ភ្នំពេញ៖ប្រទេសទាំងឡាយរបស់អាស៊ានបានបើកកិច្ចប្រជុំរួមគ្នាក្នុងក្របខណ្ឌសហព័ន្ធសមាគមការធ្វើដំណើរអាស៊ី(FATA)តាមរយៈប្រព័ន្ធVideoConferenceកាលពីថ្ងៃទី១៩ខែមិថុនា ឆ្នាំ២០២០។ដើម្បីពិភាក្សាលើការបើកព្រំដែនឡើងវិញសម្រាប់ទេសចរណ៍ក្នុងតំបន់អាស៊ានគោលនយោបាយក្នុងការជំរុញការធ្វើដំណើររបស់ទេសចរណ៍ក្នុងស្រុករវាងប្រទេសអាស៊ានក៏ដូចជាការលើកទឹកចិត្ត(Incentives)និងផែនការ(PromotionalPlans)ជំរុញការផ្សព្វផ្សាយដើម្បីជំរុញការធ្វើដំណើរក្នុងអាស៊ានផងដែរ។
ភាគីកម្ពុជាដែលចូលរួមក្នុងកិច្ចប្រជុំនេះត្រូវបានដឹកនាំដោយលោកថោងរដ្ឋសក្តិអគ្គនាយកអភិវឌ្ឍន៍ទេសចរណ៍និងសហប្រតិបត្តិការអន្តរជាតិក្រសួងទេសចរណ៍។នេះបើយោងតាមគេហទំព័រ(website)ក្រសួងផ្សាយឱ្យដឹងនៅថ្ងៃទី១៩ខែមិថុនាឆ្នាំ២០២០នេះ។
គេហទំព័របានផ្សាយទៀតថាកិច្ចប្រជុំប្រព្រឹត្តទៅក្រោមកិច្ចសម្របសម្រួលពីលោកHonorableTanSriDr.OngHongPengអតីតអគ្គលេខាធិការនៃក្រសួងទេសចរណ៍ម៉ាឡេស៊ីនិងមានការចូលរួមពីបណ្តារប្រទេសចំនួន ៨ ក្នុងតំបន់អាស៊ាន រួមមានកម្ពុជា ថៃ មីយ៉ាន់ម៉ា ម៉ាឡេស៊ី ឥណ្ឌូនេស៊ី ហ្វីលីពីន សិង្ហបុរី ឥណ្ឌា។
លោក ថោង រដ្ឋសក្តិ ក៏បានបង្ហាញពីបច្ចុប្បន្នភាពជូនអង្គសន្និសីទអំពីស្ថានភាពកូវីដ-១៩នៅកម្ពុជា ដែលស្ថិតក្រោមការគ្រប់គ្រងយ៉ាងល្អប្រសើរនិងមានការយកចិត្តទុកដាក់ខ្ពស់ពីសំណាក់រាជរដ្ឋាភិបាល។រាជរដ្ឋាភិបាលបានដាក់ចេញនូវគោលនយោបាយថ្មីៗមួយចំនួនរួមមានវិធានសុវត្ថិភាពទេសចរណ៍របស់ក្រសួងទេសចរណ៍ (New Normalization Protocols for Health and Safety) ។ដើម្បីចូលរួមទប់ស្កាត់ការរាលដាលជំងឺកូវីដ-១៩ដល់សហគមន៍ស្របពេលដែលទេសចរផ្ទៃក្នុងកំពុងមានការកើនឡើង។
ការអនុវត្តនូវវិធានការសុវត្ថិភាពនិងអនាម័យសម្រាប់សេវាកម្មដឹកជញ្ជូនទេសចរណ៍តាមផ្លូវគោកនិងផ្លូវទឹកភោជនីយដ្ឋានអាហារដ្ឋានសណ្ឋាគាររមណីយដ្ឋាននិងសហគមន៍ទេសចរណ៍សម្រាប់ជំហានទី១ដោយមានការសហការពីអង្គការទេសចរណ៍ពិភពលោកក្រសួងសុខាភិបាលនិងក្រសួងទេសចរណ៍។
លោកក៏បានបញ្ជាក់ថាកម្ពុជាពុំដែលបិទព្រំដែនជាមួយប្រទេសជិតខាងឡើយ។តែទេសចរណ៍អន្តរជាតិដែលមកកម្ពុជាតម្រូវឱ្យមានលិខិតធានារ៉ាប់រងសុខភាពយ៉ាងតិច៥០.០០០ដុល្លារនិងតម្កល់ប្រាក់ចំនួន៣.០០០ដុល្លារសម្រាប់សេវាកម្មផ្សេងៗពាក់ព័ន្ធកូវីដ១៩។
លិខិតបញ្ជាក់អវិជ្ជមានកូវីដ១៩ពីសំណាក់អាជ្ញាធរសុខាភិបាលរបស់ប្រទេសខ្លួនដែលមានសុពលភាព៧២ម៉ោងមុនពេលធ្វើដំណើរមកកម្ពុជា។តំណាងប្រទេសនីមួយៗបានលើកឡើងអំពីគោលនយោបាយនិងវិធានការពិសេសមួយចំនួនរបស់ប្រទេសខ្លួន។
ជាមួយគ្នានោះលោកស្រីឆាយស៊ីវលីនប្រធានសមាគមទីភ្នាក់ងារទេសចរណ៍(CATA)ក៏បានលើកឡើងអំពីស្ថានភាពទីភ្នាក់ងារទេសចរណ៍នៅកម្ពុជា ៩៥ភាគរយប្រតិបត្តិករទេសចរណ៍បានផ្អាកអាជីវកម្ម ចំណែកប្រតិបត្តិករទេសចរណ៍៥ភាគរយទៀតកំពុងខិតខំបង្កើតសកម្មភាពលិតផលថ្មីដើម្បីទាក់ទាញទេសចរណ៍ក្នុងស្រុក ។ក្នុងនោះទេសចរណ៍វ័យជំទង់កំពុងពេញនិយមក្នុងការឡើងភ្នំ និងបោះតង់។
សមាគមCATAបាននិងកំពុងអនុវត្តគោលនយោបាយរបស់រាជរដ្ឋាភិបាលក្នុងការរក្សាសុវត្ថិភាពក្នុងសេវាកម្មទេសចរណ៍ រួមមាន សេវាកម្មស្នាក់នៅ ភោជនីយដ្ឋាន-អាហារដ្ឋានរមណីយដ្ឋានទេសចរណ៍ សហគមន៍ទេសចរណ៍ សេវាកម្មដឹកជញ្ជូនទេសចរណ៍ផ្លូវគោក និងផ្លូវទឹក៕ជ.ជឿន
