ភ្នំពេញៈ ដំរីឈ្មោលចំណាស់មួយក្បាលអាយុប្រមាណជាង៥០ឆ្នាំបានស្លាប់កាលពីថ្ងៃទី២១ ខែកញ្ញាឆ្នាំ២០២០។នេះបើតាមការឱ្យដឹងពីលោក ឃុនឌីយ៉ូនប្រធានសមាគមអភិរក្សដំរីកម្ពុជានៅខេត្តមណ្ឌលគិរីប្រាប់ឱ្យដឹងនៅថ្ងៃនេះ ។
លោកបានឱ្យដឹងទៀតថាៈ ការស្លាប់ដំរីនេះគឺដោយសារតែវា មានវ័យចាស់ជរាផង និងមានជំងឺ ជាដំបៅច្រើនកន្លែង ហើយមើលមិនជាសោះ។ វាជាដំរីស្រុក របស់សហគមន៍ពូតាង ក្រុងសែនមនោរម្យ ដែលជាដំរី វ័យចាស់ ដែលជីវិតវា បានឆ្លងកាត់ការលំបាកជាច្រើន ដូចជា វាធ្លាប់ម្ចាស់ ប្រើអូសឈើហ៊ុប មនុស្សម្នាជិះវា ជាទេសចរណ៍កម្សាន្ត ។វាទើបតែឈប់សម្រាក លែងឱ្យជាជំនិះ ក្នុងអំឡុងពេល ៥ ឆ្នាំចុងក្រោយនេះទេ។
លោក យ៉ូន បានប្រាប់ថាៈ សហគមន៍ និងអ្នកភូមិជនជាតិ បានធ្វើបុណ្យ កប់វា តាមប្រពៃណីជនជាតិ។ ឆ្នាំ២០២០ នេះ មានដំរី ឈ្មោល ២ ក្បាល បានស្លាប់ នៅមណ្ឌលគិរី និងនៅខេត្តរតនគិរី ស្លាប់ ១ ក្បាល ដែលសរុប ស្លាប់អស់ ៣ ក្បាល ៕ជ.ជឿន
