាននគរបាលរាជធានីភ្នំពេញ ដោយដាក់ពិន័យផ្អាកការងារ។
លោកឧត្តមសេនីយ៍ឯក ស ថេត អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ បានឱ្យដឹងកាលពីល្ងាចថ្ងៃទី៣០ ខែឧសភាថា មន្ត្រីនគរបាលចរាចរណ៍ នៃស្នងការដ្ឋាននគរបាលរាជធានីភ្នំពេញ ចំនួនបីនាក់ ត្រូវបានដាក់ពិន័យ ដោយសារផាកពិន័យពីរ៉ឺម៉កកង់បី មិនត្រូវទៅតាមច្បាប់ ដោយយកលុយគេ អត់មានចេញប័ណ្ណ។
លោកស្នងការនគរបាលរាជធានីភ្នំពេញ បានបញ្ជាក់ថាៈ “ខ្ញុំដាក់ពិន័យមួយក្រុម (បីនាក់) ដែលឈរនៅគោលដៅត្រង់ស្តុបវត្តនាគវ័ន្ត ដោយសារគាត់ផាកតុកៗ វាអត់ត្រូវទៅតាមច្បាប់ បានន័យថា គាត់យកលុយគេ ដោយអត់មានសរសេរប័ណ្ណឱ្យគេ។ ពេលនោះ ខ្ញុំក៏ទទួលបានព័ត៌មាន ពីអ្នកដែលជិះតុកៗនោះ ខ្ញុំក៏ស្រាវជ្រាវទៅឃើញមានពិតចឹងមែន។ដូច្នេះខ្ញុំយកមកដាក់ពិន័យនៅស្នងការដ្ឋាន តាមរូបភាពក្នុងកម្រិតកំហុសរបស់គាត់”។
ថ្មីៗនេះសម្តេចក្រឡាហោម ស ខេង បានបញ្ជាក់ថា ការរឹតបន្តឹងច្បាប់ចរាចរណ៍ផ្លូវគោក គឺមិនដកថយទេ ។ប៉ុន្តែបញ្ហាសំខាន់ត្រង់ថា មន្ត្រីរបស់យើងអនុវត្តច្បាប់ គឺត្រូវប្រកាន់ខ្ជាប់នូវសីលធម៌ វិជ្ជាជីវៈ សុភាពរាបសារ ទន់ភ្លន់ ម៉ឹងម៉ាត់ មិនមែនបានឱកាសឆែកឆេរ យកលុយពីប្រជាពលរដ្ឋ គឺអត់បានទេ។ ជាមួយគ្នានេះ សម្តេច បានសង្កត់ធ្ងន់ថាៈ “មិនត្រូវដាក់បារាស់ ដើម្បីឆែកប្រជាពលរដ្ឋ អ្នកធ្វើដំណើរតាមផ្លូវទាំងអស់នោះទេ ។គឺយើងឃាត់តែអ្នកណាដែលខុសច្បាប់ សូមចាំឱ្យច្បាស់បញ្ហានេះ បើមិនចឹង វាទៅជាប៉ាតណា ប៉ាតណី ហើយវាខុសពីគោលការណ៍ដែលយើងបានកំណត់។
គួរបញ្ជាក់ថា លទ្ធផលរឹតបន្តឹងការអនុវត្តច្បាប់ចរាចរណ៍ផ្លូវគោក តាមស្មារតីអនុក្រឹត្យលេខ៣៩ រយៈពេល៣០ថ្ងៃ គិតពីថ្ងៃទី១ ដល់ថ្ងៃទី៣០ ខែឧសភា ឆ្នាំ២០២០ យានយន្តដែលត្រូវបានត្រួតពិនិត្យ និងផាកពិន័យ សរុបចំនួន ៤៣.៥៣០គ្រឿង ក្នុងនោះម៉ូតូមានចំនួន ៣១.៧៥៥គ្រឿង និងរថយន្តមានចំនួន ១១.៧៧៥គ្រឿង ក្នុងនោះរថយន្តតូចចំនួន ១០.០៥៦គ្រឿង និងរថយន្តធំចំនួន ១.៧១៩ គ្រឿង៕សុភាព
លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ