បន្ទាយមានជ័យ៖ក្រុមមន្ត្រីពេទ្យសត្វខេត្តបានចាប់រថយន្តមួយគ្រឿងដែលលួចដឹកមាន់រស់អត់ច្បាប់ជាង១.០០០ក្បាលពីថៃចូលមកកម្ពុជាតាមច្រករបៀងព្រំដែនកម្ពុជាថៃក្នុងឃុំទួលពង្រស្រុកម៉ាឡៃខេត្តបន្ទាយមានជ័យកាលពីយប់ថ្ងៃទី១៨ខែមេសាឆ្នាំ២០២១។រថយន្តដឹកមាន់នេះសមត្ថកិច្ចចាប់បាននៅផ្លូវជាតិលេខ៥ ក្បែរស្ថានីយ៍ថ្លឹង រថយន្តកូនដំរី ក្នុងភូមិកូនដំរី សង្កាត់និមិត្ត ក្រុងប៉ោយប៉ែត ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាល ខេត្តបន្ទាយមានជ័យ បានឱ្យដឹងថា៖ លោកបានដាក់មន្ត្រី តាមគោលដៅ ស្ទាក់ចាប់រថយន្តឈ្មួញ លួចដឹកមាន់រស់ ចូលពីប្រទេសជិតខាងមកកម្ពុជា ។រថយន្តមួយគ្រឿង ពាក់ផ្លាកលេខ ភ្នំពេញ 2F-3428 ដឹកមាន់រស់ ចំនួន ១.១០០ ក្បាល យកចូលមកខេត្តបន្ទាយមានជ័យ។
លោកបានបន្តថា៖ តាមនីតិវិធីនៃជំនាញ នឹងយកសំណាក ផ្ញើទៅពិនិត្យនៅមន្ទីរពិសោធន៍ វីរុសសាស្ត្រ នៃវិទ្យាល័យជាតិ ស្រាវជ្រាវសុខភាពសត្វ និងផលិតកម្មសត្វ របស់អគ្គនាយកដ្ឋានផលិតកម្មសត្វ និងសុខភាពពសត្វ នៃក្រសួងកសិកម្ម ចេញ រាជធានីភ្នំពេញ ដើម្បីឱ្យដឹងថា តើមាន់ទាំងនោះ មានជំងឺផ្តាសាយបក្សី ឬអត់? ។
តែចំពោះមុខនេះ មន្ត្រីជំនាញ តាមដាន សុខភាពសត្វ និងដាក់ឱ្យធ្វើចត្តាឡីស័ក ក្នុងអំឡុងពេល ២ ទៅ ៣ ថ្ងៃសិន ។ បើមិនមានអ្វីគួរឱ្យកត់សម្គាល់ នៃជំងឺផ្តាសាយបក្សីទេនោះ មន្ត្រីជំនាញ នឹងអនុវត្តតាមនីតិវិធីច្បាប់ ដោយផាកពិន័យ ៕ដោយ៖វិចិត្រ