ភ្នំពេញ៖សមត្ថកិច្ចចាប់ជនសង្ស័យបានម្នាក់ ក្នុងក្រុមមានបក្ខពួកប្រមាណ១០នាក់ ដែលឆក់យកទូរសព្ទពីស្ត្រីកំពុងធ្វើដំណើរតាមផ្លូវបានសម្រេច នឹងបញ្ជូនទៅតុលាការចាត់ការតាមច្បាប់។ ករណីនេះបានកើតឡើងនៅម្តុំផ្លូវរថភ្លើងកែងផ្លួវវិមានឈ្នះ ឈ្នះ ក្នុងភូមិសំរោង សង្កាត់សំរោង ខណ្ឌពោធិ៍សែនជ័យ កាលពីថ្ងៃទី២ ខែសីហាឆ្នាំ២០២៣។
អ្នកឃើញហេតុការណ៍បានឱ្យដឹងថា ដំបូងមានស្ត្រីម្នាក់ជិះម៉ូតូម៉ាកហុងដាឌ្រីមផ្លាកលេខភ្នំពេញ2CQ-8092 តាមផ្លូវវិមានឈ្នះ ឈ្នះ ពីជើងទៅត្បូង។មកដល់កន្លែងខាងលើក៏បានដកទូរសព្ទម៉ាកOPPO មកនិយាយ។ពេលនោះស្រាប់តែមានចោរប្រុសស្រីប្រមាណ១០នាក់ជិះម៉ូតូ៥គ្រឿងបានមកឆក់យកទូរសព្ទពីជនរងគ្រោះបានសម្រេច ហើយព្យាយាមបើកម៉ូតូរត់គេចខ្លួន។
ភ្លាមនោះម្ចាស់ទូរសព្ទបានបើកម៉ូតូដេញតាម ដោយស្រែកថាចោរៗផង ខណៈសមត្ថកិច្ចកំពុងធ្វើចរាចរណ៍ក៏ស្ទាក់ចាប់បានម្នាក់ និងដកហូតម៉ូតូមួយគ្រឿងម៉ាកស្កុបពីផ្លាកលេខភ្នំពេញKF-2188។រីឯទូរសព្ទជនរងគ្រោះត្រូវបានបក្ឋពួកយកទៅបាត់។ចំណែកក្រុមចោរទាំងនោះសមត្ថកិច្ចកំពុងបន្តតាមចាប់ខ្លួន៕
