ភ្នំពេញ៖កម្លាំងនគរបាលប្រចាំការបានចាប់ជនសង្ស័យម្នាក់ដើរចូលប៉ងលួចម៉ូតូនៅមុខប៉ុស្ដិ៍ស្ទឹងមានជ័យទី៣ខណ្ឌមានជ័យ កាលពីល្ងាចថ្ងៃទី២៧ ខែធ្នូ ឆ្នាំ២០២១។
មន្ត្រីនគរបាលបានឱ្យដឹងថា ជនសង្ស័យឈ្មោះហម បូរ៉ា អាយុ២៦ឆ្នាំជាសន្តិសុខក្រុមហ៊ុនឯកជន ស្នាក់នៅ ភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ មានផ្ទុកសារធាតុញៀន។ក្នុងនោះសមត្ថកិច្ចដកហូតសម្ភារប្រព្រឹត្តបទល្មើសមាន-ដែកចុងស្រួច១-ដែកមូល១-ម៉ាឡេត១-ដង្កាប់២-តុលឺវីស១និងសោសម្រាប់ដោះ១ ។
មុនចាប់ខ្លួនកម្លាំងនគរបាលប៉ុស្ដិ៍មានការសង្ស័យលើបុរសនោះទើបឃាត់ខ្លួនយកសួរនាំ។នៅចំពោះមុខសមត្ថកិច្ច ជនសង្ស័យបានប្រាប់ថា ខ្លួនពិតជាមានបំណងលួចម៉ូតូនៅមុខស្នាក់ការប៉ុស្ដិ៍នគរបាលស្ទឹងមានជ័យទី៣មែន។បន្ទាប់មកជនសង្ស័យនិងវត្ថុតាងត្រូវសមត្ថកិច្ចបានរៀបចំ សំណុំរឿងបញ្ជូនបន្តដើម្បីអនុវត្តតាមច្បាប់៕