ព្រះវិហារ៖រយៈពេល៥ថ្ងៃក្នុងឱកាសឈប់សម្រាកសងថ្ងៃបុណ្យចូលឆ្នាំចាប់តាំងពីថ្ងៃទី១៧ដល់ថ្ងៃទី២១ខែសីហាឆ្នាំ២០២០។ភ្ញៀវទេសចរជាតិនិងអន្តរជាតិជាង៦ម៉ឺននាក់បានចូលមកកម្សាន្តនៅតាមរមណីយដ្ឋាននានាជាច្រើនកន្លែងក្នុងទឹកដីនៃខេត្តព្រះវិហារ ។
លោកគង់វិបុលប្រធានមន្ទីរទេសចរណ៍ខេត្តព្រះវិហារបានឱ្យដឹងថា៖នៅក្នុងឱកាសឈប់សម្រាករយៈពេល៥ថ្ងៃភ្ញៀវទេសចរជាតិនិងអន្តរជាតិបានចូលទស្សនាកម្សាន្តនៅតាមតំបន់រមណីដ្ឋានទេសចរណ៍នានាមានចំនួន៦០.៥៧៨នាក់។ក្នុងនោះអ្នកទេសចរបរទេស មានចំនួន ២៤១នាក់ ។
លោកគង់ វិបុល បានបន្តថា៖ប្រៀបធៀបរយៈពេលចូលឆ្នាំថ្មីប្រពៃណីខ្មែរ ២០១៩មានការថយចុះចំនួន ៥៩,៦៨ភាគរយ។ក្នុងនេះភ្ញៀវជាតិចំនួន៦០.៣៣៧នាក់ថយចុះចំនួន៥៩,៧២ភាគរយ។រីឯភ្ញៀវបរទេសចំនួន២៤១នាក់ថយចុះចំនួន៤៧,៧២ភាគរយ។ប្រធានមន្ទីរទេសចរណ៍បានបញ្ជាក់ថាៈមូលហេតុដែលធ្វើឱ្យចំនួនភ្ញៀវទេសចរធ្លាក់ចុះនេះដោយឆ្នាំ២០១៩ខេត្តព្រះវិហារបានរៀបចំធ្វើពិធីសង្ក្រាន្តកោះកែរ៍ ។
លោកវរៈសេនីយ៍ទោបៀនសុខរ័ត្នអនុប្រធានការិយាល័យនគរបាលទេសចរណ៍នៃស្នងការដ្ឋាននគរបាលខេត្តព្រះវិហារបានឱ្យដឹងថាៈកម្លាំងនគរបាលទេសចរណ៍ខេត្តសហការណ៍ជាមួយកម្លាំងប៉ុស្តិ៍នគរបាលរដ្ឋបាលនៅតំបន់នេះ។កម្លាំងបានរក្សាការពារសន្តិសុខសណ្តាប់ធ្នាប់និងសុវត្ថិភាពបានយ៉ាងល្អប្រសើរ ជូនភ្ញៀវជាតិ និងអន្តរជាតិដែលបានចូលមកទស្សនាកម្សាន្តនៅទីនេះ។
លោកបានបន្តថាៈនៅក្នុងរយៈពេល ៥ថ្ងៃនេះពុំមានកើតឡើង នូវបញ្ហាអសន្តិសុខឬហេតុការណ៍មិនប្រក្រតីណាមួយដែលបង្កការភ័យខ្លាច ដល់ភ្ញៀវទេសចរណ៍នោះឡើយ៕វ៉ាន់ឌី
